1 Mamwene 9 - Emakhuwa Bible

Muluku oniixoonihera wa Salomoni

¹ Salomoni amalihaleene oteka Empa ya Yave ni empa ya emwene ni ikina aatthunaawe oteka,

² Yave aahiixoonihera wa yoowo emaara yanaaveeli ntoko iixoonihenraawe oGibiyoni.

³ Yave aamweerela: Kohiiwa nivekelo ni odyoonttelelawanyu muvekenlaanyu vamaithoniwaka; kootteeliha Empa ya Yave ela mwa yeeyo mutenkaanyu weera mwemmo nimakemo Nsinanaka mahuku ootheene. Maithwaaka ni murimaaka onookhalamo wa mahuku ootheene.

⁴ Mwaha wa nyuwo – mweetta mweekhaikhaiyini ni moota woororomeleya ohoolowaka ntoko atithinyu Davide yeenttaaya ni mwapaka sootheene koolamulenlaakani ni mwiiwelela ikanosaka ni malamulowaaka,

⁵ vano kinookhaliha ehicaanyu ya emwene yoowaalamula aYixrayeli wa mahuku ootheene. Kaahaaroromeliha atithinyu Davide yeeyo kaaweerenlaaka: ‘Munookhalano namarandela vahiceni ya emwene wa aYixrayeli wa mahuku ootheene.’

⁶ Vaheera nyuwo hoye hoye anamwaniinyu yakihiya ehiiwelelaka ikano ni malamulo koovanghaakani weera elape miluku sikina,

⁷ kinoovenxa muloko wa aYixrayeli mweelaponi kivanghaaka ni kinoohiya Empa ya Yave ela kitteelihenraaka Nsinanaka. Hiiho, aYixrayeli anoothatuwa ootthebwiwa ni ootheiwa wa miloko sootheene.

⁸ Erookhalaru etokotoko Empa ya Yave ela vano, ootheene eniivire anootikhina ni anootheya yeeraka: ‘Opakenle heeni Yave elapo ela ni Empa ya Yave ela?’

⁹ Yoowaakhula eniikhale ela: ‘Niwoko awo yaamuhiya Yave Mulukwaaya, mwa Yoowo aakhumihale makholowaaya wExipitu ni yaatthara miluku sikina elapaka ni erumeelaka – tivawo Yave aakhumihenraawe nihooxo nna.’”

¹⁰ Siviraleene iyaakha miloko miili mwa seiye Salomoni aatenkaawe Empa ya Yave ni empa ya emwene,

¹¹ owo aamvaha Hirami, mwene a oTiro, mittetthe miloko miili sa oGalileya, niwoko Hirami aamvaha esedari*, nyiri sikina ni eyuuma yoorikaxa aatthunaawe.

¹² Wa soothesene, Hirami arowakaru oTiro weera oone mittetthe Salomoni aamuvanghaawe, khasaamureenre.

¹³ Owo aamukoha: “Mukivahenre heeni mittetthesene seiye munnaka?” Vano aatteha ‘elapo ya Kabuli’, nniitthaneliwa mpaka olelo.

¹⁴ Vanonto Hirami aamurumihela mwene ikiilu* macira miloko mixexe sa eyuuma yoorikaxa.

Miteko sikina sa Salomoni

¹⁵ Mwene Salomoni aavariha miteko sooviha weera etekiwe Empa ya Yave, empaawe ya emwene, oMilo*, exiri ya oYerusaleemu ni isidade sa oHazori, oMegido ni oGezeri.

¹⁶ Farawu*, mwene a wExipitu aawanano oGezeri, anakuxa. Aahisa esidade awiivaka amakaaya aKanaani ni aamvaha mwanawe muthiyana amuthelihaka Salomoni.

¹⁷ Vano Salomoni aarasela oGezeri, anateka mpatta wa vathi vathi wa oBeti-Horoni,

¹⁸ oBalahati, ni oTademori munikareni mweelaponimwawe,

¹⁹ nitho isidadesawe soothokorora sooca sootheene ni mittetthe saakhala ikaarosawe sa ekhotto ni ikavalusawe*. Aateka soothesene aatthunaawe oYerusaleemu, oLibanu ni mweelaponi yootheene ya olamulawawe.

²⁰ Vanonto yaahala akina mweelaponi yahaakhanle aYixrayeli – awAmori, aHiti, aPerizi, aHivi ni aYebusi. Salomoni aahaavara aavarihaka miteko sooviha.

²¹ Awo khayiiviwe ni aYixrayeli ni mitekosene seiye anoopwahererano.

²² Vaheera Salomoni khaamunyesereringheru muYixrayeli miteko sooviha. Awosa yaari anakhottwaawe, asitokweenaawe, asitokweene a ikaarosawe sa ekhotto ni anamweettiha a ikaarosene seiye.

²³ Yaaritho yaahoolela sootekateka sa Salomoni – ahooleli macira mathanu ni miloko mithanu yaawehaweha anamiteko.

²⁴ Mwaana muthiyana a Farawu* athaammeene musidade ya Davide avolowaka empa ya emwene aamutekenlaawe Salomoni, aatenkaawe oMilo*.

²⁵ Imaara tthaaru vayaakhani Salomoni annapaka sooveleela soohisa ni sa murettele valtaarini* aamutekenlaawe Yave, ahisaka erubani* vamoha ni sooveleela vamaithoni wa Yave, akwaniheraka hiiho soonyesererihiwa sa Empa ya Yave.

²⁶ Salomoni aatekatho makula matokotoko wEzeyoni-Geberi ori vakhiviru wElati, elapo ya wEdomi, mukerekhere Ephareiya Yooxeera.

²⁷ Hirami aahaarumiha mmakulani matokotoko anamweettihaawe asilopwana ooxuttereene yaasuwenle ephareiya, weera yavare vamoha ni anamweettiha a makula matokotoko a Salomoni.

²⁸ Yaaheettiha makula matokotoko mpaka wOfiri, weiwo yaaruuhalaayawo ikiilu* 14 000 sa eyuuma yoorikaxa, emvahaka mwene Salomoni.