1 Timootheyo 5 - Emakhuwa Bible

Ikano mwaha wa asinaamukhweli, ahooleli ni ipottha

¹ Ohimuhiihe mulopwana oowuuluvala ni masu oolipa, mene omulipihere ntoko owo areene atithawo, ni waalipihere amiravo ntoko axunneiyo;

² asithiyana oowuuluvala ntoko amayawo; asimwali ntoko asirokoriyo mootteelani mootheene.

³ Waakosoope asinaamukhweli yaale ari vekhaikhai moohaawani.

⁴ Vano, akhala naamukhweli orino anamwane, naari osuulu, awo epacere toko oxuttera okwanihera ediinaaya ni miteko yaapasoopaka amusaaya asineenaaya ni waatthapela axinaangolo, niwoko yeeyo enoomusiveliha Muluku.

⁵ Naamukhweli onghaawa vekhaikhai ni ahikhanleno emusi, onnamuroromela Muluku ni onnavekelaxa ohiyu ni othana ni midyoonttelelo.

⁶ Naamukhwelitho yoowo onkhala wa ohakalala wa elapo ya vathi, hata areene ni okumi, ohookhwa.

⁷ Waaxuttihe itthu iya weera awo ehikhale ni nthowa.

⁸ Akhala mukina ohinaakosoopa amusaawe, wootepaxa a vaatevawe, owo ookhootta nroromelo ni ootepaxa ompwahaxa mutthu oohiroromela.

⁹ Alepeliwe mulivuruni ya asinaamukhweli yoole paahi orino woopwaha iyaakha miloko mithannamosa wunnuwawawe, aari oororomeleya ni iyawe,

¹⁰ oosuweliwa nnenesene niwoko na mitekosawe sooreera; miteko ntoko waahuwa anamwane, owaakhela matata meeli aletto, orapiha inaawo sa ootteela, waakhavihera yaawo ari mmahooxoni, ni iilevaka opaka miteko sooreera sootheene.

¹¹ Ehilepeliwe mulivuruni yeeyo asinaamukhweli oohuuluvala, niwoko soohaawelasaya sa erutthu sawina nthiti wa Kristu, antthuna othelana.

¹² Hiiho, awo aniiruuhela othorihiwa asineenaaya, niwoko yaananariha yoororomelihiwaaya yoopacera.

¹³ Ohiya toko yeeyo, anxuttera oreesi yeettaka empa ti empa, ni khaankhala ooreesi paahi, mene anthatuwa oowaapa ni ootthunaxa osuwela sootheene, yuulumaka itthu soohitthuneya.

¹⁴ Tivawo kinaalakaaka asinaamukhweli oohuuluvala weera ethelane, yaayare anamwane, ni yeettihe vaatewaya ehimvahaka nthowa na oveiha namwiittana.

¹⁵ Vekhaikhai, akina aahapuwa weera emutthare Satana.

¹⁶ Akhala muthiyana mukina muKristu orino asinaamukhweli veemusiniwawe, ontthuneya waakhavihera. Ehireiwe ekerexa murindi woolemela, weera asinaamukhweli anghaawa vekhaikhai ekhaviheriwe ni yeeyo.

¹⁷ Ahooleli aneettiha nnenesene ekerexa aaphwanela matthuvelo meeli, wootepaxa yaawo mitekosaya siri olaleiya ni oxuttiha,

¹⁸ niwoko Yoolempwa* yeenre: “Muhiphure eyano ya emombe enttikittha inuku’ ni ‘Namuteko omphwanela nlivonaawe.”

¹⁹ Ohaakhulele yoowoothera ni muhooleli ehikhaviheriwe ni anamoona eeli, hoye hoye araru.

²⁰ Yaawo anttheka, ontthuneya waattaruxa, mwaatthuni weera akristu akina yoove.

²¹ Miyo kingwooperera vamaithoni wa Muluku, wa Kristu ni wa andyelo oothanliwa, weera othokorore itthu iya, othorihaka moota woororomeleya ni ohikhalaka ni nthalu.

²² Ohimwiiyaathere matata mukina moota woowaakuveya, ohikhale ni nthowa mwaha wa soottheka sa akina. Wiithokorore ootteeleene.

²³ Ohipwaherere owura maahi paahi, mene owuretho eviinyu vakhaani niwoko na nipwiipwinawo ni irettasawo soohihiyerereya.

²⁴ Soottheka sa akina sinsuwanyeya sihinaaye othorihiwa, vano soottheka sa akinatho sinsuwanyeya vahoolo wa nthorihelo paahi.

²⁵ Mooteene yoowo ni miteko sooreera – ti soosuwanyeya, ni seiyo soohisuwanyeya khasingwereya opwaherera wiipithiheya.