1 Nyaha 29 - Emakhuwa Bible

Sooveleela wa otekiwa wa Empa ya Yave

¹ Vano mwene Davide aaheerela muthukumano wootheene: “Muluku omuthanlale mwanaka mulopwana Salomoni, vaheera owo ori mmiravo, ni khaxuttihiwe nnenesene. Muteko ori mutokotokoxa, niwoko Empa etokotoko eyo kheetekeliwa atthu, mene wa Yave, Mulukwaahu.

² Kookhumiha itthu soohiyanahiyana soovarela muteko Empa ya Mulukwaaka: Eyuuma yoorikaxa, eparatha*, ebronze, eyuuma ni itthaabwa, mpakatho onikisi* oovolonghera mmavattani, nitho yaspe*, maluku oohiyanahiyana, moota wootheene wa maluku oowaaraxa ni maramore*.

³ Ohiya seiyo, moosivelani Empa ya Mulukwaaka, vano kinkhumiha sa muhakhwaaka, eyuuma yoorikxa ni eparatha* wa Empa ya Mulukwaaka, ohiya sootheene kikhumihalaaka wa Empa Yootteela ela.

⁴ Vano, kimvaha itonelada* ncira niithanu sa eyuuma yoorikaxa yooreera ya wOfiri ni itonelada* macira meeli ni miloko mixexe niithanu sa eparatha* yoorehereriwa, yoohuruwelelano ixiri sa Empa ya Yave,

⁵ yoovarela muteko wa eyuuma yoorikaxa ni eparatha*, ni wa muteko wootheene wa aneettottho. Vano, taani ori oolikaneene olelo okhumiha soomvaha Yave?”

⁶ Hiiho, mapwattapwattha a imusi, ahooleli a ipuumba sa oYixrayeli, asitokweene a anakhotto macira muloko ni asitokweene a anakhotto ncira, ni asitokweene yaawehaweha muteko wa mwene, yaakhumiha soovaha ni otthunawaya.

⁷ Wa muteko wa Empa ya Muluku, awosa yaavaha itonelada* ncira ni miloko mithannamiili niithanu sa eyuuma yoorikaxa, makhoobiri macira macireene muloko a eyuuma yoorikaxa, itonelada* macira mararu niithanu sa eparatha*, itonelada* macira mathannamosa ni miloko miraru sa ebronze* ni itonelada* 3 400 sa eyuuma.

⁸ Vano, yoowo aarino maluku oowaaraxa aavaha onsungiwa mihakhu sa Empa ya Yave, mwa mwemmo namawehaweha aari ti muGerexoni Yehiyeli.

⁹ Muloko waahakalalela mapakelo a ahoolelaaya, niwoko yaamvaha Yave iyo ni otthunawaya, ni murima wootheene. Vano mwene Davide aahakalalaxatho.

Ecipo yoottottopela ya Davide

¹⁰ Davide aamvuwiha Yave vamaithoni wa muthukumano wootheene, eeraka: “Attottopeliwe Yave wa mahuku ootheene, Muluku a tithiihu Yixrayeli.

¹¹ Ii! Yave, otokweene, owera, ovuwa, ottittimiheyaxa ni waara ti wawinyu, niwoko sootheene siri wiirimu ni vathi ti sawinyu. Ii! Yave, omwene ti wawinyu. Nyuwo moopwahaxa itthu sootheene.

¹² Mihakhu ni nttittimiho sinrweela wa Nyuwo; Nyuwo munlamula itthu sootheene. Ikuru ni owera siri mmatatanimwanyu weera ngwunnuwihe ni mwaavahe ikuru ootheene.

¹³ Vano Mulukwaahu, nnoottottopelani ni nimvuwiha Nsinananyu noovuwaxa.

¹⁴ Vaheera miyo taani, ni ti eheeni mulokwaaka mpaka niwenraahu ocaangaxa ntoko nipankaahu? Sootheene sinrweela wa Nyuwo, hiyo noovangheni paahi yeeyo enrweela mmatatanimwanyu.

