1 Samuweli 19 - Emakhuwa Bible

Yonatani onimudyoonttelela Sawuli mwaha wa Davide

¹ Sawuli aahuuluma ni mwaniye Yonatani ni arumeiyaawe ootheene eerelaka omwiiva Davide. Mene Yonatani annamusivela Davide,

² anamoopereraxa: “Atithaka Sawuli anaasaasa owiivani. Omaalo oxeexelo mwiipasoope. Murowe mwiipithe ni mwakhalewo.

³ Miyo ni atithaka nnoovenya nirowaka weiwo muneeraanyu mwiipithe. Kinimuulumano yaawo mwaha wa nyuwo ni seiyo kineeraaka koonelele, kinimoothaliherani.”

⁴ Yonatani aahuuluma nnenesene ni atithawe sa Davide aweerelaka: “Amwene muhimpake yoonanara murumeiyaanyu Davide, niwoko owo kheewo oopahunlaaweni; ohiyanawaya yeeyo opankaawe yohaaruuhela mpuha amwene.

⁵ Aaleva okumaawe amwiivaka muFilisti. Yave ohaawiniha vancipale aYixrayeli ootheene; nyeenyuweene mohoona sootheene munahakalalela. Mmumpakele heeni yoonanara oohinthowa ntoko Davide, mmwiivaka woohikhala niwoko?”

⁶ Sawuli aamwaakhulela Yonatani, analipela: “Kinlipela mwa Nsina na Yave weera Davide khiiviwa.”

⁷ Hiiho Yonatani aamwiitthana Davide, anamuthalihera mwaha wootheene. Aamurongha wa Sawuli ni Davide aahokoleela omurumeela sawuli ntoko woopacera.

Mikali onimukhavihera Davide omutthawa Sawuli

⁸ Emaara ekinatho yaakhumelela ekhotto ni Davide aarowa waawanano aFilisti. Owo aahaawinaxa ni awosa yaamutthawa.

⁹ Vanonto munepa woonanara waarumihiwe ni Muluku waamukhuruwela Sawuli owo akilaathiyeene mpaanimwawe avarenleene nivakanawe. Davide eera amwiipaka makita,

¹⁰ Sawuli aaheerera omuphitaanyera vaxirini ni nivakanawe, mene Davide aarapela, nivaka nihomaka vaxirini. Vano Davide aatthawa.

¹¹ Ohiyuweene yoole Sawuli aahaarumila asilopwana akina vaate wa Davide weera yangwehawehe ni yamwiive oxeexelo. Vaheera Mikali, mwaarawe Davide, aamooperera: “Mutthaweke ohiyu ola weera muhiiviwe oxeexelo.”

¹² Vano Mikali aamukhumihera Davide vaxanelani, anatthawa.

¹³ Mikali aakuxa ettuusittuusi ya nihimo, anaatalela vabeettini, aniikaathera yoophiteera waamuru ya mapururu a ipuri.

¹⁴ Ephiyakaru asilopwana aarumihalaawe Sawuli weera emvare Davide, Mikali aaweerela: “Owo onoovoreiwa.”

¹⁵ Vano Sawuli aahaahokoloxeratho vaate wa Davide aweerelaka: “Mwamuruuhe nno ni ebeettaaweene weera kimwiive.”

¹⁶ Vaheera asilopwana evolowakaru, yaaphwannye paahi ettuusittuusi vabeettini ni yoophiteera waamuru ya mapururu a epuri.

¹⁷ Sawuli aamukoha Mikali: “Heeni okilokhottenleni mooteene yoola onamuhiya mwiittanaka atthawaka?” Mikali aamwaakhula: “Owo aakeerela: “Mukihiyeke kitthawe kihinaaye owiivani.”

Davide onimukumanano Samuweli oRama

¹⁸ Atthawakaru Davide, aarowa wuuluma ni Samuweli oRama, anamuthalihera sootheene Sawuli aampakenlaawe. Vano owo ni Samuweli yaarowa oNayoti, enakhalawo.

¹⁹ Sawuli aaleeliwa: “Davide ori oNayoti, oRama,”

²⁰ Tivawo aalamulenlaawe asilopwana weera yamvare. Mene awosa yoonakaru mukuttula wa maprofeeti othaliheraka otthuna wa Muluku, Samuweli areene eriyaraaya ntoko muhoolelaaya, Munepa wa Muluku waahaakhuruwela asilopwana a Sawuli ni awosatho yoonnewene ethaliheraka otthuna wa Muluku.

²¹ Sawuli aahiiwa sa yeeyo, aarumiha mukuttula wanaaveeli ni awosatho yoonnewene ethaliheraka otthuna wa Muluku. Vahoolowaya aarumihatho mukuttula wanaararu ni mpaka awosatho yoonnewene ethaliheraka otthuna wa Muluku.

²² Ommaleloni owo muneenaawe aarowa oRama, anaphiya vahimeni etokotoko ya oSeku. Owo aahaakoha atthu a weiwe: “Ori woowi Samuweli ni Davide?” Awo yaamwaakhula: “oNayoti, oRama.”

²³ Vano Sawuli aarowa oNayoti, oRama. Wa soothesene, Munepa wa Muluku waamukhuruwela ni owo oonnewene athaliheraka otthuna wa Muluku ni ephiro mpaka ophiya oNayoti.

²⁴ Weiwo owo aarula soowarasawe, anathalihera otthuna wa Muluku vamaithoni wa Samuweli. Anamorela vathi pwitipwiti nihuku nenenne ni ohiyuweene yoole. Tivawo yeeriwaaya: “Sawulitho omphwanyaneya variyari wa maprofeeti?”