2 Nyaha 31 - Emakhuwa Bible

Ophwatiwa wa altaari* a miluku sikina

¹ Emanleene efesta, aYixrayeli yaari ofestani yaakhumelasa musidadeni sa oYuda, enapwexakasa maluku ootteeliheriwa, enaphwata nyiri soothipeleliwa sa Axera. Awosa yaahaaphwata altaari* a miluku soowootha sa oYuda ni oBenyamini wootheene nitho wEfrayimi ni oManaxe. Ephwanteene sootheene, yaahokoleela musidadenimwaya, khula mutthu arowaka owannyawe.

² Hezekiya aahaathanla asaserdoti* ni aLeevi moorandelanani, khula mutthu ni sootthuneyasawe: opaka sooveleela soohisa ni sa murettele, orumeela, otthapela ni wiipa icipo soomvuwiha mmilakoni sa woomaka wa Yave.

³ Mwene aacaanga sooreelasawe wa sooveleela soohisa sa oxeexelo ni oxekuwa, ni wa sooveleela soohisa, wa iSaabadu, wa nyeeri sinyowani ni wa ifesta soothanliwa, ntoko elempwalaaya munlamuloni na Yave.

⁴ Owo aalamulela muloko wa oYerusaleemu weera waavahe asaserdoti* ni aLeevi yeeyo yaari yawaya, weera ewere wiitteelihera Nlamulo na Yave.

⁵ Alaleiyeene nlamulo nna, aYixrayeli yaavahaxa mpatta woopacera wa etrigu, eviinyu, makhura, oravo ni sootheene saaruweriwe mmatta. Yaaruuha sanaamuloko sa sootheene. Iyo saari sincipalexa.

⁶ Amaki a oYixrayeli ni oYuda yaakhala isidade sa oYuda, yaaruuhatho sanaamuloko sa mihuwosaya sootheene ni sa itthu sootteelihiwa eereliwaka Yave, Mulukwaaya, ethukumanyihaka mmapuroni mancipale.

⁷ Yaapacenre opaka yeeyo vamweerini wanaararu, enamaliha vamweerini wanaathannamiili.

⁸ Hezekiya ni asitokweenaawe yaaphiyalaaya yoonaka saathukumanyihiwaayamo soovaha, yaamvuwiha Yave, enaareeliha aYixrayeli, mulokwaaya.

⁹ Hezekiya aahaakoha asaserdoti* ni aLeevi mwaha wa soovaha iye

¹⁰ ni mutokweene a asaserdoti* Azariya, a emusi ya Zadoki, aamwaakhula: “Okhuma opacenraaya oruuha muloko micaangosaya Mpaani mwa Yave, nookhalano yookwana oca ni nlelo yookhala yincipale, niwoko Yave ooreeliha mulokwaawe, ni ela ti yincipale ehanle.”

Orehereriwatho wa asaserdoti* ni aLeevi

¹¹ Hezekiya aalamulela weera ereherere moothokorora Mpaani mwa Yave ni yaapakiwa hiiho.

¹² Vano yaaruuha oororomeleyeene micaango, sanaamuloko ni soovaha sootteelihiwa. muLeevi Konaniya ti aawehaweha sootthuneya iye, akhaviheriwaka ni munneiye Ximeyi.

¹³ Yehiyeli, Azariya, Nahati, Asaheli, Yeremoti, Yozabade, Eliyeli, Ismakiya, Mahate ni Benaya, yaari anamawehaweha yaalamuliwa ni Konaniya vamoha ni munneiye Ximeyi, yaathanliwe ni mwene Hezekiya ni Azariya, mutokweene aawehaweha Empa ya Muluku.

¹⁴ Kore, mwaana mulopwana a muLeevi Imena, namalipelela a mulako wa mpatta ninkhuma nsuwa, ti aawehaweha soovaha ni otthuna saapakeliwe Muluku, akawaka micaango aatteeliheriwaawe Yave ni soovaha sootteelaxa.

¹⁵ Edeni, Miniyamimi, Yexuwa, Xemaiya, Amariya ni Xekaniya yaamukhavihera moota woororomeleya, musidadeni sa asaserdoti*, yaakawelaka soovaha asaserdoti* asikhwaaya, ettharihaka orandelana yeeraaya, ekhalaka oowuuluvala naari amiravo.

¹⁶ Awosa yaakawela asilopwana ni anamwane asilopwana a iyaakha tthaaru woorowa ohoolo, mwa yaawo masinaaya yaalempwale munamalepelani a ikhapira – ootheene yeera evolowe Mpaani mwa Yave, weera evare mitekosaya sa khula nihuku, ettharihaka sootthuneyasaya ni orandelanawaya.

¹⁷ Namalepela a mukhapirani sa asaserdoti* aapakiwa sittharihiwaka imusisaya; ni namalepela a aLeevi oopwaha iyaakha miloko miili sittharihiwaka sootthuneyasaya ni orandelanawaya.

¹⁸ Munamalepelani, yaalikeliwa anamwane asikhaani, asithiyana, anamwane asilopwana ni asithiyana a mukuttula wootheene, niwoko asaserdoti* ni aLeevi yaaroromeleya mootteelihanimwaya.

¹⁹ Eriyari ya asaserdoti*, ekhapira ya Aharoni, yaakhala mulaponi mwaacihiwamo muxerexere wa isidadesaya, yaathanliwa asilopwana akina akina, esidade ti esidade, weera yaakawele soovaha asaserdoti* asilopwana ootheene, ni ootheene yaawo yaalepeliwe mukhapirani sa aLeevi.

²⁰ Ti yeeyo aapankaawe Hezekiya moomweneni wootheene wa oYuda. Owo aapaka yeeyo yaari yooreera ni yoowookoleleya ni aaroromeleya wa sootheene vamaithoni wa Yave, Mulukwaawe.

²¹ Sootheene owo aapakaawe Mpaani mwa Muluku, ni ngwiiwelelani ikano ni malamulo, owo aamwaasa Mulukwaawe, avaraka ni murima wootheene. Tivawo saamweettelaaya nnenesene.