1 Samuweli 14 - Emakhuwa Bible

¹ Nihuku nimoha Yonatani, mwaana mulopwana a Sawuli, aamweerela mmiravowaawe aamkuxera kapwitthi: “Nrowe omukuttulani wa aFilisti ori mpatta mukina.” Wa soothesene, owo khaathalihenre atithawe.

² Sawuli aakilaathiye mukerekhere oGibeya, vathi wa mwiri wa eromazera* oMigeroni. Aakhalano anakhotto macira mathannamosa.

³ Variyariwaya aari Abiya areeneno mooxikootti a esaserdoti. Aari mwaana mulopwana a Ahitube, munneiye Ikabodi. Ahitube aari mwaana mulopwana a Pinehasi, mwaana mulopwana a Eli, musaserdoti* a Yave oXilo. Khaawo aasuwenle weera Yonatani aavenya.

⁴ Vano ekhato, mwa weiwo Yonatani aatthunaawe ovira weera aphiye vanipuroni na anakhotto a aFilisti, yaari eriyari ya nyaako miili soorakamela – mmoha wiitthaniwa Bozezi ni mukina Sene.

⁵ Mmoha waari mpatta wa ottuttuwani wookela oMikemaxi ni mukina mpatta wa ohitto wookela oGeba.

⁶ Yonatani aamweerela mmiravowaawe aamukuxera kapwitthi: “Nirowe vanipuroni na anakhottweene yaawo oohiineliwa. Yave wookhala woonikhaviheraka, niwoko Yave ongwera ovuluxa aavarelaka muteko hata anakhotto vakhaani hoye hoye ancipale.”

⁷ Mmiravo aamukuxera kapwitthi aamwaakhula: “Mpake yeeyo munuupuwelaanyu. Miyo kinoorowa ni nyuwo.”

⁸ Yonatani aamweerela: “Nrowe, nilapuwele mpatta wa okhopela wa anakhotto yaawo, naahiyeke weera enoone.

⁹ Awo yaneerela: ‘Muniweherere mpaka niwaattameleni,’ nneemele vanipuroniwahu.

¹⁰ Vaheera yaneerela: ‘Ngweeke wenno,’ vano nnoorowa vanipuroniwaya ni eyo eniikhale eneneerowaahu weera Yave oowinnyerera mmatatanimwahu.”

¹¹ Vanonto ooweeli ale yaahiixoonihera wa anakhotto a aFilisti. Anakhottweene yaale yaaheera: “Ngwoone! aHeberi aniithupulula mmakhukuni yiipinthaayamo.”

¹² Afilisti a ekhato ele yaamukhuwelela Yonatani ni mmiravowaawe aamukuxera kapwitthi: “Murweeke wenno ni hiyo nnimooxuttihani etthu.” Yonatani aamweerela mmiravowaawe aamukuxera kapwitthi: “Okitthare, Yave oowinnyerera mmatatani mwa aYixrayeli.”

¹³ Yonatani aahaapasa awelaka mwaako mmiravowaawe aamukuxera kapwitthi amuttharaka. Yonatani aahaamoroxela vathi, mmiravowaawe anawiivakasa.

¹⁴ Moowanani woopacera iwe, Yonatani ni mmiravowaawe aamukuxera kapwitthi yaawiiva wookwanaka asilopwana miloko miili wa ettima ekhaanene.

Owina wa aYixrayeli

¹⁵ Vano anakhotto ootheene a aFilisti yaapacera woova vancipale – yaale yaari waakonelingwe, mmatta, yaaweene yaari mmapuroni a anamalipelela, mpakatho yaale yaawana. Ni etthaya yaatetereya, onakhala orukureereya nyuru otokotoko waarumihiwe ni Muluku.

¹⁶ Anamalipelela a Sawuli yaari oGibeya, elapo ya oBenyamini, yaawoonasa anakhotto ancipale a aFilisti etthawelaka mipatta sootheene.

¹⁷ Vano Sawuli aaweerela anakhottwaawe: “Ngwaalikele anakhotto weera ngwoone yaakwanenle.” Ewaalikelakaru, yaahoona weera Yonatani ni mmiravowaawe aamukuxera kapwitthi khayaariwo.

