2 Mamwene 21 - Emakhuwa Bible

Manaxe onlamula oYuda

¹ Manaxe apaceraka olamula aarino iyaakha muloko ni piili, analamula oYerusaleemu iyaakha miloko mithanu niithanu. Amayawe yaari Hefeziba.

² Aapaka yoonanara vamaithoni wa Yave attharaka mikhalelo sa mwiikho sa miloko, mwa seiye Yave oomonlaawe ohoolo wa aYixrayeli.

³ Aatekatho mattumuxa ootteeliheriwa miluku sikina atithawe Hizekiya yaaphwantaaya; aamutekela altaari* Bahali* ni nrimbu nooteeliheriwa Axera, ntoko Ahabi, mwene a oYixrayeli aapankaawe. Aakokhorela ithenyeeri sootheene sa wiirimu, analapa.

⁴ Aatekela miluku sikina altaari* Mpaani mwa Yave, mwa mwemmo Yave eenraawe: “Kinimwiikaathi Nsinanaka oYerusaleemu.”

⁵ Mmapuwani oomeeli a Empa ya Yave aatekelamo ithenyeeri sa wiirimu altaari*.

⁶ Aamuhisa mwanawe mulopwana; aapaka sa okhwiri ni ihako; aarowa wa anamadyiini ni atthu anuuluma ni minepa. Aapaka soonanara sincipale vamaithoni wa Yave atannyaka isarasawe.

⁷ Aakuxa nrimbu noohaneliwa Axera, aniikaathi Mpaani mwa Yave. Vano ti mwaha wa empeene yeele ni oYerusaleemu Muluku aamweerenlaawe Davide ni mwanawe Salomoni: “Variyari wa ipuumba sootheene sa oYixrayeli, kinookhaliha Nsinanaka wa mahuku ootheene Mpaanimu mwa Yave ni mwa oYerusaleemu.

⁸ aYixrayeli yakosoopa weera epake sootheene kaalamulenlaaka ni yiiwelela malamulowaaka ootheene murumeiyaaka Moisesi aavanghaawe, nkirwa kiwoomolatho mweelaponi kaavanghaaka makholowaaya.”

⁹ Wa soothesene, muloko khawiiwale. Manaxe aahuluxa muloko moota wooweera waapaka soonanara opwaha miloko Yave aaphwantaawe ohoolo wa aYixrayeli.

¹⁰ Yave aaheera mwa arumeiyaawe, maprofeeti:

¹¹ “Manaxe, mwene a oYuda, aapaka sootthekasene seiya sa mwiikho. Aatepaxa opaka waapwaha awAmori yaakhalawo owo ahinaaye ni aahaatthekihatho aYuda ni miluku sikina aapankaawe.

¹² Tivawo Yave Muluku a aYixrayeli oneeraawe ha: Kinooruuhela oYerusaleemu ni oYuda nihooxo moota wooweera ootheene eneera yiiwe sa seiyo anoottiyeya iphumu.

¹³ Kinoopakela oYerusaleemu mooteene yoowo kipakenlaaka oSamariya ni omwene wa Ahabi. Kinoopuputta oYerusaleemu ntoko empuputteliwaaya esasaani, enapopheiwa weera yuume.

¹⁴ Kinimwaahiya yaawo eniihalahale a yoohiyeraaka ni kinoowinnyerera amwiittanaaya. Amwiittanaaya ootheene animwaahuhula ni anoowiiyera sootheene,

¹⁵ niwoko aapaka soonanara vamaithoniwaka etannyaka isarasaka okhuma nihuku makholowaaya yaakhummaaya wExipitu mpaka olelo.”

¹⁶ Manaxe aayeehatho ephome yincipale yoohinthowa moota wooweera yaasareya oYerusaleemu wootheene. Ohiya yeeyo, aahaatthekiha aYuda aapakihaka soonanara vamaithoni wa Yave.

¹⁷ Vano, mwaha wa sookhumelela sikina sa olamula wa Manaxe ni soottheka aapankaawe – oolempwale mulivuruni ya nyaha sa mamwene a oYuda.

¹⁸ Manaxe aahookhwa, anavithiwa ni makholowaawe munttimbeni na empa ya emwene, munttimbeni na Uza. Mwanawe mulopwana, Amoni, ti aamurandenle.

Amoni onlamula oYuda

¹⁹ Amoni apaceraka olamula aarino iyaakha miloko miili ni piili, analamula oYerusaleemu iyaakha piili. Amayawe yaari Mexulemeti, mwaana muthiyana a Haruzi oYoteba.

²⁰ Aapaka yoonanara vamaithoni wa Yave, ntoko yaapankaaya atithawe Manaxe.

²¹ Aahaatakiha atithawe mwa sootheene; aalapa milukusene seiye atithawe yaalampaaya akokhorelaka ohoolowaya.

²² Aamuhiya Yave, Muluku a makholowaawe, ahittharaka ephiro ya Yave.

²³ Asitokweene a awAmoni yaamvaanelela, enamwiivela mpaanimwawe ya emwene.

²⁴ Vaheera muloko waawiiva ootheene yaamvaanelenle mwene Amoni, onamvara omwene mwanawe mulopwana Yosiya.

²⁵ Vano, mwaha wa sookhumelela sikina sa olamula wa Amoni ni sootheene aapankaawe – oolempwale mulivuruni ya nyaha sa mamwene a oYuda.

²⁶ Aavithiwa munihiyenimwawe munttimbeni na Uza. Mwanawe mulopwana, Yosiya, ti aamurandenle.