2 Nyaha 20 - Emakhuwa Bible

Ovoleeliwa wa muloko wa mpatta ninkhuma nsuwa

¹ Vahoolowaya, aMowabe ni awAmoni, vamoha ni aMewuni akina akina, yaahoorwa ongwanano Yehoxafati.

² Vano akina yaamuleela Yehoxafati: “Nakupa a anakhotto awEdomi onoorweelani nyuwo okhuma okhopela wa ephareiya. Ori vanaano va oHazozoni-Tamari, eyo tiiyo wEni-Gedi.”

³ Ngwoovanimwawe Yehoxafati, aalakela omukoherera Yave, analamulela oYuda wootheene otthuka.

⁴ Vano waathukumana muloko, orweelaka musidadeni sootheene sa oYuda weera waasaase ekhavihero ya Yave.

Nivekelo ni owina wa Yehoxafati

⁵ Yehoxafati aaheemela munthukumanoni wa oYuda ni oYerusaleemu, Mpaani mwa Yave, ohoolo wa nipuwa nnyowani,

⁶ anavekela: “Ii! Yave, Muluku a makholowaahu, ti Nyuwo Muluku muri wiirimu. Nyuwo munlamula omwene wootheene wa mulaponi. Ikuru ni owera ori mmatatanimwanyu, ni khaawo ongwera woowananani.

⁷ Nyuwo ti Mulukwaahu ngwoomonle amaki a elapo ela ohoolo wa aYixrayeli, mulokwaanyu, munavaha wa mahuku ootheene ekhapira ya nthamwenaanyu Abrahaamu.

⁸ Awosa aamakamo, enatekamo Nipuro Nootteela*, ettittimiherelaka Nsinananyu, yeeraka:

⁹ ‘Yaniphwanya yakhalaru erisa – okhalaka ottaruxeliwa, ekatana, naari nihooxo, hata etala, hiyo nnookhala vamaithoniwanyu ohoolo wa Empa ya Yave ela, niwoko ela enkuxa Nsinananyu, ni nnimookhuwelelani mmakacamihonimwahu, ni Nyuwo munooniiwa ni munoonivuluxa.’

¹⁰ Vaheera vano, ari vawo awAmoni, aMowabe ni amaki a mmanyaakoni sa oSeyiri, mwa yaawosa ilaposaya, khamwaatthunihenre aYixrayeli ohuhulamo, yaakhumaaya wExipitu; tivawo, aYixrayeli yaahapuwansaaya ni khayaaphwatanse.

¹¹ Vano ngwoone moota annirukunuwelaaya, erwaaka onoomola mulaponi munivanghaanyu ntoko yoohiyeriwa.

¹² Ii! Mulukwaahu, Nyuwo khamwaathoriha? Hiyo khaninono ikuru soowaawanano anakhotto ancipale ala anrwa oniwanano. Khanisuwenle yooweera, mene maithwaahu anoowehani Nyuwo.”

¹³ Asilopwana ootheene a oYuda, vamoha ni axaaraya ni anamwanaaya, mpaka a mmatatani yaari vale yeemelelo ohoolo wa Yave.

¹⁴ Vano Munepa wa Yave, waamukhuruwela Yahaziyeli, mwaana mulopwana a Zakariya, mwaana mulopwana a Benaya, mwaana mulopwana a Yehiyeli, mwaana mulopwana a Matatiya, muLeevi ni a ekhapira ya Asafi, owo eera eemenleene eriyari ya muthukumano.

¹⁵ Owo aaheera: “Ngwiriyane ootheene munkhala oYuda ni oYerusaleemu vamohatho ni mwene Yehoxafati! Yave ongweerelani ha: ‘Muhoove hata muhiporore mwaha wa anakhotto ancipale ala. Vano, khamuhiyono nyuwo muneera ngwane, mene ti Muluku.

¹⁶ Omaalo mukhuruwe mwaarowelasaka. Awosa eniirweele ekhato ya oZizi, ni nyuwosa mwaakumaneno ekotenlaayawo ekhato, ohoolo wa nikare na oYeruweli.

¹⁷ Nyuwosa khoontthuneya owana ekhotto ela. Mukhaleke mmapuronimwanyu, mpwaherere oolipeene ni moone ntapuxo onoovahaaweni Yave, ii! Yuda ni Yerusaleemu. Muhoove hata muhiporore. Mvenyase weera mwaawanane omaalo, ni Yave onookhala ni nyuwosa.’”

¹⁸ Yehoxafati aakokhora, anuuramihela ekhove vathi, ni muloko wootheene wa oYuda ni oYerusaleemu, waakokhora omulapaka Yave.

