1 Samuweli 17 - Emakhuwa Bible

Davide ni Goliyati

¹ aFilisti yaahaathukumanyiha anakhottwaaya weera ewane ethukumanaka oSoko, elapo ya oYuda. Yaakonelasa wEfesi-Damimi, eriyari ya oSoko ni wAzeka.

² Sawuli ni aYixrayeli yaathukumana ekonelaka vanreyareyani na wEla. Yaathataanela waawanano aFilisti.

³ aFilisti yaakhala vanttumuxani nimoha ni aYixrayeli vanttumuxani nikina, nreyareya nreene eriyaraaya.

⁴ Nakhotto ooweraxa iitthaniwa Goliyati aari muGati, aakhuma yaakonenlaayawo aFilisti. Orakamawawe aahaleenle ophiya imeetru* tthaaru.

⁵ Aawara ekapasete ya ebronze* vamuruwawe ni yoowiixaakihera ya makaangaru a ebronze, olemelawaya waari wookwanaka ikiilu* miloko mithannamosa.

⁶ Mmipandyeni aawara iyuuma sa ebronze* akapantteene nivaka na ebronze.

⁷ Mwiitti wa mvitto wa nivakanawe waalikana etthaabwa ya maakina ootthavelano ni nivakanene naalemela ikiilu* ithannapiili. Mmiravowaawe aamukuxera kapwitthi ti aahoolenle.

⁸ Goliyati aaheemela anaakhuwelela anakhotto a aYixrayeli: “Heeni mwiireherenraanyu weera ngwane? Miyo muFilisti ni nyuwo muri arumeiyi a Sawuli. Munthanleke mulopwana mmoha weera akiwanane.

⁹ Owo awera owana ni miyo, anakiwina, hiyo nnookhala ipotthasanyu, vaheera miyo kamuwina mpaka omwiiva, nyuwosa munookhala ipotthasahu, munirumeelaka.”

¹⁰ muFilisti aapwaherera: “Olelo kinimwaaderera anakhotto a aYixrayeli. Mukirumihele mulopwana weera kingwanane.”

¹¹ Sawuli ni aYixrayeli ootheene yiiwakaru masu a muFilisti, awosa waawuuma owanoni enatteenguwa.

¹² Vanonto, Davide aari mwaana mulopwana a ngwEferati iitthaniwa Yixai, mwa yoowo aakhala oBeteleheemu oYuda. Yixai aakhalano anamwane asilopwana athannaararu ni mweehuhuni ya Sawuli Yixai ole aakwaaxeya.

¹³ Anamwane araru oopacera a Yixai yaarowano Sawuli okhottoni. Antthaara iitthaniwa Eliyabi, anaaveeli Abinadabi ni anaararu Xama.

¹⁴ Davide aari neetthaako. Anamwane araaru oopacera awo yaarowano Sawuli,

¹⁵ mene Davide annarowa aakonenlaawewo Sawuli, khula emaara ahokolowaka weera acihe ikhondoolo sa atithawe oBeteleheemu.

¹⁶ Khula oxeexelo ni oxekuwa wa mahuku miloko mixexe, muFilisti annaphiya eemelaka hiihaale.

¹⁷ Vanonto Yixai aamweerela mwanawe Davide: “Waakuxere axunneiyo ikiilu* miloko miili ni piili sa etrigu yoowaarikiwa ela ni ipaawu muloko iya, otthimakihere okonelingwe.

¹⁸ Omukuxeretho mutokweene a anakhotto ikeixu* muloko iya. Woone moota araaya axunneiyo ni okiruuhele ihaalisaya.

¹⁹ Awosa ari ni Sawuli ni asilopwana ootheene a aYixrayeli vanreyareyani na wEla yaawananaka aFilisti.”

²⁰ Waaxiiye oxeexeloxa Davide aamuhiyera muhuwo mukukhuli mukina, anamurowano pooso ntoko Yixai aamulamulenlaawe. Aaphingye waakonelingwe anakhotto erowaka othataanela owana ekhuwelelaka ekhotto.

²¹ aYixrayeli ni aFilisti yaathataanelasa owana ooluluwaneene.

