1 Mamwene 5 - Emakhuwa Bible

Orehereriwa wa otekiwa Empa ya Muluku

¹ Hirami, mwene a oTiro, iiwakaru weera Salomoni oovariwa omwene, aamurumihela Salomoni anamitthengaawe, niwoko Hirami aari nthamwene oororomeleya a Davide.

² Salomoni aamurumihela mutthenga ola Hirami:

³ “Moosuwela nnenesene weera atithaka Davide khawaatthuneya otekela Empa Nsina na Yave Mulukwaaya niwoko na ikhotto yaawannaaya wa mipatta sootheene. Ommaleloni Yave Mulukwaaya aahaavaha waawina amwiittanaaya ootheene.

⁴ Vano Yave Mulukwaaka ookivaha wiitthuuwa wa mipatta sootheene ni nkinono amwiittana hata nihooxo.

⁵ Tivawo kintthunaaka otekela Empa Nsina na Yave Mulukwaaka ntoko Yave ha aaweerenlaawe atithaka Davide: ‘Mwaninyu, mwa yoowo kineeraaka kimukhalihe ntoko namarandelaanyu ti anaatekele Empa Nsinanaka.’

⁶ Vano mulamule weera ekuuhere isedari* ya oLibanu. Arumeiyaaka animwaakhavihera awinyu ni miyo kinimwaaliva nlivo muneeraanyu mukilamule. Moosuwela weera khawoworu ongwera wuuha esedari* ntoko aSidoni.”

⁷ Hirami iiwakaru mutthenga wa Salomoni, aahakalala, aneera: “Yave atthapeliwe olelo, niwoko oomvaha Davide mwaana a miruku weera alamule muloko mutokweene owo.”

⁸ Vanonto Hirami aamurumihela Salomoni yoowaakhula ela: “Kohaakhela mutthenga mukirumihenlaanyu ni kinoopaka sootheene muntthunaanyu, koovahakani esedari* ni nyiri sitokotoko sikina.

⁹ Anamitekwaaka anooteexa nyiri iyo okhuma oLibanu mpaka ephareiya ephambihakamo sootthukiweene mipatta-mipatta mpaka nipuro muneeraanyu mukithoonyere. Vaavaawo kinootaphula nyuwo mwakuxeke. Yoolivelaayeene mukivaheke yooca vaatewaka.”

¹⁰ Hiiho Hirami aamvaha Salomoni esedari* ni nyiri sikina sootheene aatthunnaawe.

¹¹ Salomoni aamvaha Hirami ikiilu* macira miloko mithannamosa sa etrigu ntoko sooca wa vaatewawe vamoha ni iliitru* macira miloko mithannamosa sa makhura a sooliveira*. Ti seiye Salomoni aamvaahaawe Hirami vayaakhani.

¹² Yave aamvaha Salomoni miruku, ntoko aamuroromelinghaawe. Waakhala wiiwanana variyari wa Hirami ni Salomoni ni ooweeli ale yanniiraana.

¹³ Mwene Salomoni aahaathanla anamiteko oonyesererihiwa 30 000 variyari wa aYixrayeli ootheene.

¹⁴ Nyeeri sootheene yannarumiheliwa oLibanu asilopwana macira macireene muloko – khula mukuttula wa macira macireene muloko waahala mweeri mmoha oLibanu ni nyeeri miili owaani. Oolamulela miteko soonyesererihiwa iye aari Adonirami.

¹⁵ Salomoni aakhalano anamateexa 70 000 ni anamapwexa maluku 80 000 mmanttumuxani,

¹⁶ nitho anamawehaweha 3 300, mwa yaale yaarehera miteko sootheene.

¹⁷ Mwene aalamulela ovenxiwa mmanttumuxani indyerwa sooreerela sa maluku weera Empa ya Muluku ekhalane mathipelo a indyerwa sa maluku ookheriwa.

¹⁸ Anamateka a Salomoni ni a Hirami vamoha ni asilopwana a oGebali, yannaceka nyiri ni yannakhera maluku yaatthuneya otekela Empa ya Muluku.