2 Mamwene 10 - Emakhuwa Bible

Ophwatiwa wa ekhapira ya Ahabi

¹ Vano yaakhala oSamariya anamwane asilopwana miloko mithannamiili a ekhapira ya Ahabi. Yehu aalepa ikaratta, anarumihela oSamariya, wa ahooleli a esidade, asitokweene ni anamalipelela a anamwane a Ahabi. Ekaratta yeera:

² “Nyuwosa ti yaale anaakosoopa anamwane a pwiiyaanyu mukhalanakano ikaaro sa ekhotto, ikavalu* ni esidade yoolipihiwa vamoha ni akapwitthi. Vano mwaakhela ekaratta ela,

³ mwamuthanle ooreerela ni ooweeraxa a anamwane a pwiiyaanyu, munkilaathihaka vahiceni ya atithawe. Vahoolowaya, ngwanele omwene wa Ahabi.”

⁴ Wa soothesene, awosa yaahoova yeeraka: “Mamwene meeli khayaawenre ongwina, nniwere hai hiyo?”

⁵ Vano namareherera a empa ya mwene, guvernadori, asitokweene ni anamalipelela a anamwane yaamurumihela mutthenga ola Yehu: “Hiyo nri arumeiyaanyu ni nnoopaka sootheene muntthunaanyu. Khawowo nneeraahu nimvare omwene. Mpake yeeyo enooreerelani.”

⁶ Vanonto Yehu aahaalepelatho ekaratta yanaaveeli yeeraka: “Nyuwosa mwaareene a mpattaaka ni mwatthuna okiiwelela, mwaahite anamwane a pwiiyaanyu ni mukiruuhele nyurusaya oYizereyeli omaalo ehuhuweene yeela.” Vano anamwane a mwene miloko mithannamiili ale yaahuwiwa ni asitokweene a esidade.

⁷ Yaakhelakaru ekaratta, asilopwana ale yaahaahitasa anamwane a mwene, ewiivaka ootheene. Nyurusaya yaahela mmipaparani, enamurumihela Yehu oYizereyeli.

⁸ Aleeliwaka weera sooruuhiwa nyuru, Yehu aalamulela: “Muukele seiyo vamulako wa esidade mapuro meeli weera sikhalewo mpaka omaalo.”

⁹ Oxaawaya, Yehu aakhuma, aneemela ohoolo wa muloko wootheene, aneerela: “Nyuwosa khamunono nthowa. Ti miyo kimvaanelenle pwiiyaaka kinamwiiva. Vaheera, ootheene ala owiivale taani?”

¹⁰ Musuwele weera masu ootheene Yave aahimmaawe mwaha wa ekhapira ya Ahabi anookhwaniheriwa. Yave oopaka yeeyo aaroromelinghaawe mwa murumeiyaawe Eliya.

¹¹ Vano Yehu aawiiva ootheene yaahanle a ekhapira ya Ahabi oYizereyeli vamoha ni asitokweenaawe, asinthamwenaawe ni asaserdotaawe woohoopowaru mutthu.

¹² Vahoolowaya Yehu aavenya, anarowa oSamariya. oBeti-Ekedi wa akukhuli,

¹³ aahaakumanano amusi akina a Ahaziya, mwene a oYuda, anaakoha: “Nyuwosa taani?” Awosa yaamwaakhula: “Hiyo amusi a Ahaziya ni ninkela oxekura imusi sa mwene ni sa pwiyamwene mutokweene.”

¹⁴ Yehu aalamula: Mwaavare ni matata! Awo yaahaavara amusi a Ahaziya, enawiivela ehime ya oBeti-Ekedi – wookwana asilopwana miloko mixexe neeli. Khaahiiweru mukumi.

¹⁵ Apwahakaruwo, aamukumanano Yehonadabi, mwaana mulopwana a Rekabi, mwa yoowo aarongwe omuulumano Yehu. Amuulumihaleene Yehonadabi, Yehu aamukoha: “Nyuwo moohakalalela kimpakaaka?” Yehonadabi aamwaakhula: “Aani.” Yehu aamweerela: “Mukivahe ntata.” Yehonadabi aamvaha ntata ni Yehu aamukhavihera owela ekaaro.

¹⁶ Yehu aamweerela: “Mukitthare ni moone omukhalelawaka nthiti Yave.” Vano Yehonadabi aarowa ni yoowo mukaaronimwawe.

¹⁷ Yehu aphiyakaru oSamariya, aawiiva ootheene yaahanle musidade yaari a emusi ya Ahabi. Aahaaphwata ntoko Yave aahimmaawe mwa Eliya.

