1 Nyaha 17 - Emakhuwa Bible

Yave ompaka wiiraana ni Davide

¹ Mwene Davide akhalaka empaawe ya emwene, nihuku nimoha aamweerela mprofeeti Natani: “Miyo kinkhala va mpaani ya emwene yoopakiwa ni mwiri wa esidari*, Arka* a wiiraana a Yave ereene muheemani paahi.”

² Natani aamwaakhula Davide: “Mpake yeeyo munuupuwelaanyu, niwoko Muluku ori ni nyuwo.”

³ Vano ohiyuweene yoole Muluku aahuuluma ni Natani, amweerelaka:

⁴ “Mwamuleele murumeiyaaka Davide weera Yave oneera ha: ‘Khamuhiyono nyuwo muneera mukitekele Empa yoomaka Miyo.

⁵ Nkinakhaleru mpaani okhuma nihuku kaakhumihalaaka aYixrayeli wExipitu, mene kaakhala mmaheemani mmapuroni oohiyanahiyana.

⁶ Keetteettaakamo ni muloko wa aYixrayeli, nkinamvekeleru akhalaru a yaale kaavanghaaka olamula mulokwaaka weera ekitekele empa yoopakiwa ni mwiri wa esidari*.’

⁷ Vano mmweerele murumeiyaaka Davide: ‘Yave a ikuru sootheene, oneera ha: Miyo kohoovenxani moocihamo mukosoopaka muhuwo, weera mukhale oolamula mulokwaaka aYixrayeli.

⁸ Miyo kaari ni nyuwo moothemwene mweettaanyumo, ni kaahaamalamaliha amwiittanaanyu ootheene. Vano, kinimookhalihani oowiiwanyeyaxa ntoko atthu oottittimiheyaxa a mulaponi.

⁹ Kinoovaha nipuro mulokwaaka aYixrayeli, ni kinimwaatekihawo, weera ekhaleno etthokwaaya ni ehikacamihiwetho. Khasaahasulatho miloko sootakhala ntoko saapakaaya khalayi,

¹⁰ ni saapaka okhuma ehuhu kaathanlenlaaka aphuki mulokwaaka aYixrayeli. Kinimwaaphwatatho amwiittanaaya ootheene. Kinooleelani weera Miyo, Yave, kinimoovahani omwene.

¹¹ Omanleene okumaanyu munathukumanyihiwa ni makholowaanyu, kinoomuthanla mmoha a anamwaniinyu asilopwana weera oorandeleni, ni Miyo kinootekiha omwenaawe.

¹² Ti yoowo aneera akitekele empa, ni Miyo kinoolipiha ehicaawe ya emwene wa mahuku ootheene.

¹³ Miyo kinookhala Atithawe, ni owo onookhala mwanaka. Nkirwa kimwaakha osivelawaka, ntoko kimwaakhiyaaka Sawuli.

¹⁴ Miyo kinoompaka muhooleli a mulokwaaka ni a omwenaaka wa mahuku ootheene; omweenaawe onookhalihiwa wa mahuku ootheene.’ ”

¹⁵ Hiiho, Natani aamuthalihera Davide sootheene Yave aamuleenlaawe ni aamoonihenraawe.

¹⁶ Vano mwene Davide aavolowa mutabernaakuluni, anakilaathi ohoolo wa Yave, anavekela: “Ii! Yave Muluku, miyo taani ni emusaaka eheeni, mpaka Nyuwo okiphiiha va?

¹⁷ Ii! Yave Muluku, eyo ereene ntoko yoohookwanani, mohuulumatho sa muhoolo sa emusi ya murumeiyaanyu. Ii! Yave Muluku, munnakipwattha ntoko mutthu oottittimiheyaxa.

¹⁸ Davide khanono yoowooleelanitho woomuttittimiha murumeiyaanyu. Nyuwo moomusuwela murumeiyaanyu,

¹⁹ ii! Yave. Woomusivela murumeiyaanyu, ni muttharihaka otthunawanyu, moopaka etthu etokotoko ela munasuweliha soororomeliha sitokotoko sootheene iya.

²⁰ Ii! Yave, khawoworu onlikana ni Nyuwo, hata khawoworu muluku mukina woohiyani Nyuwo, ntoko niiwalaahu.

²¹ Khoowoworu muloko mukina onlikana ni mulokwaanyu aYixrayeli. Mulukwaaya aarowa wiixoopolela muloko eriyari ya miloko sootheene. Aahiipakela epili, apakaka sootikhiniha sitokotoko sootava murima, woowoomola miloko ohoolo wa muloko aatapunxaawe wExipitu.

²² Nyuwo mohaakhaliha aYixrayeli mulokwaanyu wooreera wa mahuku ootheene, ni Nyuwo, Yave, mohiitatuxa Mulukwaaya.

²³ Vanonto Yave, yoororomeliha mwaampakenlaanyu murumeiyaanyu ni ekhapiraaweene, ekwanihereye wa mahuku ootheene. Mpake ntoko muroromelinghaanyu,

²⁴ weera sikhalihiwe sootheene, ni weera Nsinananyu nunnuwihiwe wa mahuku ootheene. Vano, atthu eniyeere: ‘Yave a ikuru sootheene, Muluku a aYixrayeli, ti Mulukwaaya aYixrayeli!’ Hiiho, ekhapira ya murumeiyaanyu Davide, enoopwaherera yoolipeene ohoolowanyu.

²⁵ Nyuwo Mulukwaaka, moomoonihera murumeiyaanyu weera munoomukhalihera ekhapira. Tivawo murumeiyaanyu olipihalaawe murima weera oovekeleni.

²⁶ Ii! Yave, Nyuwo ti Muluku! Nyuwo moompakela murumeiyaanyu yoororomeliha yooreera ela.

²⁷ Vano, moonnenenimwanyu mooreeliha emusi ya murumeiyaanyu, weera eyo epwaherere mahuku ootheene okhala vamaithoniwanyu; niwoko Nyuwo Yave mooreeliha yeeyo, ni enookhala yooreeliheya wa mahuku ootheene.”