1 Samuweli 2 - Emakhuwa Bible

Nivekelo na Hana

¹ Vahoolowaya Hana aavekela, eeraka: Murimaaka onimutthapela Yave; mwa Yoowo koolipihiwa. Kinoowera waatheya amwiittanaaka kihakalalelaka, okitapuxawanyu.

² Khawowo mukina ootteela ntoko Yave; Owo ti oohilikanxereya; khawowo mwala ntoko Mulukwaahu.

³ Muhuulume ngwiixoonani hata mmwaanomwanyu ohikhume wiikuxerera, niwoko Yave ti Muluku musuweli ni Owo onthoriha miteko sa atthu.

⁴ Nyuupa sa anakhotto ooweraxa sohintakiwa, mene oolosowa aasareya ikuru.

⁵ Yaareenle anoolola, mene yaahaangwe khaamvoliwa. Yoole aari mwali eekupa ohaayara anamwane athanneeli, vaheera yoole aarino anamwane ancipale oothova.

⁶ Yave onlamula okhwa ni okumi; Owo onnakuruxela mookhwaani ni onnakhumihamo.

⁷ Ti Yave omvaha ohaawa ni opuha; Owo onnayeviha ni onnunnuwiha.

⁸ Owo onnantatha ntthupi mulipa oohaawa amvenxaka vattuurani. Owo onaakilaathiha anamwane a mwene aavahaka nipuro noottittimiheyaxa. Mathipelo a elapo ya vathi ari a Yave ni mwa yaawo ookhaliha elapo.

⁹ Owo onnathokorora inaawo sa ootteela, vaheera atakhali anoomaalihiwa mweepiphini. Mutthu khangwina niwoko na ikuruxa;

¹⁰ yaale ari amwiittanaawe Yave anoophwatiwa. Wiirimu Owo onoowoopelasa etari; Yave onoothoriha elapo yootheene. Owo onoomvaha ikuru mwenaawe, amulipihaka oovariwaawe.

Anamwane asilopwana ootakhala a Eli

¹¹ Vahoolowaya Elikana aarowa owaani, vaheera mwaana ole aapacera omurumeela Yave vamaithoni wa musaserdoti* Eli.

¹² Vano anamwane asilopwana a Eli yaari oohuureya; awosa khayaampwatthela Yave.

¹³ Yaari ekhovelelo variyari wa musaserdoti* ni atthu weera imaara sootheene mukina aapakaka yooveleela ni enama nlelo yiitthwaka, murumeiyi a musaserdoti* aarwa ni ekhope ya maino mararu mmatatanimwawe.

¹⁴ Annaruulamo mmwaapuni, naari muyoopweni hata munceconi hoye hoye mukarikhoni iiruulelaka yeeyo aahomaawe ni ekhope ya maino mararu. Annaapakela hiiho aYixrayeli ootheene yaarowa oXilo.

¹⁵ Vanonto, ehinaaye otothowa makhura, murumeiyi a musaserdoti* annarwa amweerelaka mulipa oovaha yooveleela: “Mumvahe musaserdoti* entthuri weera ooxe; owo khantthuna enama yoowaapeiwaru, ontthuna paahi ekithi.”

¹⁶ Mulopwana aamweerela: “Ngweherere toko etothoweke makhura vahoolowaya mukuxeke yeeyo muntthunaanyu,” murumeiyi onnaakhula: “Hoye, mukivahe vaanaano. Mwaahikivaha, kinoowaakhani.”

¹⁷ Yoottheka ele ya amiravo yaari yootepaxa vamaithoni wa Yave, niwoko awosa khayaahelela yooveleeleliwa Yave.

Mwaana Samuweli oXilo

¹⁸ Vano Samuweli areene nlelo mmiravo annarumeela vamaithoni wa Yave awanreene mukaandyo wa eliinyu*.

¹⁹ Khula eyaakha amayawe yannamuttotthela mukaandyo mukhaani, emukuxeraka owo yaarowaaya ni aiyaya weera yapake yooveleela ya khula eyaakha.

²⁰ Khula emaara yaarowaaya, Eli annamureeliha Elikana ni mwaariye eeraka: “Yave oovaheeni anamwane ni muthiyana ola vanipuroni na yoole owo aamvekenlaawe Yave, anamvaha.” Vahoolowaya yannahokoleela owaani.