¹⁸ Vanonto Sawuli aamweerela Abiya: “Mukiruuhele Arka* a Muluku.” (Ehuhuweene yeele Arka* yaari ni aYixrayeli.)

¹⁹ Sawuli uulumaka hiihaale ni musaserdoti*, onyakuleleya wa yaakonenlaayawo aFilisti waamutepa. Hiiho Sawuli aamweerela musaserdoti*: “Khoontthuneya waaruuha Arka*.”

²⁰ Vahoolowaya Sawuli ni anakhoottwaawe ootheene yaathukumana, enarowa okhottoni. Yaaphwannye aFilisti oopupurumeene, evulalihanaka ni ikatanasaya.

²¹ aHeberi akina khalayi yaakhalela mpatta wa aFilisti yaarowanne yaakonenlaayawo aFilisti, yaarowasa mpatta wa aYixrayeli yaari ni Sawuli ni Yonatani.

²² aYixrayeli ootheene yiipithanse mmanyaakoni sa wEfrayimi yiiwakaru weera aFilisti aatthawa, yaavolowanotho mukhottoni yaattharelelasaka.

²³ Nihuku nne Yave aawoopola aYixrayeli ni ekhotto yaapwaherera mpaka mpatta mukina wa oBet-Aveni.

Nlipelo noohuupuwelela na Sawuli

²⁴ Vano asilopwana aYixrayeli yaakhulumuwaxa nihuku nenenenne niwoko Sawuli aahaatthuka ni nlipelo eeraka: “Oolaphiwa ti yoowo aneera ace ohinaaye wiila ni kihinaaye owiinlela ikukuttula amwiittanaaka.” Hiiho khaawo aaciiye etthu.

²⁵ Anakhotto ootheene yaavolowa ntuphini waaraayamo oravo vathi.

²⁶ Evolowakaru ntuphini, yaahoona oravo okhwalalaka, mene khaawo aaciiye yoovaka nlipelo.

²⁷ Vaheera Yonatani khaasuwenle nlipelo atithawe yaapakenlaaya anakhotto, moota wooweera aahookolela okhwipi wa ekopo aakuxalaawe, anaxuweya wancerepheni. Acaakaru, aahoona kakhamu.

²⁸ Vanonto mmoha a anakhotto aamweerela: “Atithinyu ahaatthuka anakhotto ni nlipelo noolipaxa yeeraka: ‘Oolaphiwa ti yoowo aneera ace olelo.’ Tivawo anakhotto ahilimpaaya.”

²⁹ Yonatani aamwaakhula: “Atithaka aaniruuhela erisa. Moone kilawihakaru oravo vakhaani moota kikakhamungwaaka.

³⁰ Moota weeraaya oreerele asilopwana yaaciiye olelo vakhaani sa seiye yaahuhunlaaya amwiittanaaya. Waari hiiho, saano yiiviwaleene aFilisti ancipale.

³¹ Nihuku nenenenne aYixrayeli ewiivakaru aFilisti okhuma oMikemaxi mpaka wAyaloni, yaakhulumuwaxa.

³² Yaakuxa soohuhulua evaraka ikhondoolo, imombe ni iputtiputthi, eniivela vaavaale, enakhuura ni ephomaaya.

³³ Vano mmoha aamweerela Sawuli: “Moone, asilopwana animutthekela Yave ekhuuraka enama ni ephomaaya.” Sawuli aaheera: “Khamuroromeleiye! Woowaakuveya, mupirikixele va nluku ntokotoko!”

³⁴ Aapwaherera weera: “Murowe wa asilopwana ni mwaaleele: ‘Khula mutthu a nyuwo akiruuhele imombesawe ni ikhondoolosawe. Mwiive ni mukhuurele vaava. Muhimutthekele Yave mukhuuraka enama ni ephomaaya.’” Ohiyuweene yoole khula mutthu aakuxa emombaawe aniivelawo.

Yonatani oneereliwa nanthowa

³⁵ Vahoolowaya Sawuli aamutekela Yave altaari*. Awo yaari altaari* oopacera aatenkaawe.

