2 Nyaha 33 - Emakhuwa Bible

Olamula wa Manaxe

¹ Manaxe aapaceraawe olamula, aarino iyaakha muloko ni piili sa oyariwawawe, analamula oYerusaleemu iyaakha miloko mithanu niithanu.

² Owo aapaka soonanara vamaithoni wa Yave, atakihaka ipakelo soothanyeya sa miloko oomonlaawe Yave ohoolo wa aYixrayeli.

³ Aarasela mapuro a miluku soowootha, aaphwantaawe Hezekiya atithawe, anaatekela altaari* aBahali*, anathipela nyiri soothipeleliwa sa Axera. Aakokhorela ithenyeeri sootheene sa wiirimu, analapa.

⁴ Aahaateka altaari* Mpaani mwa Yave, mwa mwemmo Yave eenraawe: “Nsinanaka nnoopwaherera wa mahuku ootheene oYerusaleemu.”

⁵ Mmapuwani oomeeli a Empa ya Yave, owo aatekela altaari* ithenyeeri sootheene sa wiirimu.

⁶ Mpakatho aahaahisa anamwanaawe asilopwana aapakaka yooveleela munreyareyani na oBeni-Hinomi; aapaka sookhwiri, aaheraka ihako ni macitta; aavarela muteko minepa, akohereraka minepa sa akhwiiye. Aapaka soonanara sincipale vamaithoni wa Yave, atannyaka isarasawe.

⁷ Owo aakuxa ecaambulo yoopatthiwa, aniikaathi Mpaani mwa Yave, mwa mwemmo Muluku aamweerenlaawe Davide ni mwaniye Salomoni: “Mpaani mwa Yave ela ni oYerusaleemu, kithanlalaaka eriyari ya ipuumba sootheene sa aYixrayeli, kinoohelamo Nsinanaka wa mahuku ootheene.

⁸ aYixrayeli yapaka paahi yeeyo kaalamulenlaaka mmalamuloni ootheene, ikano ni soolamulela sivahiwe mwa Moisesi, nkaahiyatho ekhumaka mulaponi kaavanghaaka makholowaanyu.”

⁹ Wa soothesene, Manaxe oohapuxa oYuda ni muloko wa oYerusaleemu, mpaka waatepa opaka soonanara opwaha miloko Yave aaphwantaawe ohoolo wa aYixrayeli.

¹⁰ Yave aahuuluma ni Manaxe ni mulokwaawe, mene khayaampwatthelanse.

Orukunxa murima ni orehereriwa wa Manaxe

¹¹ Tivawo Yave aarumihenlaawe asitokweene a anakhotto a mwene a wAsiriya, mwa yaawosa yaamvanre Manaxe, enamuhomano mphulani eyuuma yoongweyano, enamutthuka ni onyooro wa ebronze, enamuronghasa oBabiloniya.

¹² Moothanananimwawe, owo aahaasaasa ekhavihero ya Yave, Mulukwaawe, aniiyevihaxa ohoolo wa Muluku a makholowaawe.

¹³ Owo avekenleene, Yave aamwiiwa, anaakhulela yoovekaawe, anamuhokoloxera oYerusaleemu ni woomweneniwawe. Hiiho, Manaxe aahoonelela weera Yave ti Muluku.

¹⁴ Vahoolo wa yeeyo, owo aarasela anaandyeerera exiri ya omokoni wa esidade ya Davide, mpatta ninkela nsuwa wa naattuuttu a oGihoni munreyareyani, mpaka vamulako wa Ihopa, muxerexere wa nttumuxa na wOfeli. Aawiikaathitho asitokweene a anakhotto musidadeni soolipihiwa sootheene sa oYuda.

¹⁵ Manaxe aakhumiha Mpaani mwa Yave miluku sa anamarwa ni icaambulo iikaathiyaawemo, mpakatho altaari* ootheene a miluku soowootha aatenkaawe vanttumuxani na Empa ya Yave ni oYerusaleemu; aavonyera okerekhere wa esidade.

¹⁶ Vahoolowaya, aahaareherera altaari* a Yave, anapakelawo sooveleelela murettele ni soovaha sootthapela, aalamulelaka aYuda weera emurumeele Yave, Muluku a oYixrayeli.

¹⁷ Wa soothesene, muloko waapwaherera opakela sooveleela mwaltaarini a mmattumuxani, mene paahi wa Yave, Mulukwaaya.

Okhwa wa Manaxe

¹⁸ Sookhumelela sikina iyo sa olamula wa Manaxe, vamoha ni omvekelawawe Mulukwaawe, ni masu yaamuulumenlaaya anamoonihera* mwa Nsina na Yave, Muluku a oYixayeli, silempwale munamalepelani a nyaha sa mamwene a oYixayeli.

¹⁹ Mmavekelonimwawe ni waakhula wa Muluku, mpaka sootthekasawe ni ohiroromeleyawawe, ohiya mmapuroni aatenkaawe altaari* a miluku soowootha ni nyiri soothipeleliwa sa Axera ni miluku sikina, ahinaaye wiiyeviha, sootheene iyo, silempwale munamalepelani a nyaha sa anamoonihera*.

²⁰ Manaxe aahookhwa, anavithiwa vamoha ni makholowaawe vaatewawe. Aamurandenle ti Amoni mwaniye mulopwana.

Olamula ni okhwa wa Amoni

²¹ Amoni aapaceraawe olamula, aarino iyaakha miloko miili ni piili sa oyariwawawe, analamula oYerusaleemu iyaakha piili.

²² Owo aapaka soonanara vamaithoni wa Yave, ntoko atithawe. Amoni aalapa, anapakela sooveleela miluku sootheene aapankaawe Manaxe.

²³ Vaheera ovirikanawawe ni atithawe Manaxe, khiiyevinghe ohoolo wa Yave, mene aahaandyeerera nthowanawe.

²⁴ Asitokweene a Amoni yaamvaanelelasa, enamwiivelasa vaatewawe wa emwene.

²⁵ Vaheera muloko waawiiva ootheene yaamvaanelenle mwene Amoni, enamvara omwene Yosiya mwaniye mulopwana vanipuroniwawe.