1 Nyaha 18 - Emakhuwa Bible

Okhalihiwa ni wunnuwihiwa omwene wa Davide

¹ Vahoolowaya, Davide aahaawina aFilisti, anaalamulasa, anakuxa esidade ya oGate ni mittetthesaya mwa olamula wa aFilisti.

² Davide aahaawinatho aMowabe, enalamulasiwa ni yoowo, emulivaka musoko.

³ Ohiya yeeyo, Davide aangwina Hadadezari, mwene a oZoba, muxerexere wa oHamate, Hadadezeri owo eereraawe okuxa elapo ya mooloko Efratesi.

⁴ Vano Davide aakuxa ikaaro macira muloko sa mwene owo, soowanela ekhotto, anamweettiha a ikavalu* macira miloko mathannameeli ni anakhotto 20 000. Aakuxatho ikavalu* ncira nimoha sa ikaaro soowanela ekhotto, anakwasa misemba sikina iyo.

⁵ awArami a oDamasku yaarwiiyaaya omukhavihera Hadadezeri, mwene a oZoba, Davide aawiiva 22 000 a yaawosa.

⁶ Woottharelana, aakhaliha mapuro oolipelela anakhotto moomweneni mwa awArami a oDamasku, aalamulaka omuliva musoko. Vano, Yave annangwiniha Davide mmapuroni moothemwene aarowaawe.

⁷ Davide aaruuhatho oYerusaleemu ixikudu* sa eyuuma yoorikaxa saavareliwa muteko ni asitokweene a Hadadezeri.

⁸ Mwene Davide aakuxa oDeba ni oKuni, isidade saari sa Hadadezeri, ebronze* yincipale, mwa seiyo Salomoni aavarenlaawe muteko woopakela Ephareiya ya ebronze*, amarimbu ni ikaruma sikina.

⁹ Tohu, mwene a oHamate, asuwelaka weera Davide aahaawina anakhotto ootheene a Hadadezeri, mwene a oZoba,

¹⁰ aamurumiha mwaniye mulopwana Hadorami wa mwene Davide weera amuulumihe ni amutthapelele owinawawe moowanani ni Hadadezeri, aangwananne Tohu.

¹¹ Mwene Davide aamutteelihera ikaruma iye Yave, mooteene yoole aapankaawe ni eparatha*, ni eyuuma yoorikaxa saakuxiwe mmilokoni iye: wEdomi ni oMowabe, awAmoni, aFilisti, ni awAmaleki.

¹² Mureyareyani na Maakha Abixayi, mwaana mulopwana a Zeruha, aahaaphwata awEdomi 18 000.

¹³ Vahoolowaya, aakhaliha mapuro oolipelela anakhotto wEdomi ni awEdomi ootheene elamuliwaka ni Davide. Yave annangwiniha Davide mmapuroni moothemwene aarowaawe.

Olamula wa Davide

¹⁴ Davide aalamula oYixrayeli wootheene, ooniheraka wookoleleya ni ekhaikhai wa mulokwaawe wootheene.

¹⁵ Yowabe, mwaana mulopwana a Zeruha, aari mutokweene a anakhotto; Yehoxafati, mwaana mulopwana a Ahilude, aari mutokweene a ilivuru sa nyaha.

¹⁶ Zadoki, mwaana mulopwana a Ahitube, ni Aimeleki, mwaana mulopwana a Abiyatari, yaari asaserdoti*; Xavexave aari namalepa a mwene;

¹⁷ Benaiya, mwaana mulopwana a Yehoyada, aalamula aKereti ni aPeleti; anamwane asilopwana a mwene Davide yaari asitokweene yaamuhoolelaxa.