³⁶ Sawuli aaheeratho: “Nrowe naattharelele aFilisti ni ohiyu naahuhulaka mpaka oxa, niwiivaka ootheene.” Awosa yaamwaakhula: “Mpake yeeyo enooreerelani.” Vaheera musaserdoti* aaheera: “Nimukohakoheke toko Muluku.”

³⁷ Sawuli aamukoha Muluku: “Naatthareleleke aFilisti? Nyuwo munimwaavaherera mmatatani mwa aYixrayeli?” Mene nihuku nne Muluku khamwaakhunle.

³⁸ Tivawo Sawuli eenraawe: “Ngweeke wenno, ootheene nyuwosa muri asitokweene a anakhotto weera noonelele yoottheka heeni epakeiye olelo.

³⁹ Kinlipela mwa Nsina na Yave mwa Yoowo owooponle aYixrayeli, hata akhalaka mwanaka Yonatani, iiviweke.” Wa soothesene, khaawo aakhumihale nsu.

⁴⁰ Vahoolowaya Sawuli aaweerela aYixrayeli ootheene: “Nyuwosa mukhale mpattaanyu; miyo ni mwanaka Yonatani nnikhale mpattaahu.” Asilopwana yaamwaakhula: “Mpake yeeyo enooreerelani.”

⁴¹ Vano Sawuli aamvekela Yave, Muluku a aYixrayeli: “Dyoontte, mukoonihere nanthowa.” Vanonto, aathanlenleiye ti Yonatani ni Sawuli vahoolowaya asilopwana akinaawo yaari ootaphuweene.

⁴² Sawuli aaheera: “Mukipakele mwaathanle miyo ni mwanaka Yonatani.” Ni oothanliwa aari Yonatani.

⁴³ Vano Sawuli aamweerela Yonatani: “Okithalihere opankaawo.” Hiiho Yonatani aamuthalihera: “Koolawiha oravo vakhaani paahi ni ethoka ya ekopo kaaraakano mmatatanimwaka. Eyo yoophwanela wiiveliwa?”

⁴⁴ Sawuli aamwaakhula: “Muluku akittaruxe moota woonanara weyo waahikhwa, Yonatani.”

⁴⁵ Vanonto, asilopwana yaamweerela Sawuli: “Yonatani yoola aatapunxe aYixrayeli akhweeke? Eheereye! Ninlipela mwa Nsina na Yave weera ahikhwe, niwoko yeeyo opankaawe olelo yeereiye ni ekhavihero ya Muluku.” Hiiho asilopwana yaamoopola Yonatani ni owo khiiviwe.

⁴⁶ Sawuli aahiya waattharelela aFilisti, ni awosa yaahokoleela mweelaponimwayaxa.

Ikhotto sa Sawuli

⁴⁷ Vahoolo woovariwa omwene oYixrayeli, Sawuli annaawanano amwiittanaaya a mipatta sootheene: aMowabe, awAmoni, awEdomi, mamwene a oZoba, ni aFilisti. Wa khula mpatta aarowaawe annaahasula.

⁴⁸ Aawana ni oolipeene murima, anaawina awAmaleki aavuluxaka aYixrayeli mmatatani mwa yaale yaahuhula.

⁴⁹ Anamwane asilopwana a Sawuli yaari Yonatani, Yixevi ni Maliki-Xuwa. Nsina na mwanawe muthiyana oopacera naari Merabi ni na ookisera Mikali.

⁵⁰ Nsina na mwaarawe naari Ahinowami, mwaana muthiyana a Ahimahazi. Nsina na mutokweene a anakhotto a Sawuli naari Abeneri, mwaana mulopwana a Neri, atatawe Sawuli.

⁵¹ Kixi, atithawe Sawuli, ni Neri, atithawe Abeneri, yaari anamwane a Abiyeli.

⁵² Veettiitthuni yaawaniwa ekhotto yoohihiyerereya ni aFilisti moomweneni moothemwene mwa Sawuli. Imaara sootheene Sawuli aamusuwelaawe mulopwana ookhomaala hoye hoye oolipa murima, aamulepela mukhottonimwawe.