2 Nyaha 25 - Emakhuwa Bible

Olamula wa Amaziya

¹ Amaziya aapaceraawe olamula, aarino iyaakha miloko miili niithanu sa oyariwawawe, analamula oYerusaleemu iyaakha miloko miili niithanniixexe. Amayawe yiitthaniwa Yehowadini; awo yaari muYerusaleemu.

² Owo aapaka onaakhulelaawe Muluku, mene khoohiyono ni murima wootheene.

³ Oonaka weera ori oolipeene vahiceni ya emwene, aalamulela wiiviwa asitokweene yaamwiivale mwene aari tiithaawe.

⁴ Wa soothesene khaawiivale anamwane asilopwana a anamwiiva, attharihaka yeeyo elempwale munlamuloni, mulivuruni ya Moisesi, olamulenlaawemo Yave: “Asitiithi khaanaakhwela anamwanaaya, hata anamwane khaanaakhwela asitithaya; khula mutthu anaakhwele yootthekaawe.”

Wiiviwa wa awEdomi

⁵ Amaziya aahaathukumanyiha asilopwana a oYuda, attharihaka imusisaya, aahaathanla asitokweene a anakhotto macira muloko ni a ncira wa oYuda ni oBenyamini wootheene. Vano, aawaalikela asilopwana ootheene yaarino opwaha iyaakha miloko miili, ni aahoona weera yaari asilopwana 300 000 oolikaneene owana, oowera ovarela nivaka ni ixikudu*.

⁶ Aawiiwananatho anakhotto 100 000 ngwaalivani itonelada* tthaaru sa eparatha*.

⁷ Vanonto, mulopwana mmoha a Muluku aarowa wa yoowo, anamweerela: “Ii! Amwene, anakhotto ala a oYixrayeli ehirowe ni nyuwo, niwoko Yave khakhanle ni aYixrayeli; khakhanleru ni a muloko wa Efrayimi.

⁸ Naari murowaka ni ngwanaka oolipeene murima, Muluku onimoowinani ohoolo wa amwiittana, niwoko Owo onoowera owiniha ni ohiwiniha.”

⁹ Amaziya aamukoha mulopwana a Muluku: “Ankha itonelada* tthaaru iya kaalimvaaka anakhotto ala a oYixrayeli?” Owo aamwaakhula: “Yave onooweratho woovahani soowaata opwaha seiyo.”

¹⁰ Vano Amaziya aahaahokoloxa anakhotto a wEfrayimi. Awosa yaahaanyoonyerasiwa aYuda, enarowasa oosareyeene isara.

¹¹ Amaziya aalipihaxa murimaawe, anaarowano anakhottwaawe mpaka munreyareyani na Maakha, aawiivalaawewo anakhotto macira macireene muloko a oSeyiri.

¹² Aahaavaratho akina macira macireene muloko, aaronghalaawe vasuluxa mwaako, anaakakhela vathi, ni ootheene awo yaanyaanyeya.

¹³ Eyo eri hiho, anakhotto yaahokoloxiwe ni Amaziya ahaatthuniheraka orowa okhottoni, yaawanano isidade sa oYuda, okhuma oSamariya mpaka oBet-Horoni. Yaawiiva atthu macira miloko miraru, enakuxa soohuhula sincipale.

¹⁴ Amaziya aahokolowaawe owaahononani awEdomi, aaruuha miluku sa muloko wa oSeyiri, mwa seiyo aakhalihalaawe milukusawe, aakokhorela, anahisera erubani*.

¹⁵ Vano isara sa Yave saampattela Amaziya ni owo aamurumihela mprofeeti, aamweerenle mwene: “Munkoherelela heeni miluku sa muloko ola, mwa seiyo sihiwenre ovuluxa mulokwaaya xaxaxa?”

¹⁶ Vano owo uulumaka hiihaale, mwene aamukwituleliha: “Weeraka hiyo nohoothanlani okhala namalaka a mwene? Mmaale! Mmwiiveliweni?” Mprofeeti aamaala, mene aaheera: “Koosuwela weera Muluku oolakela ophwatiwawanyu, niwoko nyuwo moopaka sootheene iyo muhiiwelelaka olakawaka.”

oYixrayeli ongwina oYuda

¹⁷ Aakoherenreene anamalakaawe, Amaziya mwene a oYuda, aamurumihela anamitthenga Yehowaxi, mwaana mulopwana a Yehowahazi ni osuulu wa Yehu, mwene a oYixrayeli, ni mpikisaano ola: “Murwe mukiwanane.”

¹⁸ Wa soothesene, Yehowaxi aamwaakhula Amaziya: “Mwiri wa mwiiwa wa oLibanu waarumihela mutthenga mwiri wa esidari* ya oLibanu: ‘Munthelihe mwaninyu muthiyana ni mwanaka.’ Vaheera mwaamunama a ntuphi a oLibanu ohoorwa ananyikalasa mwiri wa mwiiwa.

¹⁹ Nyuwo mohiixeerela weera mohaawina awEdomi, ni vano muniikuxerera ngwiixoonani. Mene mwakhale owaani! Muntannyerela heeni erisa eneera yooheleeni nthala nyuwo ni oYuda?”

²⁰ Wa soothesene Amaziya khaatthunne omwiiwa, niwoko Muluku aatthuna weera amwinnyerere Amaziya ni mulokwaaweene wa Yehowaxi, niwoko yaatthara miruku sa miluku sa wEdomi.

²¹ Vano Yehowaxi, mwene a oYixrayeli, aangwanano. Owo ni Amaziya, mwene a oYuda, yaawana oBet-Xemexi, mulaponi ya oYuda.

²² aYuda yaawiniwa ni aYixrayeli, ni anakhottwaawe yaatthawela mmawannyaya.

²³ Yehowaxi aamvara Amaziya, mwaana mulopwana a Yowaxi ni osuulu wa Ahaziya oBeti-Xemexi. Vano Yehowaxi aamurongha oYerusaleemu, anakurumula exiri ya esidade, imeetru* ncira ni miloko mithannamiraru, okhuma mulako wa Efrayimi mpaka mulako wa vaNttuumbani.

²⁴ Owo aakuxa eyuuma yoorikaxa yootheene, eparatha* yootheene ni ikaruma sootheene saaphwanyiwe Mpaani mwa Muluku, saawehawehiwa ni Obedi-Edomi, mpakatho mihakhu sa empa ya emwene. Aahaakuxatho atthu akina akina ootthukiwa, anahokoleela oSamariya.

²⁵ Akhwiiyeene Yehowaxi, mwaana mulopwana a Yehowahazi, mwene a oYixrayeli, Amaziya mwaana mulopwana a Yehowaxi, mwene a oYuda, aakhalatho ni okumi iyaakha muloko niithanu.

²⁶ Sookhumelela sikina iyo sa moolamulani wa Amaziya, okhuma ompacereroni mpaka ommaleloni, silempwale mulivuruni sa nyaha sa mamwene a oYuda ni oYixrayeli.

²⁷ Okhuma ehuhu Amaziya aahiyalaawe omutthara Yave, yaamvaanelelasa oYerusaleemu, ni owo aatthawela oLakixi, mene yaamuttharelelasa, enamwiivelawo.

²⁸ Muttembwaawe waahokoloxiwe mukavaluni*, anavithiwa vamoha ni makholowaawe, musidadeni ya oYuda.