2 Mamwene 18 - Emakhuwa Bible

Hizekiya onlamula oYuda

¹ Hizekiya, mwaana mulopwana a Ahazi, mwene a oYuda aavariwa omwene wa oYuda vayaakhani yanaararu ya olamula wa Hoxeya, mwaana mulopwana a Ela, mwene a oYixrayeli.

² Hizekiya apaceraka olamula aarino iyaakha miloko miili niithanu, analamula oYerusaleemu iyaakha miloko miili niithanniixexe. Nsina na amayawe naari Abiya, mwaana muthiyana a Zakariya.

³ Aapaka yeeyo eri yooreera vamaithoni wa Yave ntoko naapankaaya nikholonawe Davide.

⁴ Aaphwata mmattumuxani ootteeliheriwa miluku sikina, anapwexa nluku nootteeliheriwa, anaamoroxa amarimbu a Axera. Aahintakasa enowa ya ebronze* Moisesi aapankaawe niwoko mpaka ehuhuweene yeele aYixrayeli yannakhovelela ohiserawo erubani*. Vano enowa ele yiitthaniwa Nehuxitani.

⁵ Hizekiya aamuroromela Yave, Muluku a aYixrayeli. Mmamweneni a oYuda wootheene khawowo aamulikananne yoowo, okhuma khalayi mpaka vano.

⁶ Aamutthara Yave moota woororomeleya ahimuhiyaka. Aahiiwelela malamulo Yave aamuvanghaawe Moisesi.

⁷ Yave aari ni yoowo ni sootheene aapakaawe sannamweettela nnene. Aangwanano mwene a wAsiriya ahimurumeelakatho.

⁸ Aahaawina aFilisti okhuma itoore* sa anamalipelela mpaka isidade soolipihiwaxa – mpakatho oGaza ni elapwaaya.

⁹ Vayaakhani yanaaxexe ya olamula wa Hizekiya, eyo tiiyo vayaakhani yanaathannapiili ya olamula wa Hoxeya, mwaana mulopwana a Ela, mwene a oYixrayeli, Xalameneseri, mwene a wAsiriya, aarowa oSamariya, anarica.

¹⁰ Simalakaru iyaakha tthaaru, awAsiriya yaakuxa oSamariya. Hiiho oSamariya waakuxiwa vayaakhani yanaathannamosa ya olamula wa Hizekiya ni vayaakhani yanaathannaaxexe ya Hoxeya, mwene a oYixrayeli.

¹¹ Mwene a wAsiriya aahaavara aYixrayeli ancipale aaroihelaka Asiriya, anaatekiha oHala, elapo ya oGozani, mukerekhere mooloko Habori ni mmittettheni sa oMedesi.

¹² Eyo yeereenle niwoko aYixrayeli khayaamwiiwelenle Yave Mulukwaaya, mene yaaramusa wiiraanawawe – sootheene Moisesi, murumeiyi a Yave, aalamulenlaawe. Awo khayiiwale malamulo hata khayaakwanihenre.

Senakeribi omvolowa oYuda

¹³ Vayaakhani yanaamuloko niixexe ya olamula wa Hizekiya, Senakeribi, mwene a wAsiriya, aawanano isidade soolipihiwa sootheene sa oYuda, anakuxa.

¹⁴ Vano Hizekiya, mwene a oYuda, aamurumihela mwene a wAsiriya oLakixi mutthenga ola: “Kootapanya. Muhikiwanenotho ni miyo kinimoolivani yeeyo muneeraanyu mutthune.” Mwene a wAsiriya aamunyesereriha Hizekiya omuliva italentu* macira mararu sa eparatha* ni italentu* miloko miraru sa eyuuma yoorikaxa.

¹⁵ Vano Hizekiya aamvaha eparatha* yootheene yaari Mpaani mwa Muluku ni mukwartuni ya omuhakhuni wa empa ya emwene.

¹⁶ Ehuhuweene yeele Hizekiya aavenxa eyuuma yoorikaxa yaahuruweleliwe masele a Empa ya Yave ni amarimbweene, anamvaha mwene a wAsiriya.

¹⁷ Mwene a wAsiriya aamurumiha mutokweenaawexa, mutokweene a anakhottwaawe ni mutokweene a anamalakaawe vamoha ni anakhotto ancipale okhuma oLakixi wa mwene Hizekiya oYerusaleemu. Yaaphiya oYerusaleemu, eneemela vayiikalaandeni a nratta na osulu, mmuseweni onkela wa Ematta ya Namakattha.

¹⁸ Awosa yaamwiitthana mwene ni Eliyakimi, mwaana mulopwana a Hilikiya, namareherera empa ya emwene; Xebena, namalepa, ni Yowa, mwaana mulopwana a Asafi, mutokweene a ilivuru sa nyaha sa mwene, yaarowa waakumanano.

