1 Mamwene 4 - Emakhuwa Bible

Asitokweene a Salomoni

¹ Vano mwene Salomoni aathatuwa mwene a aYixrayeli ootheene.

² Masina a arumeiyaawe oottittimiheyaxa ti ala: Azariya, mwaana mulopwana a Zadoki: musaserdoti*;

³ Elihorefi ni Ahiya, mwaana mulopwana a Xixa yaari anamalepa. Yehoxafati, mwaana mulopwana a Ahiludi, aari mutokweene a ilivuru sa nyaha,

⁴ Benaiya, mwaana mulopwana a Yehoyada aari mutokweene a anakhotto ootheene a aYixrayeli; Zadoki ni Abiyatari yaari asaserdoti*;

⁵ Azariya, mwaana mulopwana a Natani aalamula anamalamula a ilapo; Zabudi, mwaana mulopwana a Natani, aari musaserdoti* ni namalakaawe mwene.

⁶ Abixari aareherera sootheene mpaani ya emwene; Adonirami, mwaana mulopwana a Abida, aareherera miteko soonyesereriwa sootheene.

⁷ Salomoni aahaakhaliha maguvernadori muloko neeli wa ilapo sootheene sa aYixrayeli mwa yaawo yaarino nlamulo na onyesereriha oruuha yaatthuneya wa mwene ni emusaawe mpaanimwawe sooreerela sootheene sootthuneya. Khula guvernadori waatthuneya oruuha sooca vayaakhani mweeri mmoha.

⁸ Masinaaya ti ala: Beni-Huri mweelaponi ya mmanyaakoni sa wEfrayimi;

⁹ Beni-Dekeri oMakazi, oXahalebimi, oBeti-Xemexi, wEloni ni oBetihanani;

¹⁰ Beni-Hesedi wAruboti (oSoko ni ilapo sootheene sa oHeferi saari sawawe);

¹¹ Ben-Abinadabi oNafoti-Dori (mwaarawe aari Tafati, mwaana muthiyana a Salomoni );

¹² Bahana, mwaana mulopwana a Ahiludi oTanahaki ni oMegido ni elapo yootheene ya oBeti-Xani mukerekhere oZaretani vathi wa oYizereyeli, okhuma oBeti-Xani mpaka wAbeli-Mehola, mpakatho oYokimeyami.

¹³ Beni-Geberi oRamoti-Giliyade (mittetthe sa Yahiri, mwaana mulopwana a Manaxe oGiliyade saari sawawe nitho elapo ya wAregobi eri oBaxani vamoha ni isidadesaya miloko mithannamosa saarino ixiri, masele ni anampattika a ebronze*).

¹⁴ Ahinadabi, mwaana mulopwana a Ido oMahanayimi;

¹⁵ Ahimahazi oNafitali (owo aathelanne ni Basemati, mwaana muthiyana a Salomoni);

¹⁶ Bahana, mwaana mulopwana a Huxai wAxeri ni wAlopeti;

¹⁷ Yehoxafati, mwaana mulopwana a Paruwa wIsakari;

¹⁸ Ximei, mwaana mulopwana a Ela, oBenyamini;

¹⁹ Geberi, mwaana mulopwana a Uri, oGiliyade (elapo ya Sihoni, mwene a awAmori, ni Ogi, mwene a oBaxani). Aari guvernadori mmoharu a elapo ele.

Ovuwa wa olamula wa Salomoni

²⁰ Muloko wa aYixrayeli waari woohaalikeleyaxa. Awosa yannaca, yannawura, ehakalalaka.

²¹ Salomoni aalamula elapo yootheene okhuma mooloko Efratesi mpaka elapo ya aFilisti mpakatho mwiinano wa wExipitu. Ilapo iye sannaruuha sooreerela ni saalamuliwa ni Salomoni mookuminimwawe wootheene.

²² Vano sooca sa khula nihuku sa Salomoni saari ikiilu* 6 500 sa ephepa ya etrigu yooreeraxa ni ikiilu* 13 000 sa ephepa.

²³ Imombe muloko sooneneva; imombe miloko miili saacihiwa mutuphini ni ikhondoolo ni ipuri ncira vamoha ni itthove*, anaahe, ipaala ni ipalame soohuwiwa.

²⁴ Owo aalamula elapo yootheene mpatta ninkela nsuwa wa mooloko – okhuma oTipexa mpaka oGaza. Vano waakhala murettele wa mipatta sootheene.

²⁵ Mweehuhuni ya Salomoni, oYuda ni oYixrayeli, okhuma oDani mpaka oBerxeba waakhala woolipeene – khula mutthu aarino emattaawe ya iwuuva* ni nyiri sa efiigu*.

²⁶ Salomoni aakhalano makhoola macira miloko mixexe a ikavalusawe* seettiha ikaaro sa ekhotto ni ikavalu* 12 000 sikina.

²⁷ Maguvernadori muloko neeli a mwene yannamuronghela sooca sootheene saatthuneya wa Salomoni ni wa oolattuliwaawe. Khula mutthu a yaawosa aawehaweha sooca vamweerini khula eyaakha, yeerelaka weera ehithoweru etthu.

²⁸ Yaakuxatho yaatthunaaya orowano – esevada* ni malaxi ooca ikavalu* seettiha ikaaro sa ekhotto ni ikavalu* sikina.

Miruku sa Salomoni

²⁹ Muluku aamvaha Salomoni miruku, akhili atokotoko ni wiiwexexa woohimala ntoko ihaava sa mukerekhere ephareiya.

³⁰ Mwa yeeyo, miruku sa Salomoni saapwaha seiye sa anamiruku ootheene a mpatta ninkhuma nsuwa ni sa ootheene a wExipitu.

³¹ Aari a miruku ompwaha akhalaru mutthu; mpakatho ompwaha Etani, ngwEzerahi, Hemani, Kalekoli ni Dareda, anamwane asilopwana a Maholi. Epilaawe yaamwareela mmilokoni sa mukhwipimwawe.

³² Aakhumiha soohimmwa sa miruku macira miloko miraru, anuupuxa icipo macira muloko ni icipo ithanu.

³³ Aahuuluma sa nyiri – okhuma nyiri sitokotoko sa oLibanu mpaka hisopo* sinunnuwa muxirini. Aahuulumatho sa axinama, ipalame, soowiipurula ni ihopa.

³⁴ Atthu a miloko sootheene, yannarwa wiiwa miruku sa Salomoni. Awo yaarumihiwa ni mamwene ootheene a elapo ya vathi wa yaawo yiiwale suulummwaka sa mirukusawe.