2 Mamwene 9 - Emakhuwa Bible

Yehu omvariwa omwene

¹ Eyo eri hiiho, mprofeeti Elixa aamwiitthana mmoha a nakupa a maprofeeti anamweerela: “Mphitelele mukaandyowaanyu, mukuxeke nipoottoro nna na makhura ni murowe oRamoti-Giliyadi.

² Mwaaphiyakawo, mwamwaasaase Yehu, mwaana mulopwana a Yehoxafati, mwaana mulopwana a Nimexi. Mwavolowe oraawemo ni mwammwalamwalihe ni asinkhwaawe munroihaka esaala ekina.

³ Vano mukuxe nipoottoro ni mwammiinele makhura mmurumwawe mulaleiyaka: ‘Yave oneera ha: Kinoottikitthelani omwene wa oYixrayeli.’ Vahoolowaya, mwahule nsele ni mwatthawe woowaakuveya!”

⁴ Vano mmiravo mprofeeti ole aarowa oRamoti-Giliyadi.

⁵ Aphiyakawo, aahaaphwanya asitokweene a anakhotto ethukumanneene. Owo aaweerela: “Kohooruuhelani mutthenga atokweene.” Yehu aamukoha: “Wa taani?” Owo aamwaakhula: Wa nyuwo, atokweene.”

⁶ Yehu aavenya, anavolowa mpaani. Vano mprofeeti aammiinela makhura mmurumwawe Yehu, anamweerela: “Yave, Muluku a oYixrayeli oneera ha: ‘Kinoottikitthelani omwene wa aYixrayeli, muloko wa Yave.

⁷ Munoophwata ekhapira ya Ahabi, pwiiyaanyu ni kinimwiinlela ikukuttula ephome ya arumeiyaaka maprofeeti ni ya arumeiyi ootheene a Yave eyeehiwe ni Yezebeli.

⁸ Ekhapira yootheene ya Ahabi enoophwatiwa, kaamalihaka asilopwana ootheene a emusi ya Ahabi oYixrayeli – ekhalaka epottha hoye hoye neethi.

⁹ Kinoopakela ekhapira ya Ahabi yeeyo kaapakenlaaka ekhapira ya Yerobowami, mwaana mulopwana a Nebati ni ya Bahaxa, mwaana mulopwana a Ahiya.

¹⁰ Mwaha wa Yezebeli, alapwa anoomukhuura mweelaponi mwa oYizereyeli ni khawowo aneera amuvithe.’” Ahimakaru yeeyo, aahula nsele, anatthimaka.

¹¹ Yehu ahokoleelaka yaaraayawo asitokweene akina a mwene, mmoha a yaale aamukoha: “Salaama?” Naaneepa owo oohaawelelani eheeni? Yehu aamwaakhula: “Nyuwosa mohaasuwela atthu awo ni seiyo anghimaaya.”

¹² Awosa yaanyesera emweerelaka: “Wootha nyuwo! Munileele!” Yehu aawaakhula: “Owo ookileela: ‘Yave oneera ha: Kinoottikitthelani omwene wa aYixrayeli!’”

¹³ Awosa woowaakuveya yaakuxasa mikaandyosaya, enaatala vathiwawe muxikadani. Vano yaahiipa nipalapatta ekhuwelaka: “Yehu ti mwene!”

Okhwa wa Yorami

¹⁴ Vano Yehu, mwaana mulopwana a Yehoxafati, mwaana mulopwana a Nimexi, aapacera omvaanelela mwene Yorami. Ehuhuweene yeele, Yorami ni anakhotto ootheene a aYixrayeli yeera yiixaakihaka oRamoti-Giliyadi wa Hazayeli, mwene a awArami.

¹⁵ Vaheera mwene Yorami aahokoleela oYizereyeli weera avolihe makhwatta aavulanlaawe mukhottoni angwananaka Hazayeli, mwene a awArami. Yehu aaweerela: “Mwatthuna weera kivariwe omwene, ahikhale muneeraanyu muntthunihere okhuma musidade weera athalihere ihaali iya oYezereyeli.”

¹⁶ Vano aawela ikaarosawe sa ikavalu*, anarowa oYezereyeli niwoko Yorami aari weiwo awehereraka ovola makhwatta. Ahaziya, mwene a oYuda aarowawo omuxekura.

¹⁷ Namalipelela eemenleene vatooreni* oYezereyeli oonakaru weera anakhotto a Yehu yannakhuveela, aahiitthana: “Kiniwoona anakhotto akina yaattamelaka!” Yorami aamweerela: “Omurumihe namweettiha a ekavalu* weera aakumaneno aakohaka: ‘Munrwa mmuretteleni?’”

¹⁸ Namweettiha a ekavalu* aarowa omukumanano Yehu, anamukoha: “Mwene onkoha ha: ‘Munrwa mmuretteleni?’” Yehu aamwaakhula: Ohuulume sa murettele! Okitthare!” Namalipelela aahima: “Namutthenga oophiyawo, mene khanaaye ohokolowa.”

