2 Mamwene 24 - Emakhuwa Bible

oYuda ongwiniwa ni amwiittanaaya

¹ Moolamulani mwa Yehoyakini, Nebukadenezari, mwene a oBabiloniya, aakuxa elapo ya oYuda ni Yehoyakini aathatuwa oolamuliwa ni yoowo wa iyaakha tthaaru. Simanleene iyaakha tthaaru, Yehoyakini aaceendya soowuupuwelasawe, anamuvaanelela Nebukadenezari.

² Yave aamurumihela Yehoyakini nakhotto a oBabiloniya, wArami, oMowabe ni wAmoni weera yahuhule oYuda. Aahaarumiha weera ephwate oYuda, ntoko Yave aahimmaawe mwa arumeiyaawe maprofeeti.

³ Iye seereenle oYuda ntoko aalamulenlaawe Yave eerelaka waasusiha ohoolowawe niwoko na soottheka sootheene aapankaawe Manaxe.

⁴ Owo aawiiva atthu oohinthowa, asarihaka oYerusaleemu ephome yoohinthowa ni Yave khaatthunne omulevelela.

⁵ Vano, mwaha wa sookhumelela sikina sa olamula wa Yehoyakini ni sootheene aapankaawe – oolempwale mulivuruni ya nyaha sa mamwene a oYuda.

⁶ Yehoyakimi aahookhwa ni mwanawe mulopwana Yehoyakini ti aamurandenle.

⁷ Mwene a wExipitu khanakhumetho mweelaponimwawe ni anakhottwaawe, niwoko mwene a oBabiloniya aakuxa ilaposawe sootheene, okhuma Nxaapwa na wExipitu mpaka mooloko Efratesi.

Olamula ni otthukiwa wa Yehoyakini

⁸ Yehoyakini, apaceraka olamula aarino iyaakha muloko niithannatthaaru, analamula oYerusaleemu nyeeri miraru. Amayawe yiitthaniwa Nehuxeta, mwaana muthiyana a Elinatani a oYerusaleemu.

⁹ Aapaka soonanara vamaithoni wa Yave ntoko yaapankaaya atithawe.

¹⁰ Ehuhuweene yeele, anakhotto a Nebukadenezari, mwene a oBabiloniya, yaarowa mpaka oYerusaleemu, enaricawo,

¹¹ ni Nebukadenezari muneenaawe aaphiyawo, anakhottwaawe ericaka.

¹² Yehoyakini, amayawe, arumeiyaawe, maneethaawe ni asitokweenaawe ootheene yaahiixinnyerera wa Nebukadenezari. Vayaakhani yanaathannatthaaru ya olamula wa mwene a oBabiloniya, Nebukadenezari aakuxa oYerusaleemu, anamutthuka Yehoyakini.

Okuxiwa wa oYerusaleemu

¹³ Ntoko Yave aahimmaawe, Nebukadenezari aakuxa mihakhu sootheene sa Mpaani mwa Yave ni mpaani mwa emwene, apwexaka ikaruma sa eyuuma yoorikaxa sootheene Salomoni aapakenlaawe Empa ya Yave.

¹⁴ Aahaakuxa ntoko oovariwa amaki ancipale a oYerusaleemu – asitokweene ni anakhotto ootheene; anamaratta ni anamahana a eyuuma – wookwanaka atthu macira macireene muloko. Yaahanle paahi oohaawaxa.

¹⁵ Nebukadenezari aamukuxa Yehoyakini ntoko ootthukiwa amuronghaka oBabiloniya. Aahaakuxatho oYerusaleemu amayaya amwene, axaaraya, asitokweenaaya ni asilopwana oottittimiheyaxa a mulaponi.

¹⁶ Mwene a oBabiloniya aahaaronghatho anakhotto ootheene – wookwanaka macira miloko mithannamiili – oolikaneene owana ni oolipaxa, nitho anamaratta ni anamahana a eyuuma macira muloko.

¹⁷ Aamukhaliha Mataneya, atatawe Yowakimi, mwene a vanipuroniwawe, anaceendya nsinanawe amuttehaka Zedekiya.

Olamula wa Zedekiya oYuda

¹⁸ Zedekiya, apaceraka olamula aarino iyaakha miloko miili niimoha, analamula oYerusaleemu iyaakha muloko niimoha. Amayawe yiitthaniwa Hamutali, mwaana muthiyana a Yeremiya a oLibena.

¹⁹ Aapaka soonanara vamaithoni wa Yave, ntoko aapankaawe Yehoyakini.

²⁰ Sootheene iye seereiye oYerusaleemu ni oYuda niwoko na isara sa Yave ni ommaleloni, aawoomola vamaithoniwawe. Vano Zedekiya aamvaanya mwene a oBabiloniya.