²¹ Vanonto Yave aamoonihera onnene Hana. Owo aahaayara anamwane asilopwana araru ni asithiyana eeli. Eyo eri hiiho, Samuweli aahunnuwa vamaithoni wa Yave.

Nthorihelo na vaate wa Eli

²² Eli, uuluvalanxeene, aasuwela sootheene anamwanaawe asilopwana yaapakelaaya aYixrayeli ootheene ni weera yannaakonano asithiyana yaarumeela vamulako wa Eheema ya Muthukumano*.

²³ Tivawo aakohansaawe: “Mumpakelasa heeni itthusene seiya? Mpaka miyo kiniiwaaka muloko mwaha wa soonanara nyuwosa mumpakaanyu.

²⁴ Hoye anamwanaaka, kheereenre yeeyo kiniiwaaka emwareelaka variyari wa muloko wa Yave.

²⁵ Mukina amutthekela mukhwaawe, enoowereya weera Yave onoomukhavihera, mene mulopwana amutthekela Yave, taani anaamukhavihere?” Wa soothesene, anamwanaawe khayiiwelela ohiiha wa atithaya, niwoko Muluku aatthuna owiiva.

²⁶ Mmiravo Samuweli eera unnuwaka imaara sootheene amusivelihaka Yave ni muloko.

²⁷ Vanonto mulopwana mmoha a Muluku aamwaattamela Eli, anamweerela: “Yave oneera ha: ‘Kaahiixoonihera vaate wa atitthinyu awosa yaaraaya wExipitu elamuliwaka ni Farawu*.

²⁸ Kaahaathanla atithinyu variyari wa ipuumba sootheene sa aYixrayeli weera ekhale musaserdotaaka, ewaattamele altaaraaka*, ehise erubani* ni engwanreene mooxikootti a esaserdoti vamaithoniwaka. Kaavahatho vaate wa atithinyu sooveleela sootheene soohisiwa ni aYixrayeli.

²⁹ Mundererela heeni sooveleeleliwasaka kilamulenlaaka woomakawaka? Munaattittimiherela heeni anamwaniinyu okipwaha Miyo mwaahiyaka enenevelaka mipatta sooreerela sa sooveleela sootheene soopakiwa ni mulokwaaka aYixrayeli?’

³⁰ Tivawo Yave Muluku a aYixrayeli ohimmaawe: ‘Kaaroromeliha weera emusaanyu ni emusi ya atithinyu yaamukirumeela wa mahuku ootheene vamaithoniwaka.’ Vaheera vano Yave onghima: ‘Hata vakhaani! Kinimwaattittimiha yaale ankittittimiha ni yaale ahinkihelela Miyo nkaahelela.

³¹ Yoophiya ehuhu Miyo kineeraaka kimalihe ikurusanyu ni ikuru sa emusi ya atithinyu moota wooweera khakhalaru namuuluvala mweemusinimwanyu.

³² Mmoone makacamiho Mpaanimwaka. Naari aYixrayeli siweettelaka nnene, mweemusinimwanyu khaawo anuuluvalaxe.

³³ Ekhapiraanyu yeeyo kineeraaka kihimalamalihe valtaariniwaka* eniyuureleliwe weera ewiinleleni ni weera yoothananeleni. Aani ekhapiraanyu yootheene eniikhwe eri ekithi.

³⁴ Yeeyo eniyaakhumelele anamwaniinyu asilopwana eeli eniikhale eneneerowaanyu – ooweeli eniikhwe nihuku nimoha.

³⁵ Kinimwiikhalihera musaserdoti* oororomeleya mwa yoowo aneette ntoko kintthunaaka ni muupuwelowaaka. Kinookhaliha nnenesene emusaawe ni owo onoorumeela mahuku ootheene vamaithoni wa oottikittheliwaaka.

³⁶ Ehuhuweene yeeyo ootheene eniihale mweemusinimwanyu eniirwe emukokhorelaka yoowo weera ephwanye nikhoobiri na eparatha* ni yooca vakhaani. Eniimudyoonttelele: “Mukivahe wakhalaru muteko wa esaserdoti weera kiphwanye yooca.”’”