2 Nyaha 17 - Emakhuwa Bible

Olamula wa Yehoxafati

¹ Aamurandenle ti Yehoxafati, mwaana mulopwana a Asa, aniilipihera waawanano aYixrayeli.

² Aawiikaathi anakhotto musidadeni soolipihiwa sootheene sa oYuda, anamuhelamo nakupa a anamalipelela, mpakatho isidade sa wEfrayimi yaawinnaaya atithawe.

³ Yave aari ni Yehoxafati, niwoko owo aakhalano mweettelo ntoko aaraaweno Davide ompacereroni. Khaakoherenre aBahali*,

⁴ mene aamwaasa Muluku a atithawe, aniiwelela malamulowaawe, ahitakihaka ipakelo sa aYixrayeli.

⁵ Yave aalipiha omwene wa Yehoxafati, ni aYuda ootheene yannamuruuhela soovaha, moota wooweera aakhalano mihakhu sincipale ni nttittimiho ntokotoko.

⁶ Munthitini, aaheettela iphiro sa Yave; ohiya yeeyo, aahaavenxa oYuda altaari* a miluku soowootha ni nyiri soothipeleliwa sa Axera.

⁷ Vayaakhani yanaararu ya olamulawawe, aahaarumiha asitokweene – Beni-Hayili, Obadiya, Zakariya, Netanayeli ni Mikaya weera yahusihe musidadeni sa oYuda.

⁸ Yaahaarowano aLeevi akina akina – Xemaya, Netaniya, Zebadiya, Asaheli, Xemiramote, Yehonatani, Adoniya, Tobiya, Tobe-Adoniya ni asaserdoti* Elixama ni Yehorami.

⁹ Awosa yaaviravira isidade sootheene sa omwene wa oYuda, ekuxaleene elivuru ya Nlamulo na Yave ni exuttihaka muloko.

¹⁰ Woopiha wa Yave waamorela omwene wootheene waarukureenre oYuda, moota wooweera khayaavolongwe mukhottoni weera engwanane Yehoxafati.

¹¹ aFilisti akina akina, yaamuronghela soovaha Yehoxafati, ohiya eparatha* yaamvanghaaya ntoko mucaango, ni awArabiya yaamuronghela mihuwo – anapunci a ikhondoolo 7 700 ni anapuncitho a ipuri 7 700.

¹² Yehoxafati annathatuwa ooweraxa; aateka moolipamo ni isidade saarino soothokorora sooca oYuda,

¹³ aathokororaawemo yooca yoowaattaxa. Aakhalanotho oYerusaleemu anakhotto ooxuttihiweene owana.

¹⁴ Yaakawiwe, ettharihiwaka emusi emusi moota ola: a oYuda, ahooleli a anakhotto macira muloko: Muhooleli Adena, areeneno anakhotto 300 000;

¹⁵ woottharelana, muhooleli Yehohanani, areeneno anakhotto 280 000;

¹⁶ vahoolowaya, Amasiya, mwaana mulopwana a Zikeri, iixinnyerenre ni otthuna omvarela muteko Yave, areeneno anakhotto 200 000.

¹⁷ A Benyamini: Eliyada, nakhotto ooweraxa, areeneno anakhotto 200 000, ekuxaleene nyuura ni ixikudu*;

¹⁸ woottharelana Yehozabade, areeneno anakhotto 180 000, oolikaneene owana.

¹⁹ Alasa yaari asilopwana yaamurumeela mwene, waahiya yaari musidade soolipihiwa oYuda wootheene.