1 Samuweli 4 - Emakhuwa Bible

aFilisti anaakuxa Arka* a Yave

¹ Masu a Samuweli yaahiiwiwa ni aYixrayeli ootheene. Vano aYixrayeli yaarowa waawanano aFilisti. aYixrayeli yaakonela wEbenezeri ni aFilisti wAfeki.

² aFilisti yaahaareherera anakhottwaaya weera yaawaneno aYixrayeli. aFilisti yaahaawanano woolipaxa aYixrayeli ni aYixrayeli yaawinasiwa ekhwaaka mukhottoni anakhotto macira miloko mixexe.

³ Anakhotto ehokoleelakaru waakoneliwe, asitokweene a aYixrayeli yaakoha: “Onihiyenre heeni Yave niwiniwaka ni aFilisti olelo? Nrowe oXilo, naakuxe Arka* a Yave weera awo niroweno, enoopolaka mmatatani mwa amwiittanaahu.”

⁴ Hiiho yaarumiha oroweliwa oXilo Arka* a wiiraana a Yave a ikuru sootheene arino ehicaawe eriyari ya akerubini*. Vanonto Hofeni ni Pinehasi, anamwane asilopwana eeli a Eli yaahaahoola ni Arka* a wiiraana a Muluku.

⁵ Arka* a wiiraana a Yave evolowakaru waakoneliwe, aYixrayeli ootheene yaakhuwela vancipale mpaka etthaya otetereya.

⁶ Yiiwakaru okhuwela wa aYixrayeli yaakonenlaayawo, aFilisti yaakohana: “Entaphulela eheeni okhuweliwa iwo akonenlaayawo aYixrayeli? Esuwelakaru weera Arka* a Yave aaruuhiwa okonelingwe,

⁷ aFilisti yaahoova, eneera: “Miluku sohoorwa okonelingwe. Nooriheya! Kheenanikhumelele etthu siiyeela.

⁸ Ii! Nnoohaawa! Taani anaanitapuxe mmatatani mwa miluku sooweraxa iyo? Ti milukusene seiye saahoonxe awExipitu ni mahooxo oohiyanahiyana munikareni.

⁹ Mwiilipihe aFilisti! Mukhaleke ni mirima soolipa weera muhithatuwe ipottha sa aHeberi ntoko yaaraaya ipotthasanyu. Mukhaleke ni mirima soolipa ni ngwaneke!”

¹⁰ Vano aFilisti yaawana, enaawina aYixrayeli, ni aYixrayeli yaatthawela – khula mutthu muheemanimwawe. Aari noomala mutokotoko. Anakhotto a aYixrayeli yaakhwiiye yaari 30 000.

¹¹ Arka* a Muluku yaakuxiwa ni anamwane asilopwana eeli a Eli yaahookhwa.

Okhwa wa Eli

¹² Nihuku nenenenne muBenyamini aavenya mukhottoni atthimakelaka oXilo, awanreene soothaala ni areene mmuru etthayaru.

¹³ Aaphiyawe, Eli eera akilaantheene vahiceniwawe mukerekhere musewe. Aatthunkuruma awoovelaka Arka* a Muluku. Mulopwana ole aavolowa musidadeni anaathalihera sootheene seereiye ni amaki ootheene a musidade yaakhuwela.

¹⁴ Eli aahiiwa okhuweliwa iwe, anakoha: “Munyakunyaku owo onghimani?” Mulopwana ole aatthimaka weera amuthalihere Eli sootheene.

¹⁵ Owo aarino iyaakha miloko mithannamixexe ni ithannatthaaru sa oyariwawawe ni maithwaawe yaakotakota khoona.

¹⁶ Mulopwana ole aamweerela Eli: “Miyo kinoophiyaru okhottoni kitthangwewo olelo vaava.” Eli aamukoha: “Ekhumelenle eheeni, mwanaka?”

¹⁷ Namutthenga ole aamwaakhula: “aYixrayeli ahaatthawa aFilisti ni anakhotto ancipale ahookhwa. Mpaka anamwaniinyu eeli, Hofeni ni Pinehasi ahookhwa ni Arka* a Muluku aakuxiwa.”

¹⁸ Owo aaromolakaru Arka* a Muluku, Eli akilaantheene vahiceni aavilikitthuwela ottuli mukerekhere mulako. Aahinteya exikwaawe, anakhwa niwoko aahuuluvala ni aarilalaxa. Aari muhooleli a aYixrayeli wa iyaakha miloko mixexe.

¹⁹ Mwaara a mwaniye Eli, iitthaniwa Pinehasi eera arupanleene ahaleelaka oyara. Asuwelakaru weera Arka* a Muluku yaakuxiwa ni weera atatawe Eli vamoha ni aiyawe ahookhwa, aakurukuttuwa, anayara. Masooso a mooyarani yaamutepela.

²⁰ Ahaleelaka okhwa, asithiyana yaamukhavihera, yaamweerela: “Mulipe murima, moongyara mwaana mulopwana.” Wa soothesene, khaakunle naari khaapwantthe.

²¹ Aamutteha mwaana ole Ikabodi eeraka: “Ovuwa wookoongora oYixrayeli.” Eerenle yeeyo niwoko na okuxiwa wa Arka* a Muluku ni okhwa wa atatawe ni aiyawe.

²² Aaheeratho: “Ovuwa wookoongora oYixrayeli niwoko Arka* a Muluku aakuxiwa.