2 Nyaha 21 - Emakhuwa Bible

Olamula wa Yehorami

¹ Akhwiiyeene Yehoxafati, yaamvithela musidadeni ya Davide, nikholonawe, ni aamurandenle vahiceniwawe ya emwene, ti mwaniye mulopwana Yehorami.

² Axunneiye Yehorami, mwaana mulopwana a Yehoxafati, yaari: Azariya, Yehiyeli, Zakariya, Azariyahu, Mikayeli ni Xefatiya. Ootheene ala yaari anamwane asilopwana a Yehoxafati, mwene a oYixrayeli.

³ Owo aahaavahasa soovaha sincipale sa eparatha*, eyuuma yoorikaxa ni itthu sooreerela, mpakatho isidade soolipihiwa sa oYuda. Vaheera omwene aamvanghe Yehorami, niwoko owo aari ntthaaranawe.

⁴ Woowaakuveya, Yehorami aahiitekiha vahiceni ya emwene ya atithawe, anawiiva ni ekatana axunneiye ootheene ni ahooleli akina akina a oYixrayeli.

⁵ Owo aapaceraawe olamula aarino iyaakha miloko miili ni piili sa oyariwawawe, analamula oYerusaleemu iyaakha ithannatthaaru.

⁶ Aahettela iphiro sa mamwene a oYixrayeli, ntoko yaapankaaya emusi ya Ahabi, niwoko aamuthenle mwaana a Ahabi. Aapaka ohinaakhulelaawe Yave.

⁷ Vanonto, Yave khaatthunne ophwata ekhapiraawe niwoko na wiiraana aapankaawe ni Davide. Owo aaroromeliha opwahereriha wa mahuku ootheene ekhapira ya Davide vahiceni ya emwene.

Ovaanya wa wEdomi

⁸ Mmahukuni a Yehorami, awEdomi yaawanawana ni omwene wa oYuda, emvaraka mwenaaya.

⁹ Tivawo Yerohami aarongwaawe owana vamoha ni ahoolelaawe ni ikaarosawe sootheene sa ekhotto. awEdomi yaamurica Yehorami ni asitokweene a ikaarosawe sa ekhotto, vaheera owo aahaawanano ohiyu, anaamwaraxa amwiittana yaamurince.

¹⁰ Mpaka olelo va awEdomi ampwaherera ootapuxeyeene mwa aYuda. Ehuhuweene yeeyo oLibena waawanawanatho, niwoko Yehorami aamuhiya Yave, Muluku a makholowaawe.

Ekaratta ya Eliya

¹¹ Owo aatekatho mapuro oolapa a mmattumuxani a oYuda, apakihaka weera muloko wa oYerusaleemu oraruwe, ni oYuda ohapuwe.

¹² Vano Yehorami aahaakhela ekaratta ya mprofeti Eliya, yeera: “Yave, Muluku a makholowaanyu, oneera ha: ‘Nyuwo khamweettenle iphiro sa atithinyu Yehoxafati, hata sa Asa, mwene a oYuda,

¹³ mene aani, mweettenle iphiro sa mamwene a oYixrayeli, mpakihaka weera Yuda ni muloko wa oYixrayeli oraruwe ni miluku soowootha ntoko emusi ya Ahabi yaapankaaya. Mpakatho moowiiva axunninyu xaxaxa, mipatta sa emusi ya atithinyu, yaari asilopwana ooreerela woopwahani nyuwo.

¹⁴ Tivawo Yave aneeraawe aavulalihe atthwaanyu moota woowoopiha – anamwaniinyu, axaarinyu ni sootheene siri sawinyu.

¹⁵ Nyuwo munoovoreyaxiwa; munookhalano ekwerere mmirimani eneera yootepeleni mpaka okhuma marupwaanyu.’”

¹⁶ Yave aatannyera weera emwiitte Yehorami aFilisti ni awArabiya yaakhala vakhiviru wa aKuxe.

¹⁷ Awosa yaawanano omwene wa oYuda, enavolowasa, enakuxa mihakhu sootheene yaaphwannyaaya vaate wa emwene, mpakatho axaariye ni anamwanaawe. Aahanle paahi Ahaziya, mwaana eetthaako.

Ekwerere ni okhwa wa Yehorami

¹⁸ Siviraleene sootheene iye, Yave aamutannyera eretta yoohilameya mmaruponi.

¹⁹ Eviraleene ehuhu ekina, ommaleloni wa eyaakha yanaaveeli, erettaawe yaatepaxa mpaka okhuma marupwaawe, ni owo aakhwiiye moovoreiwani woowoopiha. Mulokwaawe khawaapattingheru ecirangare yoomuttittimiherela, ntoko waapakelaaya makholowaaya.

²⁰ Yehorami aapaceraawe olamula, aarino iyaakha miloko miraru ni piili sa oyariwawawe, analamula oYerusaleemu iyaakha ithannatthaaru. Aakhwiiye ahikhalaka oomwiinlela, anavithiwa musidadeni ya Davide, mene khaavithiwe mmahiyeni mwa mamwene.