²² Davide aahiya sootheene aakuxalaawe amuhiyeraka namawehaweha a sooreela sootheene, anatthimakela waawaniwa weera asuwele moota yaaraaya axunneiye.

²³ Owo uulumaka hiihaale ni yaawosa, Goliyati, muFilisti, namaweraxa owana a oGati, aahaasuseerela aadeereraka aadeererelaawe ni Davide aahiiwa yeeyo.

²⁴ aYixrayeli emoonakaru mulopwana ole, yaamwareya emoovaxaka.

²⁵ Vano aYixrayeli yaaheerelana: “Moomoona nnenesene mulopwana ole? Owo onoodereratho muloko wa aYixrayeli. Mwene oororomeliha mihakhu sincipale wa yoowo anaamwiive. Mpaka onoomutheliha mwanawe muthiyana ni emusi yootheene ya atithawe kheeliva musoko oYixrayeli.”

²⁶ Davide aahaakoha asilopwana aattamannaaweno: “Ntthuvelo heeni aneeraawe aakhele mulopwana yoowo anaamwiive muFilisti owo, aakihaka ottittimiheya wa aYixrayeli? muFulisti heeni yoowo oohiineliwa onaadeerera anakhotto a Muluku mukumi?”

²⁷ Awosa yaamuphitela Davide yeeyo yaahimmaaya emweerelaka: “Ti yeeyo aneeraawe aakhele yoowo anaamwiive.”

²⁸ Vano Eliyadabi, amunnawaawe atokweene Davide aamwiiwaawe alokololaka hiihaale ni asilopwana, aamunyoonyeriwaxa, anamukoha: “Orweenleni wenno? Waahingye naani axikhondoolo munikareni? Koosuwela weera weyo ti oowiikuxa ni ootakhala murima. Orweenle woona ekhotto paahi.”

²⁹ Davide aamwaakhula: “Kipankeni? Kimmwaasa wuuluma paahi.”

³⁰ Vahoolowaya aamurukunuwela mulopwana mukina, anamukoha mooteene yoowo. Ni mulopwana owo aamwaakhula ntoko woopacera.

³¹ Masu a Davide yaahiiwiwa ni Sawuli, tivawo aaruminghaawe oroweliwa Davide.

³² Davide aamweerela Sawuli: “Ahikhale anaamuthukumele muFilisti ole. Murumeiyaanyu onoorowa omuwanano.”

³³ Sawuli aamwaakhula Davide: Weyo khoophwanenle ongwanano muFilisti ole; ori mmiravo paahi ni owo nakhotto okhuma enamwanaawe.”

³⁴ Wa soothesene, Davide aamwaakhula Sawuli: “Murumeiyaanyu onciha ikhondoolo sa atithawe. Vano mwatto hoye hoye ursu* aavaraka ekhondoolo ya muhuwo,

³⁵ miyo kinnamuttharelela, kimmanaka ni kimwaakhaka ekhondoolo mmwaanomwawe. Mwaamunama owo akirukunuwela, kinoomvara ittwattwara, kimmanaka mpaka okhwa.

³⁶ Murumeiyaanyu aamwiiva mwatto ni ursu*. muFilisti oohiineliwa ole anaakhale ntoko mmoha a yaawosa, niwoko ohaaderera anakhotto a Muluku mukumi.

³⁷ Yave, mwa Yoowo okitapunxe mmankharuni a mwatto ni ursu* onookivuluxa mmatatani mwa muFilisti ole.” Sawuli aamweerela Davide: “Orowe. Yave akhaleke ni weyo.”

³⁸ Sawuli aakuxa ikarumasawe sa okhottoni, anangwariha Davide. Aangwariha mmuru ekapasete ya ebronze* ni yoowiixaakihera ya vakakasani.

³⁹ Davide aaherera ekatanaawe muyuununi aneerera weetta, niwoko khaakhovelenle seiye. Vano aamweerela Sawuli: “Nkingwera weettano iya, niwoko nkikhovelenle.” Vanonto aarula sootheene.

