1 Mamwene 7 - Emakhuwa Bible

Empa ya emwene ya Salomoni ni impa sikina

¹ Salomoni atekaka empaawe ya emwene aavirihale iyaakha muloko ni tthaaru.

² Emoha ya empaawe aatenkaawe yiitthaniwa empa ya emwene ya Othako wa oLibanu, yaarino miringo iya: Mweerakameloni imeetru* miloko mixexe niithannamosa, mweekhuveeloni imeetru* miloko miili ni tthaaru, ni orakamawaya okhuma vathi wookela osulu imeetru* muloko ni tthaaru ni eriyari ya emeetru*. Yaarino misera mixexe sa amarimbu a esedari* saalipihera itthaabwa sa esedari*.

³ Nipathonaya naari na itthaabwa sa esedari*. Saari itthaabwa miloko mixexe niithanu – khula musera waarino itthaabwa muloko niithanu.

⁴ Saakhala ixanela saawehana tthaaru-tthaaru ekina ni ekhwaaya.

⁵ Masele ootheene yaarino malootho maxexe ewehanaka nikina ni nikhwaaya mararu-mararu.

⁶ Aateka mukwartuni etokweene ya amarimbu, mweerakamelonimwaya imeetru* miloko miili ni tthaaru ni mweekhuveelonimwaya imeetru* muloko ni tthaaru ni eriyari ya emeetru*. Ohoolowaya naakhala nipithela* ni amarimbu yaalipiha nivirelenleene.

⁷ Aateka esaala ya ehice ya emwene yiitthaniwa Esaala ya Ophuka milattu, mwa mwemmo eeraawe athorihe, anahuruwelano esedari* okhuma vathi mpaka opathoni.

⁸ Empaawe ya emwene mwa yeeyo eeraawe akhale yaari wiithela, yaamulikana. Salomoni aamutekelatho mwaana muthiyana a Farawu* empa ya emwene ntoko yeele, mwa yoowo aamuthenlaawe.

⁹ Otekiwa wootheene waavareliwe muteko ni maluku ootthuneyaxa, ooringiweene ni ekheriweene mpuwa ni vaate okhuma mmathipeloni mpaka munkhalaxirini.

¹⁰ Mathipelo yaapakeliwe maluku ootthuneyaxa ni matokotoko, makina imeetru* ixexe ni eriyari ya emeetru* ni makinaawo imeetru* tthaaru ni eriyari ya emeetru*.

¹¹ Mpatta wa osulu waapakeliwetho maluku ootthuneyaxa elikanxiweene ni eringiweene itthaabwa sa esedari*.

¹² Nipuwa ntokweene naarukureerihiwe ni exiri ya misera miraru sa maluku ooratteliwa ni musera mmoha wa itthaabwa sa esedari* nilikanaka ni nipuwa na mpuwa na Empa ya Yave ni ekwartwaaya.

Miteko sa Hurami, namahana a ebronze*

¹³ Mwene Salomoni aalamula weera Hurami aroweliwe oTiro.

¹⁴ Amayawe yaari naamukhweli a epuumba ya Nafitali ni atithawe yaari a oTiro ni namahana a ebronze*. Hurami aari mulopwana ooweraxa asuwelaka miteko sincipale sa ohana ebronze*. Aarowa wa mwene Salomoni ni aapaka miteko sootheene aavahiwaawe.

¹⁵ Aahaahana amarimbu eeli a ebronze* – khula nrimbu orakamawaya waari imeetru* ithannatthaaru ni vakhaani ni orukureerawawe waarino imeetru* ithanu ni eriyari ya emeetru*.

¹⁶ Aahanela nyuru miili sa ebronze*– khula muru orakamawaya waari imeetru* piili ni vakhaani.

¹⁷ Khula muru waaphwanelihiwa ni onyooro wootthaviwa – onyooro mithannamiili wa khula muru.

