1 Samuweli 20 - Emakhuwa Bible

Onthamwene wa Davide ni Yonatani

¹ Vano Davide aatthawa oNayoti oRama, anarowa wuuluma ni Yonatani, amukohaka: “Kipankeni? Yootakhala heeni kipankaaka? Kaatthekenleni atithinyu woowaasaasera okiiva?”

² Yonatani aamwaakhula: “Hata vakhaani! Khamuniiviwa! Moone, atithaka kheewo eneeraaya epake ehikileenle, ettittimiheye naari ehittittimiheye. Yaahikikhuweleni yeeyo miyo? Khaveetthuwo.

³ Wa soothesene, Davide aalipela eeraka: “Atithinyu ansuwela nnenesene weera miyo koowiiraananani enuupuwela: ‘Yonatani ahisuwele yeela weera ahithanane.’ Kinlipela mwa Nsina na Yave – vekhaikhai – weera okhwa wookikhuveela.”

⁴ Yonatani aamweerela Davide: “Miyo kinimoopakelani yeeyo muntthunaanyu.”

⁵ Vano Davide aamweerela: “Moone, omaalo ti efesta ya mweeri munyowani ni ontthuneya weera kace vamoha ni amwene, mene mukihiyeke kiroweke kiipitheke ntuphini mpaka ohiyu wa omurotto.

⁶ Atithinyu yakaasaasa, mwaaleele: ‘Davide aakinyeserera omutthunihera orowa esidadaawe, oBeteleheemu, niwoko na sooveleela sa vayaakhani simpakeliwawo munihimonimwawe nootheene.’

⁷ Awo yeera: ‘Khaveetthu,’ vano murumeiyaanyu onoolipa mmakhuvani. Vaheera awo yaanyoonyaxiwa, musuwele nnenenesene weera aalakela okipakela yoonanara.’

⁸ Wa nyuwo, mmoonihere murima wooreera murumeiyaanyu niwoko nohiiraana vamaithoni wa Yave. Miyo kaarino nthowa, vano mukiive nyeenyuweene. Khoontthuneya okirongha wa atithinyu.”

⁹ Yonatani aamweerela: “Hata vakhaani! Miyo kasuwela weera vekhaikhai atithaka aalakela oowiivani, kinlipela weera kinimooleelani.”

¹⁰ Davide aamukoha: “Taani anaakithalihere atithinyu yawaakhulani ni owali?”

¹¹ Yonatani aamweerela: “Ngwe, nirowe ntuphini.” Vano yaarowa

¹² ni Yonatani aamweerela Davide: “Kinoororomelihani mwa Nsina na Yave, Muluku a aYixrayeli, weera, ehinaaye ophiyera ehuhu siiyeela omurotto, kinimwaatholathola atithaka! Hiiho kinoosuwela moota angwuupuwelelaayani ni kinimootiinelani.

¹³ Vaheera atithaka yatthuna woopakani yoonanara, Yave akittaruxe miyo kaahoosuwelihani kihoohiyakani murowaka oolipeene. Yave akhaleke ni nyuwo ntoko aaraawe ni atithaka.

¹⁴ Vanonto, miyo kapwaherera ni okumi, mukireereliwe ni onnene wa Yave;

¹⁵ Vaheera kakhwa, muhihiye opakela onnene emusaaka, naari Yave aamalihaleene amwiittana a Davide mweelaponi.”

¹⁶ Hiiho Yonatani aahiiwananano emusi ya Davide eeraka: “Yave aattaruxe amwiittana a Davide.”

¹⁷ Yonatani aamunyesereriha Davide ophitela nlipelonawe niwoko noomusivela, eenre akhala nthamwenaawe a vamurimani.

¹⁸ Vano Yonatani aamweerela Davide: “Omaalo ti efesta ya mweeri munyowani. Atthu animoona weera nyuwo khamuwowo niwoko ehicaanyu kheekilaathiwa.

¹⁹ Omurotto, murowe vanipuroni mwiipinthaanyu ehuhuweene yeele mulattu ola waapaceraaya. Vano mwawehererewo vanlukuni na wEzeli.

²⁰ Miyo kinoolathelawo nyuumpa miraru ntoko kintthuna olathela.

²¹ Vahoolowaya kinoomurumiha mmiravo waasaasa nyuupa. Vano kamukhuwelela: ‘Nyuumpa iyo siri wenno wenno, okiruuhele,’ nyuwo murweeke niwoko kinlipela mwa Nsina na Yave weera mmwikhale oolipeene. Kheekhalaru yoowoopiha.

