1 Samuweli 11 - Emakhuwa Bible

Sawuli onaawina awAmoni

¹ Vano Nataxi, ngwAmoni, aarowa oYabexi-Giliyade, anarica. Asilopwana ootheene a oYabexi yaamweerela: “Niiraaneke, weera munilamule.”

² Vaheera Nataxi, ngwAmoni, aawaakhula: “Kazoola niitho na moono mulopwana na khula mutthu a nyuwo, kinoowiiraananani. Hiiho kineeraaka kiwuulihihe muru aYixrayeli ootheene.”

³ Asitokweene a oYabexi yaamwaakhula: “Munivahe mahuku mathannameeli weera naarumihele anamitthenga elapo yootheene ya aYixrayeli. Aahikhala oonikhavihera, nnimwiixinnyerera.”

⁴ Anamitthenga ephiyakaru oGibeya aakhalaawewo Sawuli yaathaliheraka atthu masu ale, ootheene yaakhuwela yiinlaka.

⁵ Ehuhuweene yeele Sawuli eera ahokolowaka ni imombesawe wuucihani anakoha: “Ekhumelenle eheeni ni muloko? Oniinlelani?” Vano awosa yaamuthalihera yeeyo asilopwana a oYabexi yaahimalaaya.

⁶ Sawuli iiwakaru maswaaya, Munepa wa Muluku waamurweela mukuruni ni owo aanyoonyiwa.

⁷ Aakuxa imombe ilopwana piili, anakakatthanya intthuri intthuri, anaarumihela aYixrayeli ootheene awinnyereraka anamitthenga eeraka: “Sineera sikhumeleliwe imombe ti seiya wa yaawo eneera ehimutthare Sawuli ni Samuweli.” Vano woopiha wa Yave waasareya mmulokoni ni ootheene yaahoorwa ni murima mmoha.

⁸ Asilopwana aathukumanyinghaawe Sawuli oBezeki yaari a oYixrayeli 300 000 ni a oYuda 30 000.

⁹ Yaaweerela anamitthega oYabexi: “Mwaaleele asilopwana a oYabexi-Giliyade: ‘Omaalo nsuwa vamuru, munootapuxasiwa.’” Anamitthenga yaarowa, enaathalihera asilopwana a oYabexi Giliyade masu ale ni asilopwaneene yaale yaahakalalaxa.

¹⁰ Amaki a oYabexi-Giliyade yaaweerela awAmoni: “Omaalo hiyo nnimwiixinnyerera wa nyuwo weera munipakele yeeyo muntthunaanyu.”

¹¹ Oxaawaya Sawuli aahaakawanyiha anakhottwaawe mipatta miraru. Okelaka ni oxa yaaphutuwela yaakonenlaayawo awAmoni ewiivaka mpaka othana. Yaale yaahanle ni okumi yaamwareyasa moota wooweera khula mutthu aari meekhaawe.

¹² Vano muloko waamweerela Samuweli: “Taani yeenre: ‘Weeraka Sawuli anaanilamule?’ Muniruuheleke asilopwana awo weera niwiive.”

¹³ Wa soothesene, Sawuli aawaakhula: “Khaawo aniiviwe olelo, niwoko nihuku nna Yave oowoopola aYixrayeli.”

¹⁴ Samuweli aaheerela muloko: “Nrowe oGiligali weera naakhulelewo omwene.”

¹⁵ Vanonto muloko wootheene waarowa oGiligali, onamvara omwene Sawuli vamaithoni wa Yave. Yaapakawo sooveleelela murettele ohoolo wa Yave ni Sawuli vamoha ni aYixrayeli ootheene yaahakalalaxa.