¹⁸ Aapakatho misera miili sa irooma* sirukureenreene khula onyooro wootthaviwa weera okuttelele muru vasulu amarimbu. Khula muru aapakela hiiho.

¹⁹ Nyuru sa amarimbu yaari mpithela* sapakiwe ethutweene ni orakamawaya waari emeetru* emoha ni wookwanaka imeetru* piili.

²⁰ Mukhwipi wa khula muru mpatta wooneyaxaayawo, mukhwipi wa onyooro wootthaviwa saakhala irooma* macira meeli sirukureenreene misera miili.

²¹ Hurami aaweemexa amarimbu mpithela* mwa Empa ya Yave. Nrimbu na mpatta wa ohitto aahiitthana Yakini ni nikina na mpatta wa ottuttuwani Bowazi.

²² Nyuru sa amarimbu saalikana ithutu. Hiiho miteko sa amarimbu saamalihiwa.

²³ Aahanatho nttankhi ntokotoko noorukureera ni noowiixa, mmwaanomwaya imeetru* ixexe ni eriyari ya emeetru* ni orakamawaya imeetru* piili ni eriyari ya emeetru*. Orukureerawaya waari imeetru* muloko niithanu.

²⁴ Vathi wa ekala saarukureerihiwa misera miili sa soowiima – orakamelanawaya waari wa isentimeetru* ithanu ereene emohamoharu ni nttankhi.

²⁵ Nttankhi naari vasulu wa imombe ilopwana muloko ni piili – tthaaru saawehihiwe mpatta wa ottuttuwani; tthaaru mpatta ninkela nsuwa; tthaaru mpatta wa ohitto ni tthaaru mpatta ninkhuma nsuwa. Nttankhi neemexiwe vasuluwaya ni nyettosaya sa ottuli saawehihiwe eriyari.

²⁶ Mwiittaaya nttankhi nne waari wa ikatha ixexe ni owanoniwaya waalikana wa ekoomixi – ntoko ethuhu yoothapuruwa. Nttankhi nne saavolowamo iliitru* 44 000.

²⁷ Aahanatho ikarinyu muloko sa ebronze* – khula ekarinyu yaarino emeetru* emoha ni wookwanaka imeetru* piili orakamawaya ni mweekhuveelonimwaya, ni wiixerawaya waari emeetru* emoha ni vakhaani.

²⁸ Ikarinyu saapakiwe moota ola: Saarino imetto sa ebronze* silipihiweene ni iyuuma sikhwaaya.

²⁹ Imetto saalipihiwe ni iyuuma saakhalamo icaambulo sa amwatto, imombe ilopwana ni akerubini*. Vasulu ni vathi wa amwatto ni akerubini* yaakhalamo makukhu a eyuuma yoohaniwa.

³⁰ Khula ekarinyu yaakhalano Mareko maxexe a ebronze* ni misomaari sa ebronze*. Mmaloothoni maxexe a khula ekarinyu yaakhalano ibasiya yeemexiwaka ni metto mixexe ehaneliweene mukhwipimwaya makukhu a eyuuma.

³¹ Mpatta wa osulu wa khula ekarinyu naakhalawo nlaka noorukureera. Wiixerawaya waari eriyari ya emeetru* emoha ni mmwanomwaya waarino eriyari ya emeetru* emoha. Saapattheliwe icaambulo mukhwipimwaya. Vaheera imetto sa ikarinyu khasaahiyono soorukureera; saari sa mattuumba.

³² Mareko maxexe awo yaalipiheriwe vathi wa metto ni misomaari saakumanyihiwe ni mettosene seiye. Waanuwawaya wa khula nreko waari wookwanaka emeetru* emoha.

³³ Mareko awo yaapakiwe ntoko a ikaaro sa ikavalu* – maviiri, misomaari, nreko, isipooko ni ihaapu – sootheene iyo saapakiwe ni eyuuma yoohaniwa.

