2 Nyaha 2 - Emakhuwa Bible

Orehereriwa wa otekiwa wa Empa ya Muluku

¹ Salomoni aalamulela otekiwa Empa ya Muluku, nittittimihereliwaka Nsina na Yave nitho empa ya emwene.

² Owo aahaathanla asilopwana 70 000 ntoko anamateexa, 80 000 ntoko anamapwexa a maluku mmattumuxani, ni anamawehaweha a muteko 3 600.

Wiiraana ni Hurami

³ Vahoolowaya, Salomoni aamurumihela Hirami, mwene a oTiro, mutthenga ola: “Mukirumihele nyiri sa esidari* ntoko mwaapakenlaanyu atithaka Davide, awo yaatekaaya empaaya ya emwene.

⁴ Kihanle vakhaani oteka Empa ya Muluku, kittittimiherelaka Nsina na Yave, Mulukwaaka. Kintthuna omutteelihera Yoowo, weera ehiseriwemo erubani* yoowunkhelaxa ohoolowawe, yooniheriwe woohihiyerera epaawu yootteeliheriwa, ni sipakiwe sooveleela soohisa khula oxeexelo ni oxekuwa, muSaabaduni, mfestani sa nyeeri sinyowani ni mfestani soothanliwa sa Yave, Mulukwaahu. Ela ti ekano yoohimala wa aYixrayeli.

⁵ Empa ya Muluku kineeraaka kiteke, enimunnuwa, niwoko Mulukwaahu ti Mutokweene opwaha miluku sikina sootheene.

⁶ Vaheera, taani ongwera omutekela Empa, seenre irimu sihiweraka omukotiha, hata irimu soorakamelaxa? Vano, Miyo taani oomutekela Empa, ohikhanle paahi nipuru noohisera sooveleela ohoolowawe.

⁷ Tivawo, mukirumihele mulopwana ophwanenle ovara muteko ni eyuuma yoorikaxa, eparatha*, ebronze*, eyuuma, ni ekuwo yookankela, yooxeera, yakanka, ni onsuwela opatthapattha, weera avare muteko oYuda ni oYerusaleemu, vamoha ni arattaaka ooweraxa, yaarehereriwe ni atithaka Davide.

⁸ Mukirumiheletho oLebanoni itthaabwa sa esidari*, epinyeiru* ni yuniperu*, niwoko miyo koosuwela weera arumeiyaanyu ti ooweraxa othikila itthaabwa sa weiwo. Arumeiyaaka eniivareke muteko vamoha ni yaawosa,

⁹ weera ekivahase itthaabwa sincipale, niwoko ontthuneya weera Empa ya Muluku kineeraaka kiteke, ekhale etokotoko ni yootikhiniheyaxa.

¹⁰ Vano miyo kinimwaavaha yooca arumeiyaanyu anakhuuni, itonelade* 3 600 sa etrigu, itonelade* 3 600 sa esevada*, iliitru* 440 000 sa eviinyu ni iliitru* 440 000 sa makhura.”

¹¹ Hirami, mwene a oTiro, aamwaakhula Salomoni mukarattani: “Yave onnasivela mulokwaawe, tivawo ookhalihalaaweni mwenaaya.”

¹² Owo aahaandyeereratho: “Attottopeliwe Yave, Muluku a oYixrayeli, opanke erimu ni vathi, niwoko oomvaha mwene Davide mwaana mulopwana a miruku, oowuupuwela nnene ni a iseru, mwa yoowo aneera amutekele Yave Empa ni iitekele empa ya emwene.

¹³ Kinoorumihelani Hurami-Abi, mulopwana oorattaxa.

¹⁴ Amayawe yaari a oDani, ni atithawe a oTiro. Owo ooxuttihiwa ovara muteko ni eyuuma yoorikaxa, eparatha*, ebronze*, maluku ni itthaabwa, ni ekuwo yookankela, yakanka, yooxeera, nliinya nootteettheya ni moota wootheene wa ocaambula. Owo onoowera ovara wakhalaru muteko wa opatthapattha aneeraawe avahiwe. Anaavareke muteko vamoha ni aneettotthwaanyu ni a apwiyaaka, Davide, atithinyu.

¹⁵ Vano apwiyaaka, mwaarumihele arumeiyaanyu etrigu, esevada*, makhura ni eviinyu mwa yeeyo apwiyaaka muroromelinghaanyu,

¹⁶ ni ninoothikila itthaabwa sootheene sa oLebanoni, mwa seiyo sintthuneya, nirumihaka sootthukeleliwa siviraka mphareiya siphambaka, wookela oYafa. Mwakuxekewo muronghaka oYerusaleemu.”

¹⁷ Salomoni aampaka namalepela a anamarwa ootheene yaakhala oYixrayeli, ntoko yaapankaaya atithawe; waahooneleleya weera yaari atthu 153 600.

¹⁸ Owo aahaathanla 70 000 a yaawo ntoko anamateexa, 80 000 ntoko anamapwexa a maluku mmattumuxani, ni anamawehaweha a muteko 3 600 weera eweheke muloko ovaraka muteko.