¹⁹ Vano, aLeevi akina akina a ekhapira ya aKohati ni aKorahi yaaheemela, enamvuwiha Yave, Muluku a aYixrayeli, ekhuwelaxaka.

²⁰ Oyaaka ni oxa yaattimula, erowaka onikareni na oTekowa. Yaavenyaaya, Yehoxafati aaweerelasa: “Mukiiwe Yuda ni muloko wa oYerusaleemu! Munroromele Yave, Mulukwaanyu, ni nyuwosa munoolipihiwa; mwaaroromele maprofeeti a Yave ni munoowina.”

²¹ Yehoxafati akoherenreene muloko, aahaathanla asilopwana akina akina weera emwiipele Yave ni emvuwihe ngwaarani wa otteelawawe, erowaka ohoolo wa anakhotto, yiipaka: “Muntthapele Yave, niwoko osivelawawe khoommala.”

²² Epacenreene wiipa icipo soovuwiha, Yave aahaareherera anakhotto weera yaawanane anakhotto a wAmoni, oMowabe ni a mmanyaakoni sa oSeyiri yaahaavoleela oYuda, ni awosa yaawinasiwa.

²³ awAmoni ni aMowabe yaahaawanano yaawo yaari a mmanyaakoni sa oSeyiri weera yaaphwatase. Yaahononneene anakhotto a oSeyiri, yaawanasa, enaphwatanasa.

²⁴ Anakhotto a oYuda yaarongwaaya vanipuroni nnooneyaayawo nikare, ewoonakaru anakhotto ancipale, yoonne paahi mittembo sireene vathi; khaawo oopongweru.

²⁵ Vano Yehoxafati vamoha ni anakhottwaawe yaarowasa ohuhula mittembo, enaphwanyasa eriyari ya seiyo ikapwitthi sincipale ni soowara, mpakatho itthu sooreerela. Yaaviriha mahuku mararu ehuhulaka, mene saahaattaxa mpaka ohiwera okuxa.

²⁶ Vanihukuni nanaaxexe, awosa yaathukumana vanreyareyani na oBeraka, yaamvuwihalaayawo Yave. Tivawo mpaka olelo nreyareya nno nniitthaniwaaya Beraka.

²⁷ Vahoolowaya, ehooleliwaka ni Yehoxafati, anakhotto ootheene a oYuda ni a oYerusaleemu yaahokoleelasa oYerualeemu ni ohakalala, niwoko Yave aahaaweriha ohakalalela waawina amwiittanaaya.

²⁸ Yaavolowasa oYerusaleemu, enarowasa Mpaani mwa Yave, erumaka amakita, makita a ifiiyu ni mapalapatta.

²⁹ Esuwenleene moota Yave aawanannaawe amwiittana a oYixrayeli, woopiha wa Yave waasareya mmilokoni sootheene.

³⁰ Omwene wa Yehoxafati waakhala mmuretteleni, niwoko Mulukwaawe, aamvaha murettele mmwiinanonimwaya moothemwene.

Ommaleloni wa olamula wa Yehoxafati

³¹ Hiiho Yehoxafati aalamula oYuda. Aapaceraawe olamula, aarino iyaakha miloko miraru niithanu, analamula oYerusaleemu iyaakha miloko miili niithanu. Amayawe yiitthaniwa Azuba, mwaana muthiyana a Xilehi.

³² Owo aaheettela iphiro sa Asa, atithawe, ni khaahingyeru; aapaka onaakhulelaawe Yave.

³³ Wa soothesene, khaamalinghe mapuro oolapa a mmattumuxani, ni muloko weera ohinaaye omvarexexa ni nthiti Muluku a makholowaaya.

³⁴ Sookhumelela sikina iyo sa olamula wa Yehoxafati, okhuma ompacereroni mpaka ommaleloni, silempwale mulivuruni sa nyaha sa Yehu, mwaana mulopwana a Hanani, ni sitakanseriwe mulivuruni sa nyaha sa mamwene a oYixrayeli.

³⁵ Eviraleene ehuhu ekina, Yehoxafati, mwene a oYuda, aamwiiraanano Ahaziya, mwene a oYixrayeli, mwa yoowo aarino mweettelo woonanara.

³⁶ Aamwiiraanano weera yapake makula matokotoko a nakoso. Yaapakeliwa omuxeloni wa wEziyoni-Geberi.

³⁷ Vano Eliyezeri, mwaana mulopwana a Dodavahu mMarexa aamuthaliherela Yehoxafati otthuna wa Muluku, amweerelaka: “Mweenre mmwiiraanano Ahaziya, Yave onoophwata mpankaanyu.” Vekhaikhai makula matokotoko yaaphwateya ni khayaawenre orowa ompaka nakoso.