²² Vaheera, miyo kamukhuwelela: ‘Woone, nyuupa iyo soorakamela,’ vano mpwaheke niwoko Yave onolamulelani opwaha.

²³ Namoona a wiiraanawahu woohimala ti Yave.”

²⁴ Vano Davide aahiipitha ntuphini ni yaaphiyenraaya efesta ya mweeri munyowani, Sawuli aakilaathi weera ace.

²⁵ Aakilaathi vanipuroni aakhovelenlaawe muxerexere exiri, ohoolo wa Yonatani, ni Abeneri aattamanne ni Sawuli, mene ehice ya Davide khayaakilaathiwe.

²⁶ Sawuli kheenre etthu nihuku nne, niwoko uupuwela: “Yookhala emukhumelenle Davide yoowiinanela. Vekhaikhai owo khatteenle.”

²⁷ Mene oxaawaya, nihuku nanaaveli na efesta ya mweeri munyowani, ehice ya Davide nlelo khayaakilaathiwe. Vano Sawuli aamukoha mwaniye Yonatani: “Mwaana a Yixai ohirweenleni oca okhuma osilo mpaka olelo?”

²⁸ Yonatani aamwaakhula: “Davide aakidyoonttelela omutthunihera orowa oBeteleheemu.

²⁹ Aakivekela: ‘Mukitthunihere orowa, niwoko emusaahu enrowa opaka yooveleela musidadeni ni amunnawaaka aakilamulela okhalawo. Mwatthuna okoonihera murima wooreera, mukitthunihere orowa weera kawoone axunnaka.’ Tivawo owo ohirwiiyaawe vameesa wa mwene.”

³⁰ Sawuli aamunyoonyeriwa Yonatani anamweerela: “Weyo mwaana a muthiyana oonanara ni oovaanya! Koosuwela weera woomukhavihera mwaana a Yixai wiixuulihihaka muru nitho yoole ooyanre!

³¹ Vano mwaana a Yixai akhalaka ni okumi, okhuma weyo mpaka omwenaawo khootekiheya. Olamule wiitthaniwa okiruuhele, niwoko owo ontthuneya okhwa!”

³² Yonatani aahaakoha atithawe: “Anaakhweleni? Owo opankeni?”

³³ Wa soothesene, Sawuli aavonya nivaka weera amwiive. Vano Yonatani aasuwela weera atithawe yaalakela omwiiva Davide.

³⁴ Yonatani aavenya vameesa oonyoonyiweene. Nihuku nanaaveeli nne na efesta ya mweeri munyowani owo khaaciiye oothananeene niwoko atithawe yaamuyeviha Davide.

³⁵ Oxeexeloweene Yonatani aarowa otuphini weera amukumanane Davide mweehuhuni yaalanghannaaya. Aamurowano mmiravo,

³⁶ anamweerela: “Otthimakeleke nyuupa kineeraaka kilathe. Vano mmiravo aatthimaka, ni Yonatani aalatha muupa ampwahihaka.

³⁷ Mmiravo ole aphiyakaru vanipuroni waamorenlaaya muupa, Yonatani aamukhuwelela: “Muupa owo khookhanle ohoolo iwo?”

³⁸ Vano aakhuwela: “Nrowe! Waakuveyeke! Oheemele!” Mmiravo ole aattotta muupa, anahokolowa,

³⁹ ahisuwelaka etthu – aasuwenle ti Yonatani ni Davide yalanghannaaya.

⁴⁰ Vano Yonatani aamwinnyerera mmiravo ikapwitthisawe, anamulamula: “Orowekeno osidade.”

⁴¹ Apwahakaru mmiravo, Davide aahiithupululela mpatta wa ohitto wa nluku, anamuuramela Yonatani imaara tthaaru, ekhovaawe attittihaka vathi. Vano yaalaxerana ni ebeecu, yiinlasaka – ootepaxa wiinla aari Davide.

⁴² Yonatani aamweerela Davide: “Muroweke mmuretteleni, niwoko noororomelihana onthamwene mwa Nsina na Yave neeraahu: ‘Yave ti Namoonaahu variyariwahu ni variyari wa ekhapiraanyu ni ekhapiraaka wa mahuku ootheene.’” Vanonto Davide aapwaha ni Yonatani aahokoleela osidade.