1 Yohaane 4 - Emakhuwa Bible

Moota woomwalamwaxa minepa

¹ Oosiveleya, muhiroromele sakhalaru minepa, mene musomele minepa weera moone iyo saawiiye wa Muluku, niwoko maprofeeti ancipale oolokottha aakhumelela mweelaponi.

² Nyuwo munoowera osuwela Munepa wa Muluku moota ola: Munepa wootheene onlapa weera Yeesu Kristu owiiye mweerutthuni, orwiiye wa Muluku.

³ Munepa wootheenetho ohinimulapa Yeesu, khoorwiiye wa Muluku. Owo ti munepa wa namwiittana a Kristu, mwa yoowo nyuwo mwaahiiwa weera onimoowa, ni vano ori mweelaponi.

⁴ Anamwane, nyuwo muri a Muluku ni mohaawina yaawo, niwoko Yoowo ori mwa nyuwo ti woopwahaxa munepa ori mweelaponi.

⁵ Awo angwa wa elapo ya vathi, tivawo anuulumaaya mukhalelo wa elapo ya vathi ni amalapo anniiwa.

⁶ Hiyo nri a Muluku, ni khula mutthu omusuwenle Muluku onniiwa, mene yoole ohirwiiye wa Muluku khaniiwa. Hiiho noosuwela Munepa wa ekhaikhai ni munepa woolokottha.

Osivela wa Muluku

⁷ Oosiveleya, nisivelane mukina ni mukhwaawe, niwoko osivela ongwa wa Muluku. Yoole onsivela, oyariwe wa Muluku ni oomusuwela Muluku.

⁸ Yoole ohinsivela, khamusuwenle Muluku, niwoko Muluku ti osivela.

⁹ Ti hiiho Muluku oonihenraawe osivelawawe variyariwahu: Aamurumiha Mwanawe mmoharu wa elapo ya vathi weera nikhale niwoko na Yoowo.

¹⁰ Mwa yeeyo wookhala osivela: khoohiyono weera hiyo noomusivela Muluku, mene weera Owo oonisivela ni aamurumiha Mwanawe ntoko woopola wa sootthekasahu.

¹¹ Oosiveleya, woonaka weera Muluku oonisivela moota ola, hiyotho ontthuneya weera nisivelane mukina ni mukhwaawe.

¹² Khaawo otonke omoona Muluku. Hiyo nasivelana mukina ni mukhwaawe, Muluku onookhala mwa hiyo, ni osivelawawe ori wookwanelihiwa mwa hiyo.

¹³ Noosuwela weera hiyo ninkhala mwa Yoowo ni Owo mwa hiyo, niwoko oonivaha sa Munepaawe.

¹⁴ Nohoona ni ninkhalela onamoona weera Atiithi yaamurumiha Mwaana weera akhale Mvuluxa a elapo ya vathi.

¹⁵ Akhala mukina onaakhulela mwaatthuni weera Yeesu ti Mwaana a Muluku, vano Muluku onkhala mwa yoowo ni owo mwa Muluku.

¹⁶ Hiiho noosuwela osivela Muluku oraaweno wa hiyo ni ninroromela mwa osivelawene weiwo. Muluku ti osivela. Khula mutthu onkhala moosivelani, onkhalatho mwa Muluku ni Muluku mwa yoowo.

¹⁷ Hiiho osivela ori wookwanelihiwa variyariwahu weera vanihukuni na nthorihelo nikhalane murima woolipa, niwoko mweelaponi ya vathi ela hiyo ninkhala ntoko Owo onkhalaawe.

¹⁸ Moosivelani khoowowo woova. Ohiyanawaya, osivela wookwanela onoomola woova, niwoko woova okumanyihiwe ni ottaruxa. Yoole onoova, khankwanelihiwa moosivelani.

¹⁹ Hiyo ninimusivela, niwoko Owo aapacenre onisivela.

²⁰ Akhala mukina oneera: “Miyo kinimusivela Muluku,” amuthanyakatho munneiye, owo namootha, niwoko yoowo ohinimusivela munneiye onooneya, khangwera omusivela Muluku ori oohooneya.

²¹ Owo oonivaha nlamulo nna: Yoowo onimusivela Muluku, ontthuneya omusivelatho munneiye.