¹⁹ Vano mutokweene a anamalakaawe mwene aaweerela: “Mwamuleele Hizekiya: ‘Mwene mutokweene, mwene a wAsiriya onkoha: Munroromelani?

²⁰ Muneera weera mookhalano miruku ni owera owana, mene ti masu a siiyo paahi. Munimuroromela taani wookivaanya hiiho?

²¹ Moone, munroromela wExipitu ori ntoko ettheere yoowiintakiwa enghoma ni emvulaliha ntata na mutthu onlipano yeeyo. Ti hiiho Farawu* mwene a wExipitu ongweerihelaawe animuroromela.

²² Mwaakeerela: “Hiyo nnimuroromela Yave Mulukwaahu” – Hizekiya aavenxa mattumuxaawe ni altaaraawe aanyesererihaka ootheene olapa valtaarini* oYerusaleemu!

²³ Vano mwiiwanane ni pwiiyaaka, mwene a wAsiriya. Miyo kinimoovahani ikavalu* macira miloko miili nyuwo mwakhalano anamweettihaaya!

²⁴ Nyuwo munroromela wExipitu weera yoovaheeni ikaaro ni anamweettihaaya. Vaheera khamungwera ongwina naari mutokweene mmoha a asikhaani a apwiyaaka.

²⁵ Ohiya toko yeeyo, kirweenle owanano ni opwatha elapo ela niwoko na olamula wa Yave. Ti Yave mwaneenaawe okeerenle weera kiwanane ni kiphwate nipuro nna.’”

²⁶ Vano Eliyakimi, mwaana mulopwana a Hilikiya, Xebena ni Yowa yaamweerela mutokweene a anamalakaawe mwene: “Dyoontte muulumeke ni arumeiyaanyu munuulumoni na Eramewu, niwoko nnimwiiwexexa. Muhuulume vaHeberi yeenre atthu ari vasulu vaxirini eniiwa.”

²⁷ Wa soothesene, mutokweene a anamalakaawe mwene aawaakhula: “Apwiyaaka aarumiha mutthenga ola wa ootheene – khoohiyono wa pwiyaanyu ni nyuwosa paahi. Atthu ale vaxirini animooca mahilokaaya ni anoowura minyoososaya, hiiho ntoko nyuwosa.”

²⁸ Vano mutokweene a anamalakaawe mwene aaheemela, anakhuwela vaHeberi: “Mwiiwe masu a mwene mutokweene, mwene a wAsiriya!

²⁹ Mwene oneera ha: Muhilokotthiwe ni Hizekiya! Owo khangwera owoopolani mmatatanimwaka.

³⁰ Muhimuhiye Hizekiya ooviriyelakani weera munroromele Yave, owo aweerelakani: ‘Vekhaikhai Yave onoonoopola hiyo; esidade ela kheerwa evahereriwa mmatatani mwa mwene a wAsiriya.’

³¹ Muhimwiiwelele Hizekiya! Mwene a wAsiriya oneera ha: Mwiiraane ni miyo ni mwiixinnyerere wa miyo. Hiiho khula mutthu a nyuwo onimooca sa emattaawe ya iwuuva* ni nyirisawe sa efiigu* ni onoowura maahi a muhimenimwawe

³² mpaka kineeraaka kookuxeeni kooroihakani mulaponi enlikana elapwaanyu. Elapo eyo erino etrigu ni eviinyu enyowani; sooca ni imatta sa iwuuva*; elapo ya nyiri sooliveira* ni oravo. Muthanleke okumi, ohikhanle okhwa! Muhimwiiwelele Hizekiya, niwoko onimoolokotthani aweerelakani: ‘Yave onoonitapuxa.’

³³ Khawoworu muluku mukina wa wakhalaru muloko mukina owenre woopola elapwaaya mwa ntata na mwene a wAsiriya.

³⁴ Miluku sa oHamati ni wArepadi siri woowi? Miluku sa oSefarevayimi, oHena ni wIwa siri woowi? Iye khasaawenre ovuluxa oSamariya mmatatanimwaka.

³⁵ Khawoworu muluku mukina wa ilapo sootheene seiye owenre woopola elapwaaya mmatatanimwaka. Ongwereya hai Yave woopola oYerusaleemu mmatatanimwaka?”

³⁶ Vaheera atthu yaari emaalelo, niwoko mwene aahaalamulela: “Muhimwaakhule.”

³⁷ Eliyakimi, mwaana mulopwana a Hilikiya, namareherera empa ya emwene, Xebena, namalepa, ni Yowa, mwaana mulopwana a Asafi, mutokweene a ilivuru sa nyaha sa mwene, yaarowa wa Hizekiya ni ikuwo soowaahuwa, enamuthalihera yeeyo mutokweene a anamalakaawe mwene a wAsiriya aahimmaawe.