2 Nyaha 12 - Emakhuwa Bible

wExipitu ongwanano oYixrayeli

¹ Rehobowami iitekihaleene ni iilipihenreene ntoko mwene, owo ni aYixrayeli ootheene yaahiya Nlamulo na Yave.

² Vayaakhani yanaathanu ya olamula wa Rehobowami, Xixake, mwene a wExipitu, aawanano oYerusaleemu niwoko aYixrayeli khayaamuroromenle Yave.

³ Akuxaleene ikaaro sa ekhotto 1 200, anamweettiha a ikavalu* 60 000 ni anakhotto oohaalikeleya a aLibiya, aSukiti ni awEtiyopiya yaarweela wExipitu vamoha ni yoowo,

⁴ aawina isidade soolipihiwa sa oYuda, anaphiya mpaka oYerusaleemu.

⁵ Vano, mprofeeti Xemaya, aahiixoonihera wa Rehobowami ni wa ahooleli a oYuda yaathukumanne oYerusaleemu, emoovaka Xixake, anaweerelasa: “Yave oneera ha: ‘Nyuwosa mookihiya; tivawo Miyo kinoohiyaakani, kiwinnyererakani wa Xixake.’”

⁶ Ahooleli a oYixrayeli ni mwene yaahiiyevihasa eneera: “Yave ti oororomeleya.”

⁷ Yave oonaka weera awosa ahiiyevihasa, aamweerela Xemaya: “Yeenre awosa yiiyevihasa, nkaaphwatasa, mene kinimwaatapuxa woowaakuveya. Isarasaka khasiyeehereya oYerusaleemu mwa Xixake.

⁸ Wa soothesene, awosa eniilamuliweke ni yoowo weera exuttere ohiyanawaya eriyari ya okirumeela Miyo ni waarumeela mamwene a ilapo sikina.”

⁹ Xixake mwene a wExipitu, aawananaawe oYerusaleemu, aakuxa mihakhu sootheene sa Mpaani mwa Yave ni sa empa ya emwene, vamoha ni ixikudu* sa eyuuma yoorikaxa aapankaawe Salomoni.

¹⁰ Tivawo mwene Rehobowami aalamulenlaawe opakiwa ixikudu* sa ebronze* weera alivanyihe, anawinnyerera asitokweene a anamalipelela a empa ya emwene.

¹¹ Imaara sootheene mwene aarowaawe Mpaani mwa Muluku, anamalipelela yannamuhoola ekuxaleene ixikudu*, ni vahoolowaya yaahokoloxera vasaala ya anamalipelela.

¹² Eenre Rehobowami iiyeviha, isara sa Yave saasusa wa yoowo ni owo khaaphwatiwe woomalela. Vekhaikhai oYuda nlelo yaakhala etthu yooreera.

¹³ Mwene Rehobowami aahiilipihera moolamulani oYerusaleemu, anapwaherera olamula. Aapaceraawe olamula, aarino iyaakha miloko mixexe niimoha sa oyariwawawe, analamula oYerusaleemu iyaakha muloko niithannapiili, esidade aathanlalaawe Yave eriyari ya ipuumba sa oYixrayeli weera akhalihemo Nsinanawe. Amayawe yaari ngwAmoni, yiitthaniwa Naama.

¹⁴ Owo aapaka yoonanara, niwoko murimaawe khawaamvarexexa Yave.

¹⁵ Sookhumelela sikina iyo sa olamula wa Rehobowami, okhuma ompacereroni mpaka ommaleloni, silempwale mulivuruni sa nyaha sa mprofeeti Xemaya, ni namoonihera* Ido onreherera ilivuru sa ikhapira. Ehuhu yootheene yaakhala ekhotto eriyari ya Rehobowami ni Yerobowami.

¹⁶ Rehobowami aahookhwa, anavithiwa vamoha ni makholowaawe musidadeni ya Davide. Vano namarandelaawe aari mwaniye mulopwana Abiya.