1 Pedru 5 - Emakhuwa Bible

Wa asitokweene ni amiravo

¹ Ntoko mutokweene mukina, kingwooperera asitokweene ari variyariwanyu, kireene namoona a ohaawa wa Kristu, ni woonaka weera nkikhale mpatta wa ovuwa oneera wooniheriwe.

² Mukukhule muhuwo wa Muluku ori wa olamulawanyu. Mweettiheke yoowo, ohikhanle moonyesereriwani, mene ni murima wootheene, ntoko Muluku ontthunaawe; ohikhanle niwoko na milili, mene ni soohaawela sa orumeela;

³ ohikhanle, ntoko atthu anaalamula yaawo muvahereriwaanyu, mene ntoko ethoonyero wa muhuwo.

⁴ Iixooniheraka Mukukhuli Mutokweene, nyuwo mmwaakhele ecireemba yoohiriheya ya ovuwa.

⁵ Mooteene yoowo, amiravo, ngwiiwelele asitokweene. Mukhale ootheene oowiiyeviha mukina ni mukhwaawe, niwoko “Muluku ti Mwiittana a oowiixoona, mene onaavaha mahala oowiiyeviha.”

⁶ Tivawo, mwiiyevihe vathi va ntata na ikuru sootheene na Muluku, weera Owo oovuwiheni ehuhu yootthuneya.

⁷ Mumvaherere Yoowo sooweeteteela sootheene, niwoko Owo onookosoopani nyuwo.

⁸ Muhule maithwaanyu a mmunepani ni muwehawehe, niwoko mwiittanaanyu, Diyabu*, oneetta oorukureerakani, ntoko mwatto oniipa, amwaasaka taani aneeraawe angwere omukhuura.

⁹ Munkhootte, mukhalaka oolipa munroromeloni, musuwelaka weera axunninyu a mweelaponi yootheene anghaawa ni soohaawasene seiyo.

¹⁰ Vahoolo woohaawa ehuhu vakhaani, Muluku a mahala ootheene, mwa Yoowo owiitthanenleni ovuwawawe woohimala mwa Kristu Yeesu, anookwaneliheni, anookhaliheni, anoolipiheni ni anaaweemexeni.

¹¹ Wa Yoowo sikhale ikuru soohimala. Ame*.

Isalaama sookisera

¹² Kohoolepelani nyuwo ni ekhavihero ya Silvano, mwa yoowo miyo kimmoonaaka weera ori munna oororomeleya, weera koolipiheni, nitho kikhalele onamoona weera ala ti mahala a ekhaikhai a Muluku. Mwa yaawo, mupwaherere oolipeene!

¹³ Ekerexa ya oBabiloniya, yeeyo eritho yoothanliwa, enimoovahani isalaama, nitho mwanaka Marku.

¹⁴ Muulumihaneke mukina ni mukhwaawe ni ebeecu ya osivela. Murettele okhale wa nyuwo ootheene muri mwa Kristu.