1 Samuweli 9 - Emakhuwa Bible

Sawuli omvariwa omwene

¹ Aakhala muBenyamini oosuwanyeya iitthaniwa Kixi, mwaana mulopwana a Abiyeli, mwaana mulopwana a Zerori, mwaana mulopwana a Bekorati, mwaana mulopwana a Afiya, a epuumba ya Beyamini.

² Aakhalano mwaana mulopwana iitthaniwa Sawuli, mmiravo oophwaneliwa oohilikanxereya variyari wa aYixrayeli. Atthu oorakamaxa yaamukotela mmakhatani.

³ Vano abuuru a Kixi, atithawe Sawuli yaariheya. Kixi aamweerela Sawuli: “Omukuxe murumeiyi mmoha vamoha ni weyo ni wawaasaase abuuru ooriheya.”

⁴ Awosa yaavinuwa nyaako sa wEfrayimi ni elapo ya oXalixa, mene khayaaphwannye abuuru. Yaapwaherera enavolowa elapo ya oXaalimi, mene abuuru khayaariwo. Vahoolowaya yaaphutula elapo ya oBenyamini, hata weiwo khayaaphwannyewo.

⁵ Yaaphiyalaaya elapo ya oZufi, Sawuli aamweerela murumeiyi aaraaweno: “Nrowe nihokolowe, niwoko napisatho, atithaka anoohiya owuupuwelela abuuru enuupuwelelaka hiyo.”

⁶ Vano, murumeiyaawe aamwaakhula: “Moone, musidadeni ela ookhala mulopwana a Muluku oottittimiheya. Sootheene owo onghimaawe sinimweereya. Nrowe namuulumane. Apaale owo onoonithoonyera ephiro yookuxera.”

⁷ Sawuli aamweerela murumeiyi: “Narowa, nnamvaheni? Poosowaahu oomala. Khaninonoru yoomvaha mulopwana a Muluku. Nnamvaheni?”

⁸ murumeiyi aamwaakhula: “Kookhalano mpatta mukhaani wa eparatha*. Kinoomvaha mulopwana a Muluku weera anithoonyere ephiro yookuxera.”

⁹ Khalayi oYixrayeli, mukina aarowaawe waasaasa otthuna wa Muluku, eera: “Nrowe, namukohe namoonihera*, niwoko khalayi mprofeeti iitthaniwa ‘namoonihera*’.”

¹⁰ Sawuli aamwaakhula: “Paahi. Nrowe.” Vano, yaarowa wa esidade aakhalaawewo mulopwana a Muluku.

¹¹ Ewelasaka nttumuxa weera ephiyase musidade, yaahaakhumanano asimwali akina yaarowasa orika maahi. Yaahaakoha: “Namoonihera* ori musidadeni muumu?”

¹² Awo yaahaakhula: “Aani. Ori muhoolo mmo. Mwaakuveke – ophiyale olelo va musidadenimwahu, niwoko amaki anrowa opaka yooveleela vanttumuxani.

¹³ Mwavolowaru musidade, munoomphwanya ahinaaye owela vanttumuxani weera ace. Amaki kheepacera oca owo ahinaaye ophiya, niwoko owo ontthuneya oreeliha yooveleela. Vahoolowaya ancaaya oolattuliwa. Murowe vaanaanova, munoomphwanya ahinaaye.”

¹⁴ Yaarowasa wa esidade ni evolowaka, Samuweli ti aarweelaawe mpatta yaaraaya arowaka wa altaari* vanttumuxani.

¹⁵ Vano moosiloni mwa orwa wa Sawuli, Yave aamoonihera yeeyo Samuweli moota ola:

¹⁶ “Omaalo ehuhuweene yeela, kinimooruuhelani mulopwana mmoha a elapo ya oBenyamini. Mumvare omwene wa aYixrayeli. Owo onimoopola mulokwaaka mmatatani mwa aFilisti. Kohaakhulela mulokwaaka, niwoko okhuwelawaya wookiphwanya.”

¹⁷ Samuweli amoonakaru Sawuli, Yave aamweerela: “Ti yoola mulopwana kooleenlaakani. Owo onoolamula mulokwaaka.”

¹⁸ Sawuli aamwaattamela Samuweli vamulako wa esidade, anamukoha: “Dyoonte, mukileele eri woowi empa ya namoonihera*?”

¹⁹ Samuweli aamwaakhula: “Ti yoomi. Murowe ohoolowaka vanttumuxani, niwoko olelo munimooca ni miyo ni omaalo ohinaxeru kinimooleelani sootheene muntthunaanyu osuwela koohiyekeni murowaka.

²⁰ Muhaatthukuruwele abuuru ariheiye mahuku mararu avinre – aaphwanyiwa. Itthu sooreerela sa oYixrayeli ti sawinyu ni emusi yootheene ya atithinyu.”

²¹ Sawuli aamwaakhula: “Miyo muBenyamini – epuumba yooyevaxa eriyari ya ipuumba sikina sa oYixrayeli ni nihimonaka ti noohittittimiheya mmahimoni ootheene a epuumba ya Benyamini. Heeni munkeerelaanyu hiiho?”

²² Vano Samuweli aamvoleiha Sawuli ni murumeiyaawe vasaala amulamulaka okilaathi vanipuroni noopacera na oolattuliwa – wookwanaka atthu miloko miraru.

²³ Samuweli aamweerela namwaapeya: “Mukiruuhele enama kiwinnyerenraakani weera muthokorore.”

²⁴ Vano namwaapeya aakuxa enama yaari vakhakopeni, aniikaathi ohoolo wa Samuweli. Samuweli aamweerela Sawuli: “Mwaathokororeliwaanyu ti yeela. Mukhuure, niwoko okhuma ehuhu keenraaka: ‘Kookhalano oolattuliwa,’ mpatta ola mwaathokororeliwe nyuwo wa ehuhuweene yeela. Nihuku nenenenne Sawuli aahooca ni Samuweli.

²⁵ Ekhurungweene vanttumuxani evolowaka musidade, Samuweli aahuuluma ni Sawuli vanipathoni na empaawe.

²⁶ Oxiiyeene evenyaka mookonani, Samuweli aamwiitthana Sawuli vanipathoni, anamweerela: “Mvenye ni kinimoothoonyerani ephiro yookuxera.” Sawuli aavenya, anakhuma vamoha ni Samuweli.

²⁷ Ekhumakaru musidade, Samuweli aamweerela Sawuli: “Munleele murumeiyaanyu weera ahoolele. Murumeiyi ole aarowa ni Samuweli aapwaherera eeraka: Nyuwo muhale vaava ehuhu vakhaani weera koovaheeni, mutthenga wa Muluku.”