1 Samuweli 21 - Emakhuwa Bible

Davide ni ipaawu sootteeliheriwa

¹ Davide aarowa wuuluma ni musaserdoti* Abimeleki oNobi. Abimeleki aathukumela oovaka amukumananakaru, anamukoha: “Mukhalenleni meekhiinyu? Khaawo awiiye ni nyuwo?”

² Davide aamwaakhula musaserdoti*, Abimeleki: “Mwene ookilamulela etthu akeerelaka: ‘Ahikhale mutthu anaasuweleru etthu ela koolamulenlaakani ni kooxuttinghaakani.’ Wa asilopwanaaka – kohaalamulela weera nakumane vanipuroni niiwanannaahu.

³ Vano nyuwo munkivahani? Mukivahe ipaawu ithanu hoye hoye yakhalaru etthu muraanyuno.”

⁴ Vanonto, musaserdoti* aamwaakhula Davide: “Nkirino yooca ya khula nihuku. Ohiyanawaya, sookhalamo ipaawu sootteeliheriwa – anakhotto yaahikonano asithiyana, eceeke.”

⁵ Davide aamwaakhula: “Vekhaikhai hoye! Eyo ekhovelelowaahu imaara sootheene ninkhalanaahu mukwaha. Khannimutavaru muthiyana asilopwanaaka anniixiinanela wakhalaru mukwaha – wootepaxa olelo!”

⁶ Hiiho musaserdoti* aamvaha ipaawu sootteeliheriwa seenre sahikhala sooca sikina ohikhanle Ipaawu sa Okhala wa Yave mwa seiye aavenxalaawe vaNipuroni Nootteela* weera saakakhanyihiweke ni ipaawu sooviha.

⁷ Vano Doweki, ngwEdomi aari murumeiyi a Sawuli nitho mutokweene a akukhulaawe, aakhalawo nihuku nenenenne ekwaniheriwaka yoonyesererihiwa wa Yave.

⁸ Davide aamukoha Abimeleki: “Vaava nyuwo mookhalano nivaka hoye hoye ekatana? Nkirwaanne ekatana naari ikaphwitthi sikina niwoko mwene aakaakuvihiha.”

⁹ Musaserdoti* aamwaakhula: “Ekatana ya Goliyati, muFilisti mwa yoowo mwaamwiivenlaanyu vanreyareyani na wEla eri va evitikeleliwe mukuwoni wiithela mooxikootti a esaserdoti. Mwatthuna, mukuxeke. Kheewowo ekatana ekina.” Davide aamweerela: “Yooreerela ti ela. Mukivahe.”

Davide ontthawela oGati

¹⁰ Nihuku nne Davide aamutthawa Sawuli, anarowa omwaasa Akixi, mwene a oGati.

¹¹ Wa soothesene, murumeiyi mmoha a Akixi aamweerela: “Ola ti Davide, mwene a elapo ya oYixrayeli. Ti yoole yaamuttottopelaaya yiinaka: ‘Sawuli aawiiva ancipale, vaheera Davide oompwahaxa.’”

¹² Davide iiwakaru masu ale, aamoova Akixi, mwene a oGati.

¹³ Tivawo iisikineihalaawe vamaithoniwaya; areene ni yaawosa mweettelowaawe waari hiiho. Aakhera milako sa isidade akhumaka ittiindi.

¹⁴ Akixi aaweerela arumeiyaawe: “Mmoone mulopwana ola! Ti oosikineya! Mwaamuruuhelasani?

¹⁵ Ahaatta masikini – khoontthuneya okiruuhela mulopwana oohikwanakwana ohoolowaka. Orweenleni mpaanimwaka?”