1 Timootheyo 1 - Emakhuwa Bible

Isalaama sookisera

¹ Ya Pawulo, murummwa a Kristu Yeesu munlamuloni na Muluku, Mvuluxaahu, ni na Kristu Yeesu, owehererawahu.

² Wa Timootheyo, mwanaka a ekhaikhai munroromeloni: mahala, ikharari ni murettele wa Muluku Atiithi ni Kristu Yeesu Apwiyaahu.

Soowooperera mwaha wa anamahusiha a nlamulo oolokottha

³ Kaavenyaaka kirowaka oMasedoniya, kaahoodyoonttelelani weera mukhale wEfeso weera mwaalamule atthu akina ehixuttihe mahusiho makina oolokottha,

⁴ hata ehaatthare andiisi ni ikhapira soohimala sinruuha toko ohiiwanana ohiya okhavihera muteko wa Muluku ori munroromeloni.

⁵ Etthu kintthunaaka ni wooperera wu ti osivela onrweela mmurimani wootteela ni moosuwelani wooreera ni munroromeloni na ekhaikhai.

⁶ Akina aahiya itthusene seiya, ehokoleelaka masu a siiyo,

⁷ etthunaka okhala anamawera a nlamulo*, ehiiwexexaka yeeyo anghimaaya, naari itthu mwa seiyo anaakhulelaxaaya.

⁸ Noosuwela weera nlamulo ti nooreera, mukina aattharaka ni moota wootthuneya.

⁹ Noosuwelatho weera nno khanipakeliwe wa oowaakhuleliwa ni Muluku, mene wa anamatakhala ni oohiiwelela; wa oohitteela ni anamattheka; wa yaawo ahimmwaakhulela, hata ahinimuttittimiha Muluku; wa yaawo angwiiva atithaya ni amayaya; wa anamwiiva;

¹⁰ wa anamararuwa ni anraruxana alopwanaru; wa yaawo anaavara atthu weera yaathumihe; wa anamootha ni yaawo anlipela moota woolokottha; ni wa wakhalaru wiittana okina wa nihusiho na ekhaikhai.

¹¹ Nihusiho nna ninxuttiha sa masu ooreeraxa oovuwa a Muluku ooreelihiwa, mwa yaawo Owo okivaherenraawe.

Mahala a Muluku ovahiwaawe Pawulo

¹² Kinimutthapela Kristu Yeesu Apwiyaahu, okivanghe ikuru ni onkiitthana oororomeleya, akikhalihaka mmutekoni ola.

¹³ Aani, kaarookhalaru khalayi namaveiha, namasoonda ni namawana, vano koophwanya omoreliwa ikharari, niwoko kaapaka yeeyo kihisuwelaka ni kihiroromelaka.

¹⁴ Wa soothesene, mahala a Apwiyaahu kooriheliwa miyo moota woowaatta, vamoha ni nroromelo ni osivela ori mwa Kristu Yeesu.

¹⁵ Masu ala ti oororomeleya ni oophwanela waakhuleliwa nnenesene: Kristu Yeesu aarweenle elapo ya vathi waavuluxa anamattheka, ni a yaawo miyo kiri ootepaxa.

¹⁶ Mene ti niwoko na yeeyo miyo kiphwannyaaka omoreliwa ikharari, weera mwa miyo, namattheka ootepaxa, Kristu Yeesu oonihere owehererawawe ni ovilela woohimala ntoko ethoonyero wa yaale yeera emuroromele Yoowo wa okumi woohimala.

¹⁷ Wa Mwene oohimala, Muluku mmoharu oohikhwa ni oohooneya, nikhale nttittimiho ni ovuwa mahuku ootheene oohimala. Ame*.

¹⁸ Timootheyo mwanaka, kinoovaha nlamulo nna nintthara masu oyeeheriwaawo weyo weera ottharaka, owane owana wooreera,

¹⁹ ovarexexaka nroromelo ni wuupuwela wooreera, niwoko akina, ekhoottaka masu ale, yaahapuwa munroromeloni na ekhaikhai.

²⁰ Variyari wa yaawo ori Himeneyo ni Alesandre, mwa yaawo kimvaherenraaka Satana weera exuttere ohiveiha.