⁴⁰ Aakuxa ekopwaawe mmatatanimwawe, anathanla maluku mathanu oovilikeya vanxaapwani, anahela mmurupani mwa mukukhuli ni akunxeene ekwambala, aamurowela muFilisti.

⁴¹ Eyo eri hiiho, muFilisti ni mmiravowaawe aamukuxera kapwitthi areene ohoolowawe, aamuciceera Davide.

⁴² Angwehexexakaru, aahoona weera aari mmiravo paahi oophwaneliwa ni ooreera nnenesene. Ni owo aamveihera Davide.

⁴³ Owo aamweerela Davide: “Weeraka miyo mwalapwa mpaka okirweela ni ikopo?” Ni muFilisti aamulapha Davide mwa nsina na milukusawe.

⁴⁴ Aaheeratho: “Orweeke wenno weera kivahe erutthwaawo ipalame sa wiirimu ni axinama a ntuphini!”

⁴⁵ Davide aamweerela muFilisti: “Weyo onkaattamela okunxeene ekatana, nivaka ni momba, vaheera miyo kinimoowanano mwa Nsina na Yave a ikuru sootheene, Muluku a anakhotto a aYixrayeli, mwa yaawosa weyo onaadereraawo.

⁴⁶ Olelo Yave onoowinnyerera mmatatanimwaka ni miyo kinimoohita. Olelo vaava kinoovaha mittembo sa anakhotto a aFilisit ipalame sa wiirimu ni axinama ooluwa a ntuphini ni elapo ya vathi yootheene enoosuwela weera ookhala Muluku oYixrayeli!

⁴⁷ Ootheene ari va eniisuwele weera Yave khangwina avarelaka muteko ekatana hoye hoye nivaka. Ekhotto eri yawawe ni Owo onoowinnyererasani ootheene nyuwo mmatatanimwahu.”

⁴⁸ muFilisti amwaattamelaka weera angwaneno yoowo, Davide aatthimakela yaathatanaayawo aFilisti.

⁴⁹ Aavolongha ntatanawe munrupani, anahawula nluku, anasokotta amvonyaka Goliyati, anammana vayuuci. Nluku nne naahiiwomela vayuuci ni Goliyati aamorela vathi oowiipopheyeene.

⁵⁰ Hiiho Davide aangwina muFilisti ni ekwamba ni nluku nimoha ahikunxeene ekatana, anammoroxa, anammana muFilisti, amwiivaka.

⁵¹ Davide aatthimaka, anamunyikalela. Aamuhulula ekatanaawe, anamuhitelano yeeyo. Afilisti yoonakaru weera nakhottwaaya ooweraxa ohiiviwa, yaarukunuwa, enatthawa.

⁵² Vano anakhotto a oYixrayeli ni a oYuda yaarowa ohoolo, enakhuwela, enaattharelela aFilisti mpaka vamulako wa oGati ni wa wEkeroni. Mittembo sa aFilisti saasarasara mmuseweni wootheene wa oXaarayimi mpaka oGati ni wEkeroni.

⁵³ aYixrayeli ehokolowaka yaattharelenlaayawo aFilisti, yaahuhula sootheene saari yaakonenlaayawo.

⁵⁴ Davide aakuxa muru wa muFilisti, anaroiha oYerusaleemu, aniikaathi ekatana ya muFilisti muheemanimwawe.

⁵⁵ Sawuli amuwehaka Davide amurowelaka omuwanano muFilisti, aamukoha Abeneri, mutokweene a anakhotto a aYixrayeli: “Abeneri, mmiravo ole mwaana awani?” Abeneri aamwaakhula: “Amwene, nkisuwenle hata vakhaani.”

⁵⁶ Mwene aamweerela: “Mwaasaase waasuwela atitthawe.”

⁵⁷ Davide ahokolowakaru aamwiivalaawe muFilisti, Abeneri aamurongha wa Sawuli. Davide nlelo eera akuxaleene muru wa muFilisti.

⁵⁸ Sawuli aamukoha: “Weyo mwaana awani?” Davide aamwaakhula: “Miyo mwaana a murumeiyaanyu Yixai a oBeteleheemu.”