¹⁵ Ohoolowanyu nri ntoko anamarwa ni ookuxiwa elapo ekina, ntoko yeereyaaya ni makholowaahu. Mulaponimu mahukwaahu anlikana ni munttuusi, woohikhalano oweherera.

¹⁶ Ii! Yave, Mulukwaahu, muhakhu wootheene ola nimvahaahu weera niteke Empa ya Yave, nittittimiherelaka Nsinananyu Nootteela, onrweela mmatatanimwanyu ni wootheene ola ti wawinyu.

¹⁷ Ii! Mulukwaaka, koosuwela weera mumphima murima ni weera munghakalalela ekhaikhai. Sootheene kivanghaaka kipanke ni otthuna ni okwanela wa murima. Vano kohoona ni ohakalala moota weenraaya macaangero ni otthunawaya mulolokwaanyu ola ori va.

¹⁸ Ii! Yave, Muluku a makholowaahu, Abrahaamu, Isaki ni Yixrayeli, mpwahererihe mahuku ootheene ohaawela wu vamurimani wa mulokwaanyu, ni mpwahererihetho murimaaya woororomelani Nyuwo.

¹⁹ Mumvahe mwanaka mulopwana Salomoni murima wookwanela weera iiwelele malamulowaanyu, mahusihowaanyu ni ikanosanyu, weera ateke Empa ya Yave ela, mwa yeeyo kirehererenlaaka seiyo sintthuneya.”

²⁰ Vano Davide aaheerela muthukumano wootheene: “Mumvuwihe Yave, Mulukwaanyu.” Hiiho, ootheene ale yaamvuwiha Yave, Muluku a makholowaaya, yuuramelaka ni ekokhorelaka ohoolo wa Yave ni wa mwene.

Salomoni omvariwa omwene

²¹ Waaxiiye, yaampakela sooveleela Yave, mpakatho sooveleela soohisa: Aximombe macira muloko, anapunci a ikhondoolo macira muloko ni iputtiputthi macira muloko, vamoha ni sooveleela soowura, ni sooveleela sikina sincipale, yeereliwaka aYixrayeli ootheene.

²² Nihuku nne yaahooca enawura ni ohakalalaxa vamaithoni wa Yave. Hiiho yaamvaratho omwene Salomoni, mwaana mulopwana a Davide, emuttikitthelaka ohoolo wa Yave ntoko oolamula sootheene, ni Zadoki ntoko musaseroti.

²³ Ola ti moota Salomoni aakilaathenlaawe ehice ya emwene ya Yave, aarandelaka atithawe Davide. Owo saamweettela nnene, ni aYixrayeli ootheene yannamwiiwelela.

²⁴ Ahooleli ootheene ni anakhotto oottittimiheyaxa, mpakatho anamwane asilopwana a mwene Davide, yaaroromeliha okhalela mpatta wa mwene Salomoni.

²⁵ Yave aamunnuwiha Salomoni vamaithoni wa aYixrayeli ootheene, anamukhaliha oottittimiheyaxa moolamulanimwawe ahilikanakaru ni akhalaru mwene aari oYixrayeli.

Ohima mukwasu wa olamula wa Davide

²⁶ Davide, mwaana mulopwana a Yixai aalamula oYixrayeli wootheene.

²⁷ Aalamunle iyaakha miloko mixexe oYixrayeli: Iyaakha ithannapiili oHeberoni, ni iyaakha miloko miraru ni tthaaru oYerusaleemu.

²⁸ Okhwiiye ni wuuluvala wooreera, apuhaka okumi mwincipale, muhakhu ni nttittmiho. Mwaniye mulopwana Salomoni ti aamurandenle.

²⁹ Soopaka sa mwene Davide, okhuma ompacereroni mpaka ommaleloni wa olamulawawe, silempwale mulivuruni sa nyaha sa namoonihera* Samuweli, mprofeeti Natani ni sa namoonihera* Gadi.

³⁰ Iyo sitakanseriwe itthu sinuuluma sa olamulawawe ni sa owerawawe, ni sookhumelela singhima sa yoowo, aYixrayeli ni imwene sa ilapo sootheene sikina.