2 Mamwene 20 - Emakhuwa Bible

Eretta ya Hizekiya

¹ Ehuhuweene yeele Hizekiya aavoreiwa mpaka aahanle vakhaani okhwa. Mprofeeti Yesaya, mwaana mulopwana a Amozi, aarowa omuxekura, anamweerela: “Yave oneera ha: ‘mureherere itthusanyu niwoko munimookhwa; vekhaikhai khamulama.’”

² Hizekiya aahuluwela oxirini, anamvekela Yave:

³ “Ii! Yave, muupuwelele moota koorumeenlaakani ni ororomeleya ni murima wootheene. Koopaka yeeyo eri yooreera vamaithoniwanyu.” Ni Hizekiya aahiinla vancipalexa.

⁴ Yesaya ahinaaye opwaha vaate, Yave aamulamulela:

⁵ “Muhokolowe ni mwamuleele Hizekiya, muhooleli a mulokwaaka: ‘Yave, Muluku a atithinyu Davide oneera ha: Kohiiwa mavekelowaanyu ni kohoona maithoraanyu; kinimoolamihani. Eviraleene mahuku mararu munoorowa Mpaani mwa Yave.

⁶ Kinimwaandyeerera iyaakha muloko niithanu sa okumaanyu. Kinoowoopolani nyuwo ni esidade ela mmatatani mwa mwene a wAsiriya. Kinimwaakiha esidade ela mwa osivelawaka ni wa murumeiyaaka Davide.’ ”

⁷ Vano Yesaya aalamula: “Mureherere makhura a efiigu*. Yaapaka yeeyo, anahelawo vanamukoxoni, analama.”

⁸ Hizekiya aamukoha Yesaya: “Eneneero heeni eneera ekoonihere weera Yave onookilamiha ni weera eviraleene mahuku mararu kinoovolowa Mpaani mwa Yave?”

⁹ Yesaya aamwaakhula: “Eneneero eneera ewoonihereni weera Yave onookwanihera ohimalaawe ti ela: Muntthuna weera munttuusi wa nsuwa otuphele ohoolo hoye hoye ohokoleele ottuli?”

¹⁰ Hizekiya aamwaakhula: “Khoonrika munttuusi orowa ohoolo. Fataari ohokoleeleke ottuli.”

¹¹ Vano mprofeeti Yesaya aamvekela Yave, ni Yave aapakiha weera munttuusi ohokoleele ottuli ottharaka mwaakheriwe mmakweeleloni a Ahazi.

Anamitthenga a oBabiloniya

¹² Ehuhuweene yeele Merodaki-Baladani, mwaana mulopwana a Baladani, mwene a oBabiloniya aamurumihela Hizekiya ikaratta ni yoovaha niwoko aasuwela sa erettaawe.

¹³ Hizekiya aawaakhela anamitthenga, anawoonihera sootheene saari mmapuroni oolipelela – eparatha*, eyuuma yoorikaxa, itthu sootakansiwasa ni makhura ooreera – mpakatho ekwartu ya ikapwitthisawe ni mihakhusawe sootheene. Hizekiya aawoonihera sootheene saari mpaanimwawe ya emwene ni omwenaawe.

¹⁴ Vanonto mprofeeti Yesaya aarowa wa mwene Hizekiya, anamukoha: “Ahimaleni asilopwana awo yoorweenleni ni ankhuma woowi?” Hizekiya aamwaakhula: “Ankhumelela elapo yoorakamela ya oBabiloniya.”

¹⁵ Mprofeeti aamukoha: “Awosa yoonneni mpaanimwanyu ya emwene?” Hizekiya aamwaakhula: “Ahoona sootheene. Koowoonihera mihakhusaka sootheene.”

¹⁶ Vano Yesaya aamweerela Hizekiya: “Mwiiwe masu a Yave:

¹⁷ Muhoolommo sootheene sa mpaanimwanyu ni sa seiye makholowaanyu yaathokoronraaya mpaka olelo sinookuxiwa sironghiwaka oBabiloniya. Khasihalaru, oneera Yave.

¹⁸ Akina a ekhapiraanyu, emusaanyu xaxaxa, anookuxiwa ni anootatuxiwa inoko* mpaani mwa mwene a oBabiloniya.”

¹⁹ Hizekiya aamwaakhula: “Masu a Yave muthalinghaanyu aareera.” Owo uupuwela: “Fataari, onuukhale murettele ni olipihiwa mmahukunimwaka.”

²⁰ Vano, mwaha wa sookhumelela sikina sa olamula wa Hizekiya – sootheene aapankaawe ni moota aathimpaawe nratta ni yiikalaande yaaviraayamo maahi erowaka musidade – oolempwale mulivuruni ya nyaha sa mamwene a oYuda.

²¹ Hizekiya aahookhwa ni mwanawe mulopwana Manaxe ti aamurandenle.