2 aKorinto 5 - Emakhuwa Bible

Woomakawahu wiirimu

¹ Noosuwela weera yaphwatiwa empaahu yoovira ninkhalaahu vathi, nookhalano mpatta wa Muluku empa ekina yoohimala wiirimu, ehitekiwe ni matata a atthu.

² Tivawo nniipulela nihaawelaka owarihiwa ni empaahu ya wiirimu,

³ niwoko niwarihiweene, khanimphwanyiwa pwitipwiti.

⁴ Tivawo, nireene empeene yeela, nniipulela ni murima woolemeliwa, niwoko khanintthuna oruliwa, mene owarihiwa ni empeene yeeyo ya wiirimu, weera yeeyo eri yookhwa emiriwe ni okumi.

⁵ Ti Muluku onirehererenle wa nthowa nna, anivahaka Munepa ntoko yoororomelihiwa ya yeeyo eneera ewe.

⁶ Tivawo ninroromelaahu mahuku ootheene ni noosuwela weera, nireene mweerutthuni, nri ottaiwene wa Apwiya.

⁷ Niwoko ninkhala munroromeloni, ohiya wa yeeyo nnoonaahu.

⁸ Hiiho ninroromela, ni nintthunaxa okhala ottaiwene wa erutthu, nikhalaka ni Apwiya.

⁹ Tivawo, hata nikhalaka mweerutthuni, hata ottaiwene wa yeeyo, nintthunaxa waasiveliha Apwiya.

¹⁰ Vano nintthuneya weera ootheene hiyo niixoonihere ohoolo wa ehice yoothoriha ya Kristu, weera khula mutthu aakhele yeeyo emphwanenle niwoko na seiyo aavarelaawe muteko mweerutthunimwawe – hata sikhalaka sooreera, naari soonanara.

Muteko wa wiiraana

¹¹ Hiiho, woonaka weera noosuwela owoova Apwiya, nnaasa waaviriyela atthu. Yeeyo nraahu, yohooniheriwa ohoolo wa Muluku, ni noororomela weera eyo yohooniheriwatho mmirimanimwanyu.

¹² Khanneerera veeli noolaiherakani nyuwo. Mwa yeeyo nnoovahani ehuhu nyuwo munnivuwiha, weera muwere owaakhula yaawo aniivuwiha ni itthu sa omokoni, ehikhanle yeeyo eri mmurimani.

¹³ Naari anaanepa, ti niwoko na omusivelawahu Muluku, ni naarino miruku sooreera, ti niwoko na woosivelaniwahu nyuwo.

¹⁴ Vano osivela wa Muluku onninyesereriha, niwoko nooviriyeliwa weera mmoha okhwiiye wa ootheene, tivawo ootheene ahookhwa.

¹⁵ Owo aakhwenle ootheene, weera yaawo ankhala ni okumi ehikhale wa asineenaaya, mene wa Yoole aakhwenle yaawo ni ovenyerenre.

¹⁶ Okhuma vaanaano mpaka ohoolo, ahikhale nneeraahu nimuthorihe moota wa omutthu. Naamwi naamusuwenle Kristu moota ola khalayi, vano khannimusuwela hiiha.

¹⁷ Tivawo, mukina akhala mwa Kristu, ti opattuxiwa onyowani. Itthu sa khalayi soovira; sinyowani sohoorwa.

¹⁸ Soothesene iyo sinrweela wa Muluku, oniiraanyinghe ni Yoowo mwaneenaawe niwoko na Kristu ni oonivaha muteko wa wiiraana:

¹⁹ weera Muluku mwa Kristu iiraanyiha elapo ya vathi ni mwaneenaaweru, ahaalikelaka soottheka sa atthu. Owo aanivaherera hiyo masu a wiiraana.

²⁰ Tivawo nri anamitthenga a Kristu, ntoko waari weera Muluku onuuluma ni eyanowaahu. Niwoko na Kristu ninoodyoonttelelani nyuwo: mwiiraaneke ni Muluku.

²¹ Niwoko na hiyo Muluku oomutatuxa yoottheka Yoowo ahaasuwenle yoottheka, weera mwa Yoowo hiyo nikhale oowaakheleliwa ni Muluku.