1 Samuweli 28 - Emakhuwa Bible

¹ Vamahukuni ale aFilisti yaahaathukumanyiha anakhottwaaya weera yaawaneno aYixrayeli. Akixi aamweerela Davide: “Osuwele nnene weera weyo ni asilopwanaawo onoonihoola okhottoni.”

² Davide aamweerala: “Vano nyuwo munoosuwela yeeyo murumeiyaanyu ongweraawe opaka.” Akixi aamwaakhula: “Paahi, kinimookhaliha namalipelelaaka a mahuku ootheene.”

Sawuli onimukohakoha muthiyana onuuluma mwa nsina na minepa

³ Vano Samuweli aahookhwa ni aYixrayeli ootheene yaahiinla okhwawawe. Yaamvitha musidadenimwawe oRama. Sawuli aawoomola mulaponi ootheene yaahera ihako ni yuuluma ni anamakhwa.

⁴ Afilisti yaathukumana, enarowa okonela oXunemi ni Sawuli aawiitthana aYixrayeli ootheene enakonela oGilibowa.

⁵ Sawuli awoonakaru anakhotto a aFilisti, aahoova anatteenguwa.

⁶ Aamukohakoha Yave, mene Yave khaamwaakhunle – naari moolohani, hata ni Urimi* hoye hoye ni maprofeeti.

⁷ Vano Sawuli aaweerela arumeiyaawe: “Mmwasaase muthiyana onuuluma ni minepa weera kirowe kamukohakohe.” Awosa yamwaakhula: “Ookhala mmoha wEnidori.”

⁸ Sawuli aahiitikinsiha, awaraka ikuwo sikina, anarowa ni ohiyu vamoha ni asilopwana eeli mpaka vaate wa muthiyana ole. Aamweerela muthiyana: “Okeemexere munepa wa nsina nno kineeraaka kooleele.”

⁹ Mene muthiyana aamwaakhula: “Moosuwela nnenesene yeeyo Sawuli opankaawe. Owo aawoomola ootheene ankoha minepa ni anahako ootheene mweelaponi ya oYixreyli. Vano onkirehererela heeni muraakho yoowo oneera okiive?”

¹⁰ Sawuli aamulipelela mwa Nsina na Yave: “Mwa Nsina na Yave – khamunthorihiwa niwoko na yeeyo.”

¹¹ Vano muthiyana aamukoha: “Kiwiitthaneleni taani?” Sawuli aamwaakhula: “Mukiitthanele munepa wa Samuweli?”

¹² Muthiyana ole oonakaru munepa wa Samuweli, aakhuwelaxa anamweerela Sawuli: “Mukilokontthenleni? Sawuli ti nyeenyu!”

¹³ Mwene aamweerela: “Ohoove. Onoonani?” Muthiyana aamwaakhula: “Kinoona ntoko munepa onkhuma vathi.”

¹⁴ Owo aamukoha: “Ori ekhalelo heeni?” Muthiyana aamwaakhula: “Ti mulopwana oowuuluvala awanreene mukaandyo.” Vano Sawuli aasuwela weera aari Samuweli, anuuramela vathi.

¹⁵ Samuweli aamukoha Sawuli: “Munkixupelani mukivenxaka kaaraaka?” Sawuli aamwaakhula: “Miyo koovalavelihiwa niwoko aFilisti anookiwanano ni Muluku ookihiya. Owo khankaakhula – hata ni maprofeeti naari moolohani. Tivawo kiwiitthannaakani okileela yooweera.”

¹⁶ Samuweli aamukoha: “Munkikohakoherani Yave oohingyeeneni athatuwaka Mwiittanaanyu?

¹⁷ Yave aapaka yeeyo aahimmaawe mwa miyo. Aahaahula omwene mmatatanimwanyu, anamvaha mukhwiinyu Davide.

¹⁸ Yave onoopakani yeeyo olelo, niwoko khamwiiwelenle, naari khankwanihenre isarasawe soowoopiha wa awAmaleki.

¹⁹ Yave onoowinnyererani nyuwo ni aYixrayeli mmatatani mwa aFilisti ni omaalo nyuwo ni anamwaniinyu munookhala ni miyo. Yave onoowinnyereratho anakhotto a aYixrayeli mmatatani mwa aFilisti.”

²⁰ Wootutuxereya Sawuli aamorela vathi emoopihaka masu a Samuweli. Ikurusawe saammalela niwoko aamala othana ni ohiyu wootheene ole ahicaaka.

²¹ Muthiyana ole amwaattamelakaru Sawuli ni oonakaru weera aahoopopiheyaxa, aamweerela: “Moone, murumeiyaanyu muthiyana oowiiwelelani. Kooleva okumaaka kipakaka yeeyo mukilamulenlaanyu.

²² Vano dyoontte mmwiiwe murumeiyaanyu. Muce vakhaani weera mphwannye ikuru soopwahererano mukwaahaanyu.”

²³ Owo aakhoota eeraka: “Nkintthuna oca.” Vanonto asilopwana yaamunyesereriha vamoha ni muthiyana ole, ni owo aawaakhulelasa. Sawuli aavenya vathi anakilaathi vakaamani.

²⁴ Woowaakuveya muthiyana aamwiiva mwaamombe ooneneva aarinaawe. Aakuxa ephepa vakhaani, aneetheya, anooxa ipaawu soohikhalano eferementu.

²⁵ Vano aamurumeela Sawuli ni asilopwanaawe, enacaasa. Ohiyuweene yoole yaavenya, enapwaha.