2 aKorinto 4 - Emakhuwa Bible

Mihakhu siri nnyaapuni sa oloko

¹ Tivawo, neenre nikhalakano muteko ola wa ikharari nivahiwaahu, hiyo khanimporora.

² Ohiyanawaya, hiyo ninnyanyala itthu soovithiwa ni soowuulihiha muru. Khanimvarela muteko soolokottha, hata khanimpiritula masu a Muluku. Hoye! Nithaliheraka ekhaikhai nnenesene, hiyo nniixoonihera wa mirima sa atthu ootheene ohoolo wa Muluku.

³ Maswaahutho ooreeraxa yaari ookhuneeliwa, ti ookhuneeliwa wa yaawo anriheya.

⁴ Muluku a ehuhu ela ohuumiha sowiiwexexa sa atthu oohiroromela, weera ehoone waara wa masu ooreeraxa a ovuwa wa Kristu, mwa Yoowo ori mukhalelo wa Muluku.

⁵ Vano, khanniilaleiya hiyo asineenaahu, mene ninnimulaleiya Yeesu Kristu weera ti Apwiya, vaheera hiyo nri ipotthasanyu niwoko na Yeesu.

⁶ Muluku eenre “Mpiphini waare omwaleela,” Owo muneenaawe ohaara mmurimanimwahu weera onimwaleele waara wa osuwela wa ovuwa wa Muluku, onaara mukhoveni mwa Kristu.

⁷ Nookhalanotho muhakhu owo nnyaapuni sa oloko, weera woonihere weera ikuru soopwahaxa sinrweela wa Muluku, khasihiyono wa hiyo.

⁸ Ninnahooxiwa mwa soothesene, mene khaninswanyiwa, ninnattikinyiwa, mene khanimporora.

⁹ Nri oottharatthariwa, mene khanihiiwe, ninnamaniwa, mene khanimphwatiwa.

¹⁰ Hiyo ninnateexa mahuku ootheene mweerutthunimwahu okhwa wa Yeesu, weeratho okumi wa Yeesu wooniheriwe mweerutthunimwahu.

¹¹ Vano, hiyo nri ni okumi ninnavahereriwa mahuku ootheene wa okhwa niwoko na Yeesu, weeratho okumaawe wooniheriwe mweerutthunimwahu yookhwa,

¹² moota wooweera mwa hiyo omvara muteko okhwa, mene mwa nyuwo okumi.

¹³ Yoolempwa*: “Koororomela, tivawo kuulummaaka.” Hiyotho ninroromela ni nroromelo nna, tivawo nnuulumaahu

¹⁴ niwoko noosuwela weera Owo omvenyererihale Yeesu mookhwaani, anaanivenyererihetho hiyo vamoha ni Yeesu ni anaanoonihere vamoha ni nyuwo.

¹⁵ Sootheene iyo ti wa mpuhaanyu, weera mahala anaatava atthu ancipale ewere osariha otthapela wa ovuwa wa Muluku.

¹⁶ Tivawo khanimporora. Naamwi omokoniwahu otepaka onanariheya, mpuwamwahu ninnakhalihiwa onyowani khula nihuku.

¹⁷ Ohaawawahu wooveruwa ni woovireya onniruwerela hiyo ovuwa woottittimiheyaxa woopwaha wootheene iwo.

¹⁸ Hiiho ningwehexexa, ohiya yeeyo enooneya, mene mwa yeeyo ehinooneya, niwoko yeeyo enooneya ti yoovira, ehinooneyatho yoohimala.