2 Mamwene 13 - Emakhuwa Bible

Yehowazi onlamula oYixrayeli

¹ Yehowazi, mwaana mulopwana a Yehu, aathatuwa mwene a aYixrayeli oSamariya vayaakhani yanaamiloko miili ni tthaaru moolamulani mwa Yowaxi, mwaana mulopwana a Ahaziya, mwene a oYuda. Yehowazi aalamula iyaakha muloko niithannapiili.

² Aapaka yoonanara vamaithoni wa Yave attharaka soottheka sa Yerobowami, mwaana mulopwana a Nebati, mwa yoowo aatthekihale aYixrayeli.

³ Isara sa Yave saahaaluttuwela aYixrayeli. Aatthunihera weera ewiniwe ni Hazayeli, mwene a awArami ni mwanawe Beni-Hadadi wa ehuhu yincipale.

⁴ Vano Yehowazi aahaasaasa murima wooreera wa Yave ni Yave aamwiiwa, niwoko aahoona moota wootepaxa mwene a awArami aahooxaawe aYixrayeli.

⁵ Yave aahaavaha aYixrayeli namatapuxa ni awo yaahoopoliwa yaalamuliwaaya ni awArami. Hiiho aYixrayeli yaakhala mmawannyaya ntoko yaakhalelaaya.

⁶ Vaheera yaapwaherera soottheka sa emusi ya Yerobowami, mwa seiye aatthekihalaaweno ehihiyakaru. Mpakatho nrimbu na Axera naari yeemelelo oSamariya.

⁷ Wa anakhotto ootheene a Yehowazi, yaahanle paahi anamweettiha a ikavalu* miloko mithanu, ikaaro sa ikavalu* muloko ni anakhotto macira macireene muloko, niwoko mwene a awArami aahaaphwata akinaawo aaxilaka.

⁸ Vano, mwaha wa sookhumelela sikina sa olamula wa Yehowazi– sootheene aapankaawe ni sooweerasawe sootheene – silempwale mulivuruni ya nyaha sa mamwene a oYixrayeli.

⁹ Yehowazi aahookhwa, anavithiwa ni makholowaawe oSamariya. Mwanawe mulopwana, Yehowaxi, ti aamurandenle.

Yehowaxi onlamula oYixrayeli

¹⁰ Yehowaxi, mwaana mulopwana a Yehowazi, aathatuwa mwene a aYixrayeli oSamariya vayaakhani yanaamiloko miraru niithannapiili moolamulani mwa Yowaxi, mwene a oYuda. Aalamula iyaakha muloko niithannamosa.

¹¹ Aapaka yoonanara vamaithoni wa Yave ahihiyaka soottheka sa Yerobowami, mwaana mulopwana a Nebati, mwa seiye aatthekihalaaweno aYixrayeli, mene aapwaherera mwa seiye.

¹² Vano, mwaha wa sookhumelela sikina sa olamula wa Yehowazi – sootheene aapankaawe ni sooweerasawe sootheene nitho ongwananawawe Amaziya, mwene a oYuda – silempwale mulivuruni ya nyaha sa mamwene a oYixrayeli.

¹³ Yehowaxi aahookhwa ni Yerobowami ti aamurandenle. Yehowaxi aavithiwa oSamariya vamoha ni mamwene a oYixrayeli.

Okhwa wa Elixa

¹⁴ Vano Elixa yaamphwanya eretta mwa yeeyo yeera emwiive. Yehowaxi, mwene a oYixrayeli, aarowa wa yoowo. Vano aahuuramihela ekhove, anamwiinlela, akhuwelaka: “Atithaka! Atithaka! Mwaari ntoko ekaaro ya ekhotto ni anamweettiha a ikavalu* a oYixrayel!”

¹⁵ Elixa aamweerela: “Mukiruuhele muura ni nyuupa.” Yehowaxi aapaka yeeyo.

¹⁶ Owo aamweerela mwene a oYixrayeli: “Mvarele muura.” Mwene avarelakaru muura, Elixa aahiikaathera matataawe mmatatani mwa mwene,

¹⁷ anamweerela: “Muhule exanela enghuleliwa mpatta ninkhuma nsuwa ni mulathele.” Vano mwene aapaka yeeyo. Elixa aahima: “Ola muupa wa owina wa Yave woowaawinela awArami! Nyuwo munimwaaphwata awArami woomalela wAfeki.”

¹⁸ Vano aamweerela: “Mukuxe nyuupa.” Mwene aakuxa. Elixa aamweerela: “Mmanele etthaya!” Mwene aamana etthaya imaara tthaaru, anahiyerera.

¹⁹ Mulopwana a Muluku aamunyoonyeriwa, anamweerela: “Waatthuneya omana etthaya imaara ithanu hoye hoye ithannamosa. Mwaapanke hiiho, mwaamwaawina awArami mwaaphwataka woomalela. Vaheera vano munimwaawina imaara tthaaru paahi.”

²⁰ Elixa aahookhwa, anavithiwa. Vanonto anakhotto a aMowabe yannakhovelela ovolowa mweelaponi khula mulaala.

²¹ Emaara emoha, aYixrayeli akina emuvithaka mulopwana, wootutuxereya yaawoona anakhotto akina a aMowabe. Yaavonyera muttembo wa mulopwana ole munihiyeni na Elixa, enatthawa. Muttembo otavakaru makhuva a Elixa, mulopwana aavenyerera, aneemela.

aYixrayeli anoopola isidadesaya sikina wa awArami.

²² Hazayeli, mwene a awArami, annaahooxa aYixrayeli mweehuhuni yootheene ya olamula wa Yehowazi.

²³ Wa soothesene, Yave aawoonihera murimaawe wooreera, aamorelaka ikharari aapwatthaka niwoko na wiiraanawawe ni Abrahaamu, Isaki ni Yakobe. Mpaka olelo Owo khantthuna waaphwata hata owoomola vamaithoniwawe.

²⁴ Hazayeli, mwene a awArami, aahookhwa ni Beni-Hadadi, mwanawe mulopwana ti aamurandenle.

²⁵ Vano Yehowaxi, mwaana mulopwana a Yehowazi, aakuxa wa Beni-Hadadi, mwaana mulopwana a Hazayeli isidadesene seiye Hazayeli aakunxaawe wa atithawe Yehowazi. Yehowaxi aangwina Beni-Hadadi imaara tthaaru ni hiiho aakuxatho isidade sa aYixrayeli.