³⁴ Khula ekarinyu yaarino ivarelelo ixexe saatthukiwe mmaloothoni maxexe.

³⁵ Mpatta wa osulu wa khula ekarinyu waakalano nlaka, wiixerawaya isentimeetru* miloko miili. Ivarelelo ni imetto sootheene iyo saahaneliwe vamohamoharu mpatta wa osulu wa ekarinyu.

³⁶ Aahaapatthela akerubini*, amwatto ni mavare muyuumani ni mmettoni – mmapuroni moothemwene mwaatthuneya erukureerihiweene makukhu.

³⁷ Ikarinyu muloko sootheene saapakiwe moota mmoha silikanaka wunnuwa ni ekhalelo. Khula ekarinyu yaahaniwe moota mmoha.

³⁸ Vahoolowaya aahana ibasiya muloko sa ebronze*. Khula ebasiya saavolowamo iliitru* macira mathannamararu ni miloko mithannamiraru ni mmwaanomwaya imeetru* piili – ebasiya emoha wa khula ekarinyu.

³⁹ Aahiikaathi ikarinyu ithanu mpatta wa ohitto wa Empa ya Yave ni ithanu mpatta wa ottuttuwani. Aahiikaathitho nttankhi mpatta wa ohitto, eyo tiiyo munloothoni mpatta wa ohitto ni ninkhuma nsuwa wa Empa ya Yave.

⁴⁰ Aahanatho ixaaru, apoxoro ni ibasiya soovuuvihera. Hiiho Hurami aamaliha miteko sootheene aalamuleliwaawe ni mwene Salomoni Mpaani mwa Yave.

⁴¹ Amarimbu ooweeli; mavattaaya oomeeli epakiweene koomixeene vasulu amarimbu; onyooro miili wootthaviwa saaphwanelihiwe nyurusene seiye;

⁴² iroma* macira maxexe wa onyooro miili (misera miili sa irooma* wa khula onyooro wootthaviwa saaphwaneliha nyuru);

⁴³ ikaarinyu muloko ni ibasiyasaya muloko;

⁴⁴ nttankhi ni imombe ilopwana muloko ni piili vathiwaya;

⁴⁵ ixaaru, apoxoro ni ibasiya soovuuvihera. Ikaruma sootheene iye Hurami aampakenlaawe mwene Salomoni wa Empa ya Yave saahaniwe ni ebronze*.

⁴⁶ Mwene aalamula weera ikaruma iye satotoxiwe vanreyanreyani na oYordanu eriyari ya oSukoti ni oZaretani.

⁴⁷ Salomoni khaalamulenle ophimiwa ikaruma iye, niwoko saahaatta ni olemela wa ebronze* khawaalikeleya.

⁴⁸ Salomoni aapakelatho ikaruma sikina mpuwa wa Empa ya Yave: altaari* a eyuuma yoorikaxa; meesa a eyuuma yoorikaxa mwa yaawo yaakhalaayawo epaawu ya Okhala*;

⁴⁹ onyaari wa eyuuma yoorikaxa woohaniwa – mithanu mpatta woolopwana ni mithanu woothiyana wa Nipuro Nootteelaxa*; ithutu sa eyuuma yoorikaxa, onyaari ni soorehererano mutthambo.

⁵⁰ Ibasiya sa eyuuma yoorikaxa, soorehererano mutthambo, ibasiya soovuuvihera, isasaani, ibasiya sa erubani* ni soorukureeriha masele sa eyuuma yoorikaxa wa milako sa ekwartu ya mpuwaxa – Nipuro Nootteelaxa* – nitho wa milako sa ekwartu etokweene.

⁵¹ Simalihiweene miteko sootheene Salomoni aapakenlaawe Empa ya Yave, aavoleiha itthu sootheene atithawe Davide yaatteelinghaaya – eyuuma yoorikaxa, eparatha* ni ikaruma sa mpuwa, aniikaathi mukwartuni ya mihakhu sa Empa ya Yave.