1 Samuweli 15 - Emakhuwa Bible

Sawuli onaawina awAmaleki amoopolaka mwenaaya

¹ Samuweli aamweerela Sawuli: “Yoole Yave aamuruminghaawe weera oovareni omwene wa mulokwaawe aYixrayeli ti yoomi. Tivawo mwiiwe mutthenga wa Yave.

² Yave a ikuru sootheene eenre ha: ‘Miyo kinimwaattaruxa awAmaleki niwoko na yeeyo yaapakenlaaya aYixrayeli yaawananaka, awosa ekhumaka wExipitu.

³ Vano murowe ni mwaawaneno awAmaleki mphwataka soothesene siri sawaya. Muhimuurele mutthu; mwawiiveke asilopwana, asithiyana, anamwane, ooyariwa vaanaano, imombe, ikhondoolo, ikamelu* ni abuuru.’”

⁴ Hiiho Sawuli aawiitthana anakhotto aathukumanyihaka oTelayimi – anakhotto 200 000 ni asilopwana macira macireene muloko a oYuda.

⁵ Sawuli aarowa esidade ya awAmaleki, anawiipithiha anakhottwaawe munxaapwani.

⁶ Vahoolowaya aaweerela aKeni: “Mvenyase wa awAmaleki weera kihoophwateni vamoha ni yaawo, niwoko mwaawoonihera murima wooreera aYixrayeli yaakhummaaya wExipitu.” Vano aKeni yaavenya wa awAmaleki.

⁷ Vanonto Sawuli aahaawanano awAmaleki ephiroweeneeyo okhuma oHavila mpaka oXuri, mpatta ninkhuma nsuwa wa wExipitu.

⁸ Aamvara Agagi, mwene a awAmaleki, awiivaka atthwaawe ootheene ni ekatana.

⁹ Vaheera Sawuli ni anakhotto yaamuurela Agagi vamoha ni sooreerela sa ikhondoolo ni imombe, aximombe ni iputtiputthi soonenevela – sootheene saari sooreera. Khayaatthunne ophwata itthusene seiye voothevene, vaheera yaaphwata sootheene saari soothanyeya ni soohivareleya muteko.

Sawuli onkhoottiwa okhala mwene

¹⁰ Vano Yave aamweerela Samuweli:

¹¹ “Koothanana omvarawaka omwene Sawuli niwoko ookihiya ahiiwelelaka soolamulasaka.” Samuweli aahitta, anamukhuwelela Yave ohiyu wootheene ole.

¹² Oxeexelo aavenya, anarowa omuulumano Sawuli, mene aaleeliwa: “Sawuli oorowa oKarameli weemexawo ecaambulowaawe iittitimiherelaka. Vahoolowaya aarowa oGiligali.”

¹³ Samuweli aamphwanyakaru, Sawuli aamweerela: “Yave ooreeliheni! Kookwanihera soolamula sa Yave.”

¹⁴ Vanonto Samuweli aamukoha: “Vano wiinla heeni wa ikhondoolo ni imombe kiniiwaaka?”

¹⁵ Sawuli aamwaakhula: “Anakhotto ti aruuhale sa awAmaleki. Ahuurela sooreerela sa ikhondoolo ni imombe weera empakele Yave Mulukwaanyu sooveleela, mene ikina iye noomaliha ophwata.”

¹⁶ Samuweli aamweerela Sawuli: “Mmaaleke! Kinimooleelani yeeyo Yave okileenlaawe ohiyu.” Sawuli aamwaakhula: “Haya, okileeleke.”

¹⁷ Samuweli aamweerela: “Munimwiiyeviharu, nyuwo moothatuwa muhooleli a ipuumba sa aYixrayeli. Yave ohoovarani omwene wa aYixrayeli.

¹⁸ Owo ohoorumihani okhottoni aweerelakani: ‘Murowe ni mwaphwateke woomalela muloko ole wa awAmaleki woohiiwelela. Mwaawaneno mpaka muneeraanyu mwaamalihe.’

¹⁹ Muhimwiiwelelenleni Yave? Mukuxenreni soohuhula mpakaka yoonanara vamaithoni wa Yave?”

²⁰ Sawuli aamwaakhula: “Hoye, koomwiiwelela Yave. Kookwanihera muteko Yave aakirummaawe. Kohaaphwata awAmaleki ni koomuruuha mwenaaya Agagi.

²¹ Anakhotto yaakuxa ikhondoolo ni imombe sooreerela sa soohuhula seiye saatteeliheriwe Muluku weera siphwatiwe yeerelaka omveleelela Yave Mulukwaanyu oGiligali.”

²² Vanonto Samuweli aamwaakhula: “Weeraka Yave onsiveliwa ni sooveleela soohisa ni sa inama opwaha wiiwelela maswaawe? Fataari omwiiwelela Yave ohikhanle opaka sooveleela; aani fataari omwiiwa ohikhanle inama sooneneva.

²³ Vano ovaanya ori ntoko yoottheka ya okhwiri ni ettiyamaaru ntoko yoottheka ya olapa miluku sikina. Mweenre mukhootta masu a Yave, Owo ohookhoottani okhala mwene.”

²⁴ Vano Sawuli aamweerela Samuweli: “Koottheka. Kootupha malamulo a Yave ni ikanosanyu. Kaawoova anakhotto, tivawo kiwaakhulenlaaka.

²⁵ Miyo kinoodyoonttelelani – mulevelele yootthekaaka ni muhokolowe ni miyo weera kamulape Yave.”

²⁶ Wa soothesene, Samuweli aamweerela: “Nkinghokolowa ni nyuwo. Mookhootta masu a Yave ni Owo ohookhoottani okhala mwene a aYixrayeli!”

²⁷ Samuweli aarukunuwaawe weera apwahe, Sawuli aavara maleembe a mukaandyowaawe ni owo onaahuwa.

²⁸ Samuweli aamweerela: “Yave oowaahulani nyuwo omwene wa aYixrayeli olelo ni oomwinnyerera ooreerela woopwahani nyuwo.

²⁹ Yoole ori Ovuwa wa oYixrayeli khanootha hata khanceendya soowuupuwelasawe niwoko khahiyono mulopwana ooceendyaceendya.”

³⁰ Sawuli aamwaakhula: “Koottheka. Mene dyoontte, mukittittimihe vamaithoni wa asitokweene a mulokwaaka ni wa aYixrayeli; muhokolowe ni miyo weera kamulape Yave Mulukwaanyu.”

³¹ Vano Samuweli aarowa vamoha ni Sawuli ni Sawuli aamulapa Yave.

³² Vanonto Samuweli aaheera: “Mukiruuheleke Agagi, mwene a awAmaleki.” Agagi aarowa ahihovelaka okhwa, uupuwelaka: “Vekhaikhai, woopiha wa okhwa woovira.”

³³ Vaheera Samuweli aamweerela: “Mweenre mwaakakatthasa anamwane a asimaayi amayinyutho kheekhalano mwaana variyari wa asimaayi.” Ni Samuweli aamwiiva Agagi ohoolo wa Yave oGiligali.

³⁴ Vahoolowaya Samuweli aarowa oRama, vaheera Sawuli aarowa owannyawe oGibeya wa Sawuli.

³⁵ Mpaka okhwawawe Samuweli, owo khaarongwe omoonatho Sawuli aaroomuthananelaru. Vano Yave aathananaxa woomvara Sawuli omwene wa aYixrayeli.