2 Nyaha 23 - Emakhuwa Bible

Ataliya omvariwa omwene

¹ Vayaakhani yanaathannapiili, Yehoyada aalipiha murimaawe, anawiiraanano ahooleli a mikuttula sa anakhotto ncira: Azariya, mwaana mulopwana a Yehowami, Yixmayeli, mwaana mulopwana a Yehonanani, Azariya, mwaana mulopwana a Obede, Maaseiya, mwaana mulopwana a Adaya, ni Elixafate, mwaana mulopwana a Zikeri.

² Awosa yaaviravira oYuda wootheene, enaathukumanyiha musidadeni sootheene aLeevi ni mapwattapwattha a imusi sa oYixrayeli. Ephiyaleene oYerusaleemu,

³ muthukumano wootheene waamwiiraanano mwene Mpaani mwa Muluku. Vano Yehoyada aaweerelasa: “Mwaana mulopwana a mwene onoolamula, ntoko aaroromelihalaawe Yave mwaha wa ekhapira ya Davide.

⁴ Nyuwosa mpakaseke ha: Mpattaanyu wanaararu wa nyuwosa asaserdoti* ni aLeevi eniivoloweke muteko nihuku na eSaabadu, owehaweheke mmilakoni sa Empa ya Yave,

⁵ mpatta wanaararu owehaweheke empa ya emwene, ni mpatta wanaararu mukinoowo owehaweheke Mulako wa Mathipelo; muloko wootheene mukina okhaleke mmapuwani a Empa ya Yave.

⁶ Ahikhaleru anaavolowe Mpaani mwa Yave ehikhanle asaserdoti* ni aLeevi eneera evolowe muteko; awosa evolowaseke niwoko aatteelihasiwa, vaheera asilopwana ootheene akina ewehexexeke yeeyo alamuleliwaaya ni Muluku.

⁷ aLeevi ethataaneke emurukureenreene mwene, ootheene awo evarenleene ikapwitthi. Akhalaru mutthu anaavolowe Mpaani mwa Yave, mmwiiveke. Munghooleke mwene wakhalaru aneeraawe arowe.”

Yowaxi omvariwa omwene

⁸ aLeevi ni asilopwana ootheene a oYuda yaapakasa ntoko aalamulenlaawe musaserdoti* Yehoyada. Khula mutthu aahaakuxa anakhottwaawe, okhuma yaawo yaavolowa mpaka yaawo yaakhuma, niwoko musaserdoti* Yehoyada khaatthunihenre opwaha wakhalaru mukuttula.

⁹ Vano owo aahaavaha ahooleli a mikuttula sa anakhotto ncira mavaka ni ixikudu* sitokweene mpakatho sikhaani saari sa mwene Davide ni saaritho Mpaani mwa Muluku.

¹⁰ Aahaathatasa anakhotto ootheene, khula nakhotto amvarenleene kapwitthi, emurukureenreene mwene, waattamela valtaarini* ni Mpaani mwa Yave, okhuma mpatta wa ohitto mpaka mpatta wa ottuttuwani wa Empa ya Yave.

¹¹ Yehoyada ni anamwanaawe asilopwana yaamukhumiha mwaana mulopwana a mwene, enangwarihasa ecireemba; yaamvaha ekaratta ya wiiraana, enamvara omwene, enamuttikitthela, ekhuwelaka: “Mwene woyee!”

Wiiviwa wa Ataliya

¹² Ataliya iiwaka onyakula wa muloko otthimakaka ni omutthapelaka mwene, aarowa Mpaani mwa Yave, mwemmo waaraayamo muloko.

¹³ Iwe owo aamoona mwene eemenleene vamulako vanrimbuni. Asitokweene ni anamwiipa mapalapatta yaari muxerexere wa mwene, ni muloko wootheene waahakalala ni waahiipa mapalapatta; anamwiipa ekuxaleene ikarumasaya sa icipo, yaahoolela icipo. Vano Ataliya aahaahula soowarasawe, anakhuwela: “Koovarihiwa! Koovarihiwa!”

¹⁴ Musaserdoti* Yehoyada aahaalamulela ahooleli a mikuttula sa anakhotto ncira yaahoolela anakhotto: “Munkhumihere vaate eriyari ya misera, ni ngwiive ni ekatana ootheene yaawo eneera emutthare.” Vano musaserdoti* aaheera: “Muhimwiivele Mpaani mwa Yave.”

¹⁵ Hiiho awosa yaamutthukasa, enamurongha vaMulako wa Ikavalu*, vaate wa empa ya emwene, enamwiivelawo.

¹⁶ Vano Yehoyada aahiiwananano owo, muloko ni mwene, weera yaamukhala muloko wa Yave.

¹⁷ Vano muloko wootheene waarowa mpaani mwa Bahali*, enakurumula. Yaahaapwexakasa altaari* ni miluku, enamwiiva Matani, musaserdoti* a Bahali*, ohoolo wa altaari*.

¹⁸ Yehoyada aahaavaha asaserdoti* aLeevi miteko sa Mpaani mwa Muluku, mwa yaawosa Davide aavanghaawe miteko Mpaani mwa Muluku. Mitekosaya saari ompakela Yave sooveleela soohisa, ntoko elempwalaaya munlamuloni na Moisesi, etthapaka ni yiipaka, ntoko Davide aalamulenlaawe.

¹⁹ Aawiikaathitho anamalipelela mmilakoni sa Empa ya Yave, weera ahivoloweru akhalaru mutthu eera ahitteele.

²⁰ Aahaakuxa ahooleli a mikuttula sa anakhotto ncira, maneethi, alamuli a muloko ni muloko wootheene, anamukuxa mwene Mpaani mwa Muluku, amuronghaka empa ya emwene. Aavolowa empa ya emwene vaMulako wa Osulu, enamukilaathiha vahiceni ya emwene;

²¹ ni muloko wootheene waahakalala. Ataliya iiviweene ni ekatana esidade yaamaaleleya.