1 Nyaha 26 - Emakhuwa Bible

Anamalipelela a milako

¹ Mukuttula wa anamalipelela a milako ti ola: a aKorahi: Mexelemiya, mwaana mulopwana a Kore, mmoha a mwaana mulopwana a Asafi.

² Anamwane asilopwana a Mexelemiya yaari ti ala: A ntthaara, Zakariya, anaaveeli Yediyayeli, anaararu Zebadiya, anaaxexe Yatiniyeli,

³ anaathanu Elami, anaathannamosa Yehohanani, ni aanaathanneeli Elihunai.

⁴ Anamwane asilopwana a Obede-Edomi: A ntthaara Xemaiya, anaaveeli Yehozobadi, anaararu Yowa, anaaxexe Sakari, anaathanu Netaneli,

⁵ anaathannamosa Amiyeli, anaathanneeli Isakari, ni anaathannaararu Pehuletayi. Vanonto Muluku aamureelihaxa Obede-Edomi.

⁶ Mwaniye mulopwana Xemaya aakhalanotho anamwane asilopwana, yaari ahooleli eriyari ya emusi ya atithawe, niwoko awosa yaari asilopwana ooweraxa.

⁷ Anamwane asilopwana a Semaiya: Oteni, Refayeli, Obede ni Elizabade. Amusaayasa, Elihu ni Semakiya, yaaritho asilopwana oowera.

⁸ Ootheene ala yaari a ekhapira ya Obede-Edomi; awosa vamoha ni anamwanaaya asilopwana ni amusaaya yaari oowera ni oolikaneene ovara muteko. Ootheene awo yaari miloko mithannamosa neeli a ekhapira ya Obede-Edomi.

⁹ Meselemiya aarino anamwane asilopwana ni amusi xaxaxa muloko ni athannaararu ni ootheene awo yaari oowera.

¹⁰ Anamwane a mMerari Hosa: Ximeri, mwa yoowo aavahiwe otokweene ni atithawe, aaroohikhalaru a ntthaara,

¹¹ anaaveeli Hilikiya, anaararu Tabaliya, ni anaaxexe Zakariya. Anamwane asilopwana ni amusaawe Hosa, ootheene awo yaari muloko naararu.

¹² Iya saari mikuttula sa anamalipelela a milako, saattharihaka asitokweenaaya, ni awosa yaarumeela Mpaani mwa Yave, ntoko amusaaya akina.

¹³ Yaampaka mwaathanle eriyari ya imusi vamoha ni amiravo ni asitokweene, weera ewehaweheke khula mulako.

¹⁴ Mulako wa mpatta ninkhuma nsuwa aareereliwe ti Selemiya. Vano, aathanleleiye ti mwaniye mulopwana Zakariya, namalaka a miruku, ni mulako wa mpatta wa ottuttuwani aathanleleiye yoowo.

¹⁵ Mulako wa mpatta wa ohitto aareereliwe ti Obede-Edomi, ni wa moosungamo yaareereliwe ti anamwanaawe asilopwana.

¹⁶ Mulako wa mpatta ninkela nsuwa ni wa Xalekete ori musewe wa ottuttuwani, aareereliwe ti Xupimi ni Hosa. Anamalipelela yaakhala muxerexere mukina ni mukhwaawe.

¹⁷ Khula nihuku yaakhala aLeevi athannamosa vamulako wa mpatta ninkhuma nsuwa, axexe mpatta wa ottuttuwani, axexe mpatta wa ohitto ni khula emaara yaakhala eeli elipelelaka moosungamo.

¹⁸ Vaheera vanipuwani na mpatta ninkela nsuwa, yaakhala axexe munseweni ni eeli vanipuwani.

¹⁹ Ti seiya saari mikuttula sa anamalipelela a milako a ikhapira sa Kora ni Merari.

²⁰ Akina a axunnaya aLeevi yaawehaweha waasungiwa muhakhu wa Mpaani mwa Muluku ni saasungiwa soovaha sootteeliheriwa Yave.

²¹ aGerexoni a ekhapira ya Ladani yaari mapwattapwattha a imusi saari sa muGerexoni Ladani, ti Yehiyeli

²² ni anamwanaawe asilopwana Zetami ni munneiye Yoweli. Yaawehaweha omuhakhuni wa Empa ya Yave.

²³ A awAmerami, awIzehari, aHeberoni ni awUziyeli:

²⁴ Xubayeli, mmoha a ekhapira ya Gerxomo, mwaana mulopwana a Moisesi, aari mutokweene aawehaweha mwaasungiwa mihakhu.

²⁵ Amusaawe a mpatta wa Eliyezeri: mwaniye mulopwana Rehabiya, tiithi a Yexaya, tiithi a Yorami, tiithi a Zikeri, tiithi a Xelomiti.

²⁶ Xelomiti ni amusaawe yaawehaweha mihakhu sootheene saatteelihiwe ni mwene Davide, mwa mapwattapwattha a imusi yaari asitokweene a anakhotto macira muloko mpakatho a anakhotto ncira, ni mwa ahooleli akina a anakhotto.

²⁷ Awosa yaatteeliha mpatta wa soohuhuliwa saakuxiwe okhottoni sooraselano Empa ya Yave.

²⁸ Vano, soovaha sootheene saatteelihiwe ni namoonihera* Samuweli, Sawuli mwaana mulopwana a Kixi, Abineri, mwaana mulopwana a Neri, Yowabe, mwaana mulopwana a Zeruha, ni soovaha sootheene sikina sootteelihiwa saakosoopiwa ni Xelomiti vamoha ni amusaawe.

²⁹ A awIzehari: Kenaniya ni anamwanaawe asilopwana ti yaavahiwa sootthuneya sa mpatta wa omokoni wa Empa ya Yave, evaraka muteko ntoko asitokweene ni aphuki a aYixrayeli.

³⁰ A aHeberoni: Hasabiya ni amusaawe, yaawehaweha muteko wootheene wa Yave ni mwa muteko wa mwene a oYixrayeli, mpatta ninkhuma nsuwa oYordanu; ootheene awo, yaari asilopwana oowera 1 700.

³¹ Yeriya aari pwattapwattha a ekhapira ya aHeberoni, ottharihiwaka munamalepelani a mukhapirani. Vayaakhani yanaamiloko mixexe ya olamula wa Davide, wahaasaasiwa munamalepelani a ekhapira ya aHeberoni, ni eriyaraaya yaaphwanyaneiye asilopwana oowera a oYazeri elapo ya oGileyade.

³² Yeriya aakhalano amusi 2 700, asilopwana oowera ni mapwattapwattha a imusi, mwa yaawo mwene Davide aavahenraawe olamulela ipuumba sa Rubeni, Gadi ni eriyari ya epuumba ya Manaxe ngwiiwananani itthu sootheene sa Muluku ni sa mwene.