1 Samuweli 7 - Emakhuwa Bible

¹ Asilopwana a oKiriyati-Yeharimi yaahoorwa, enaakuxa Arka* a Yave. Yaahaaroiha wa Abinadabi vanttumuxani, enamvariha mwanawe Eleyazari weera aakosoope Arka* a Yave.

² Vano Arka* a Yave yaakhala oKiriyati-Yeharimi wa ehuhu yincipale, wookwanaka iyaakha miloko miili, ni muloko wa aYixrayeli wannamudyoonttelela Yave.

Samuweli muhooleli

³ Samuweli aaheerela muloko wootheene wa aYixrayeli: “Mwatthuna omuhokoleela Yave ni murimaanyu wootheene, vano mvenxe miluku sikina variyariwanyu nitho miluku sikina siniitthaniwa Axetoroti ni vahoolowaya mumvahe mirimasanyu Yave munrumeelaka Yoowo paahi. Owo onoowoopolani mmatatani mwa aFilisti.”

⁴ Hiiho aYixrayeli yaavenxa milukusaya sa aBahali* ni Axetoroti, enamurumeela Yave paahi.

⁵ Vano Samuweli aaweerela: “Mwaathukumanyihe aYixrayeli ootheene oMizepa ni miyo kinimoovekelelani wa Yave.”

⁶ Ethukumanneene oMizepa, yaarika maahi, enayeehera vamaithoni wa Yave. Nihuku nenenenne yaatthuka ni yaalapa sootthekasaya yeeraka: “Noomutthekela Yave.” Ti oMizepa Samuweli aahoolenlaawe aYixrayeli ntoko mphuki.

⁷ aFilisti yiiwaka weera aYixrayeli yaathukumana oMizepa, asitokweene a aFilisti yaahoorwa weera yaawaneno. Vano aYixrayeli yaasuwenlaaya yeeyo, yaawoova.

⁸ Yaamweerela Samuweli: “Muhihiyerere onivekelela wa Yave Mulukwaahu weera anoopole mmatatani mwa aFilisti.”

⁹ Samuweli aamukuxa mwaaputtiputthi aamwa, anamveleela mpurukuma ntoko yooveleela yoohisa wa Yave. Owo aamudyoonttelela Yave mwaha wa aYixrayeli ni Yave aamwaakhula.

¹⁰ Samuweli apakaka yooveleela yoohisa hiihaale, aFilisti yaawaattamela weera yaawaneno aYixrayeli. Vaheera nihuku nenenenne Yave aawoopela etari etokotoko aFilisti aarukureerihaka nyuru moota wooweera yaawiniwa ni aYixrayeli.

¹¹ Anakhotto a aYixrayeli yaavenyasa oMizepa, enaattharelela aFilisti, ewiivaka mmuseweni mpaka oxepani wa oBeti-Kari.

¹² Vano Samuweli aakuxa nluku aniikaathi eriyari ya oMizepa ni oXeni. Aatteha nipuro nne Ebenezeri, eeraka: “Mpaka va Yave oonikhavihera.

¹³ Hiiho aFilisti yaawiniwa ehihokoleelakatho mweelaponi ya aYixrayeli. Mweehuhuni yootheene ya Samuweli Yave annawiitta aFilisti.

¹⁴ Isidade saawiniwe ni aFilisti yaahokoloxeriwa aYixrayeli okhuma wEkeroni mpaka oGati. aYixrayeli yaakuxa ilapo sa mukhwipimwaya saalamuliwa ni aFilisti. Waakhala murettele variyari wa aYixrayeli ni awAmori.

¹⁵ Samuweli aapwaherera okhala mphuki a aYixrayeli wa okumaawe wootheene.

¹⁶ Khula eyaakha annaviravira oBeteli, oGiligali ni oMizepa aphukaka milattu sa aYixrayeli mmapuroni ootheene ale.

¹⁷ Mene imaara sootheene annahokoleela oRama mwa weiwo yaaraayawo empaawe. Iwe owo aahoolela aYixrayeli ntoko mphuki. Aahaatekawo altaari* amuttittimiherelaka Yave.