¹⁹ Vano mwene aamurumiha namweettiha a ekavalu* anaaveeli. Owo amphwanyakaru Yehu, aamukoha: “Mwene onkoha ha: ‘Munrwa mmuretteleni?’” Yehu aamwaakhula: “Ohuulume sa murettele! Okitthare!”

²⁰ Namalipelela aahima: “Namutthenga oophiyawo, mene khanaaye ohokolowa. Ekhalelo ya mutokweene a anakhotto ni meettiherowaawe ekaaro onkhala ntoko Yehu, mwaana mulopwana a Nimexi. Oneettiha ntoko naanepa!”

²¹ Yorami aalamula: “Mureherere ekaarowaaka ya ikavalu*.” Ekaaro erehereriweene, Yorami, mwene a oYixrayeli, ni Ahaziya, mwene a oYuda, yaavenyasa, khula mutthu mukaaronimwawe weera yamukumaneno Yehu. Yaamphwanya mmatta khalayi yaari ya Naboti, muYizereyeli.

²² Yorami amoonakaru Yehu, aamukoha: “Yehu, munrwa mmuretteleni?” Yehu aamwaakhula: “Khoonkhala murettele amayinyu Yezebeli epwahereraka olapa miluku sikina ni soopakasaya sa okhwiri.”

²³ Yorami aarukunuwa, anatthawa amukhuwelelaka Ahaziya: “Ahaziya nna ntapha!”

²⁴ Vano Yehu aalatha muupaawe iilipihaka, anamulatha Yorami ottuli, muupa ohomaka murima mpaka ophutula, anakhwa.

²⁵ Yehu aamweerela Bidekari, namakhaviheraawe mukaaroni: “Ovonyere muttembo mmattamu yaari ya Naboti, muYizereyeli. Wuupuwelele moota Yave aanooperenraawe uulumaka sa atithawe Ahabi naamuhoonlaahu munkuttulanimwawe.

²⁶ Ehuhuweene yeele Yave aaheera: ‘Osilo kohoona ephome ya Naboti ni ya anamwanaawe asilopwana. Vekhaikhai kinimoottaruxela yeeyo ematteene yeela, oneera Yave.’ Vano ovonyere muttembo mmattamu, ntoko Yave aahimmaawe.”

Okhwa wa Ahaziya, mwene a oYuda

²⁷ Ahaziya, mwene a oYuda oonaka yeeyo, aatthawela oBeti-Hagani. Yehu aamuttharelela akhuwelaka: “Mmwiivetho!” Yaamvulaliha mukaaronimwawe owo arowaka oGuri, vakhiviru wa oYibleyami, mene aatthawela oMegidu, anakhwelawo.

²⁸ Arumeiyaawe yaamurongha oYerusaleemu, enamvitha vamoha ni makholowaawe munihiyenimwawe musidadeni ya Davide.

²⁹ Ahaziya, aathatuwa mwene vayaakhani yanaamuloko nimmoha moolamulani mwa Yorami, mwaana mulopwana a Ahabi.

Okhwa wa Yezebeli

³⁰ Vano Yehu aarowa oYizereyeli. Yezebeli iiwakaru yeeyo, aahiihinga makwikhwi, anareherera mayihaawe anathurumela vaxanelani ya empa ya emwene.

³¹ Yehu avolowaka vamulako, Yezebeli aamukoha: “Zimeri, munrwa mmuretteleni, namwiiva a pwiiyaanyu?”

³² Yehu aaweha vaxanelani, anakhuwela: “Taani a nyuwo ori a mpattaaka?” Eeli hoye hoye araru a inoko* yaangweha.

³³ Yehu aaweerela: “Mummoroxele muthiyana owo vathi!” Vano awosa yaammoroxela Yezebeli vathi ni ephomaawe yaattonyera muxirini ni mwaakavaluni* ni Yehu aamukakathula.

³⁴ Yehu aavolowa, anaca anawura. Aalamula: “Munkuxe muthiyana oolaphiwa owo mwamvithe, eenre akhala mwaana muthiyana a mwene.”

³⁵ Vaheera yaakhummaaya erowaka omuvitha, yaaphwannye paahi nikarakasa, matata, ni inaawo.

³⁶ Yaahokolowa, enamuthalihera yeeyo Yehu ni owo aaheera: “Yeeyo yeereiye niwoko na masu Yave aahimmaawe mwa murumeiyaawe, Eliya, muTixebeti: Mweelaponi ya oYizereyeli alapwa anookhuura erutthu ya Yezebeli.

³⁷ Ihalahala sa erutthwaawe sinoomwaraxeliwa oYizereyeli ntoko mahiloka mutuphini moota wooweera khawowo anaawere weera: ‘Ola ti Yezebeli.’ ”