Okhwa wa anamalapa a Bahali

¹⁸ Vano Yehu aahaathukumanyiha atthu ootheene, anaweerela: “Ahabi aamurumeela Bahali* vakhaani, Yehu onoomurumeela woopwaha.

¹⁹ Vano ngwiitthane maprofeeti ootheene a Bahali* vamoha ni arumeiyaawe ni asaserdotaawe ootheene. Ahikhaleru anaacombe, niwoko kinoompakela Bahali* yooveleela etokotoko. Yoole anaacombe, onimwiiviwa.” Wa soothesene, nne naari ntapha na Yehu weera aamalamalihe anamarumeela ootheene a Bahali*.

²⁰ Yehu aalamula: “Mulattule muthukumano nimuttittimiherelaka Bahali*!” Waalattuliwa,

²¹ ni Yehu aahaarumihela anamitthenga mweelaponi yootheene ya oYixrayeli. Anamarumeela ootheene a Bahali* yaahoowa; khaawo aacombe. Yaathukumana mpaani mwa Bahali* enasareyamo moothemwene.

²² Yehu aamweerela namalipelela a ikuwo mpaani mwa Bahali*: “Mwaaruuheleke mikaandyo anamarumeela ootheene a Bahali*.” Ni owo aaruuha.

²³ Vanonto Yehu ni Yehonadabi, mwaana mulopwana a Rekabi, yaavolowa mpaani mwa Bahali*. Yehu aaweerela anamarumeela a Bahali*: “Ngwehawehe mukhwipimwanyu ni moone aahikhanleru murumeiyi a Yave; ekhaleke paahi anamarumeela a Bahali*.”

²⁴ Vano yaavolowa weera empakele Bahali* sooveleela sa axinama ni soohisa. Vanonto Yehu aahaalamulela asilopwana miloko mithannamiraru weera yeemele vaate awoopereraka: “Ahikhale anaamuhiye oopowaka naari mmoha a atthu ale kingwinnyereraakani. Yoowo anaamuhiye, nthowa na okhwa ti nawawe.”

²⁵ Yehu amalihakaru opaka yooveleela yoohisa, aahaalamulela anamalipelela ni asitokweene a anakhotto: “Mvolowe ni ngwiive ootheene. Ahikhaleru anaatthawe!” Vano awo yaawiiva ootheene ni ekatana, enavonyera mittembo vaate, enavolowa mpatta wa mpuwa wa empa ya Bahali*.

²⁶ Yaakuxasa mpaani mwa Bahali* nrimbu nootteeliheriwa, enahisa.

²⁷ Yaaphwatasa nrimbu nootteeliheriwa Bahali*, enakurumula empa ya Bahali* ni mpaka olelo nipuro nne nipakiwe ecumbusi.

²⁸ Hiiho Yehu aaphwata olapiwa wa Bahali* oYixrayeli.

²⁹ Wa soothesene, owo khaahingye soottheka sa Yerobowami, mwaana mulopwana a Nebati, mwa yoowo aatthekinghe aYixrayeli, eyo tiiyo olapiwa wa aximombe a eyuuma yoorikaxa oBeteli ni oDani.

³⁰ Yave aamweerela Yehu: “Ekhapiraanyu enoolamula oYixrayeli mpaka ekhapira yanaaxexe mweenre mpaka yeeyo eri yooreera vamaithoniwaka, mpakelaka emusi ya Ahabi sootheene kaatthunaaka weera mpake.”

³¹ Wa soothesene, Yehu khaatthukuruwenle ni murima wootheene Nlamulo na Yave, Muluku a aYixrayeli. Khaahingye soottheka sa Yerobowami, mwa seiyo saatthekinghe aYixrayeli.

Okhwa wa Yehu

³² Ehuhuweene yeele Yave aapacera ovukula waatta wa aYixrayeli. Hazayeli aahaawina aYixrayeli a mipatta sincipale sa oYixrayeli,

³³ mpatta ninkhuma nsuwa wa oYordanu, mweelaponi yootheene ya oGiliyadi. Aawina okhuma wAroweri vanreyareyani na wArenoni, aviraka oGiliyadi mpaka oBaxani, eyo tiiyo ilapo sa Gadi, Rubeni ni Manaxe.

³⁴ Vano, mwaha wa sookhumelela sikina sa olamula wa Yehu – sootheene aapankaawe ni sooweerasawe sootheene – silempwale mulivuruni ya nyaha sa mamwene a oYixrayeli.

³⁵ Yehu aahookhwa, anavithiwa oSamariya ni mwanawe mulopwana, Yehowahazi, ti aamurandenle.

³⁶ Yehu aalamula oYixrayeli oSamariya iyaakha miloko miili niithannatthaaru.