2 Nyaha 26 - Emakhuwa Bible

Olamula wa Uziya

¹ Vano muloko wootheene wa oYuda, waamvara omwene Uziya, vanipuroni na atithawe, areeneno iyaakha muloko niithannamosa sa oyariwawawe.

² Ti yoowo aawinne, anarasela esidade ya wElate wa oYuda, Amaziya avithiweene vamoha ni makholowaawe.

³ Uziya aathatuwaawe mwene, aarino iyaakha muloko niithannamosa sa oyariwawawe, analamula oYerusaleemu iyaakha miloko mithanu ni piili. Amayawe yaari muYerusaleemu, ni yiitthaniwa Yekoliya.

⁴ Owo aapaka onaakhulelaawe Yave, ntoko aapankaawe Amaziya atithawe.

⁵ Owo aamwaasa Muluku mweehuhuni ya okumi wa Zakariya, mwa yoowo aamuhusihale moomoovani Muluku. Mweehuhuni yootheene Uziya aamwaasaawe Yave, Muluku aamweettiherela nnene.

⁶ Owo aarowa okhottoni waawanano aFilisti, anakurumula ixiri sa oGate, oYabene ni wAxidodi. Vahoolowaya, aateka isidade vakhiviru ni wAxidodi, mpakatho mapuro makina a elapo ya waFilisti.

⁷ Muluku aamukhavihera waawanano aFilisti, awArabiya yaakhala oGuri-Bahali ni aMewuni.

⁸ awAmoni yaamuliva musoko Uziya, ni epilaawe yaahiiwanyeya mpaka omwiinanoni wa wExipitu, niwoko aathatuwa ooweraxa.

⁹ Uziya aateka itoore* soolipaxa oYerusaleemu, vamulako wa vaNttuumbani, mulako wa vaNreyareyani ni vanttuumbani na exiri.

¹⁰ Aatekatho itoore* munikareni, anathipa ihime sincipale, niwoko owo aakhalano mihuwo sincipale vathi vathi wa mmattumuxani ni munghawalawani. Owo aakhalano anamiteko mmattamwawe ni imatta sa iwuuvasawe, mmattumuxani ni muthaadyirani, niwoko wannamusivela olima.

¹¹ Uziya aakhalano anakhotto oolikaneene owana, aakawanyihaka mikuttula mikuttula, attharihaka waatta wa anakhotto yaathukumanyihiwe ni namalepa Yehiyeli, ni mwa mutokweene Maaseya, elamuliwaka ni Hananiya, mmoha a asitokweene a mwene.

¹² Waatta wa mapwattapwattha a imusi yaalamula anakhotto moowanani waari 2 600.

¹³ Anakhotto yaalamulasaaya yaari 307 500, oolikaneene owana, anakhotto ooweraxa yaamukhavihera mwene waawanano amwiittanaawe.

¹⁴ Uziya aakhumiha ixikudu*, mavaka, ikapaseti, soowiixaakihera vakakasani, nyuura ni ikwambala soovonyera maluku wa anakhotto ootheene.

¹⁵ Aapaka maakina oYerusaleemu, mwa yaawo yaapakiwe ni anamaratta weera evareliweke muteko mmatooreni* ni moowiixaakihera wa mmattuumbani. Vano maakina ale yaalatha nyuupa ni maluku matokotoko. Owo aakhaviheraxiwa, ni hiiho aathatuwa ooweraxa, ni epilaawe yaaphiya ottai.

¹⁶ Wa soothesene, Uziya athatungweene ooweraxa, wiixoonawawe waammoroxa. Owo khaaroromeleiye wa Yave, Mulukwaawe, anavolowa Mpaani mwa Yave weera ahise erubani* valtaarini* a erubani*.

¹⁷ Azariya, mutokweene a asaserdoti*, ni asaserdoti* akina a Yave, oolipaxa murima miloko mithannamiraru, yaamutthara ottuli.

¹⁸ Awosa yaamululuwanano, enamweerelasa: “Khoontthuneya nyuwo Uziya omuhisera erubani* Yave. Muteko owo ti wa asaserdoti*, a ekhapira ya Aharoni, atteeliheriwe ohisa erubani*. Mvenye vaNipuroni Nootteela*, niwoko nyuwo khamuroromeleiye ni khamuttittimihiwa ni Yave, Muluku.”

¹⁹ Uziya avarenleene yoohisera erubani*, oolikaneene ohisa erubani*, aahaanyoonyeriwa asaserdoti*. Ehuhuweene yeeyo vamaithoniwaya, ohoolo wa altaari* a erubani* Mpaani mwa Yave, yaamukhuma maleepela vayuuciwawe.

²⁰ Azariya, mutokweene a asaserdoti*, ni asaserdoti* ootheene akinaawo, yoonakaru nleepela, yaamoomolasa woowaakuveya Mpaani mwa Yave. Vekhaikhai, owo muneenaawe aatthunaxa okhuma, niwoko Yave aamvulaliha.

²¹ Mwene Uziya aahaawa makokho mpaka nihuku aakhwiiyaawe. Mweehuhuni yootheene eyo, aakhala empaawe meekhaawe, areene ni makokho ni ahivareleyaka muteko Mpaani mwa Yave. Yotami, mwaana mulopwana a Uziya, ti aawehaweha empa ya emwene, alamulaka muloko.

²² Sookhumelela sikina iyo sa moolamulani wa Uziya, okhuma ompacereroni mpaka ommaleloni, silempwale ni mprofeeti Yesaya, mwaana mulopwana a Amosi.

²³ Uziya aahookhwa, anavithiwa omahiyeni wa emwene, ohikhanle munihiyeni na emusi ya emwene, niwoko aari namakokho. Yotami, mwaniye mulopwana Uziya, ti aamurandenle.