1 Mamwene 22 - Emakhuwa Bible

aYixrayeli ni aYuda anaawanano awArami

¹ Wa iyaakha tthaaru khawaakhanle owanawana variyari wa oYixrayeli ni wArami.

² Vaheera vayaakhani yanaararu, Yehoxafati, mwene a oYuda, aarowa omuxekura mwene a oYixrayeli.

³ Mwene a oYixrayeli aaweerela asitokweenaawe: “Khamusuwenle weera oRamoti-Giliyade ori wawihu? Hata hiiho nri mwaasa omaala nihikuxaka wa mwene a awArami.”

⁴ Vano owo aamukoha Yehoxafati: “Munookihoola owanano oRamoti-Giliyadi?” Yehoxafati aamwaakhula mwene a oYixrayeli: “Kinimookhaviherani vamoha ni anakhottwaaka ni ikavalusaka*.”

⁵ Yehoxafati aamweerelatho mwene a oYixrayeli: “Mwaasaase toko miruku sa Yave.”

⁶ Vano mwene a oYixrayeli aahaathukumanyiha maprofeeti wookwanaka asilopwana macira maxexe, anaakoha: “Kawananeke oRamoti-Giliyadi hoye hoye kihirowe?” Awosa yaamwaakhula: “Murowe, niwoko Yave onimwinnyerera oRamoti-Giliyadi mmatatanimwanyu.”

⁷ Mene Yehoxafati aamukoha: “Nno Khawowo mprofeeti mukina a Yavetho weera nimukohetho?”

⁸ Ahabi aamwaakhula: “Ookhala nlelo mprofeeti mukina ookwana omukohakoha mwaha wa otthuna wa Yave, mene miyo kinoomuthanya, niwoko khanakileele itthu sooreera; onkileela soonanararu. Owo oniitthaniwa Mikaya, mwaana mulopwana a Imela.” Yehoxafati aamwaakhula: “Amwene, muheere hiiho.”

⁹ Vanonto mwene a oYixrayeli aamwiitthana mmoha a arumeiyaawe, anamweerela: “Mukiruuheleke woowaakuveya Mikaya, mwaana mulopwana a Imela!”

¹⁰ Mwene a oYixrayeli ni Yehoxafati, mwene a oYuda, yaakilaathiye vahiceniwaya sa emwene ewanreene mikaandyo sa emwene vanipuroni nimveeriwa* etrigu, vakhiviru wa mulako wa oSamariya. Maprofeeti ootheene yaathalihera yeeyo yuupuwelaaya weera ti otthuna wa Muluku ohoolo wa mamwene.

¹¹ Vano Zedekiya, mwaana mulopwana a Kenahana, aahiipakela manyaka a eyuuma, analaleiya: “Yave oneera ha: ‘Munimwaahomano manyaka ala awArami mpaka waamalamaliha.’ ”

¹² Maprofeeti makinaawo yaalaleiya mooteene yoowo yeeraka: “Mwawaneno oRamoti-Giliyade ni munoowina, niwoko Yave onoowinnyerera mmatatani mwa mwene.”

¹³ Namutthenga aarongwe omwiitthana Mikaya aamweerela: “Moone, maprofeeti ootheene akina aneera weera mwene onoowina. Maswaanyu etthareke maswaaya.”

¹⁴ Wa soothesene, Mikaya aamwaakhula: “Kinlipela mwa Nsina na Yave – kingwera ohima paahi yeeyo Yave okileenlaawe.”

¹⁵ Aphiyakaru, mwene, aamukoha: “Mikaya, niroweke nawananeke oRamoti-Giliyadi, hoye hoye nihiroweke?” Mikaya aamwaakhula: “Mwawane ni munoowina, niwoko Yave onoowinnyerera mmatatani mwa mwene.”

¹⁶ Mwene aamweerela: “Koolipeliheke imaara ihai weera onkileela ekhaikhai ya Yave?”

¹⁷ Vano Mikaya aamwaakhula: “Koowoona aYixrayeli ootheene emwareenleene mmattumuxani ntoko ikhondoolo soohikhalano mukukhuli ni Yave aaheera: ‘Atthu ala khaanono muneene. Khula mutthu a yaala aroweke owaani mmuretteleni.’”

¹⁸ Mwene a oYixrayeli aamweerela Yehoxafati: “Kohooleelani weera imaara sootheene owo khanghima yooreera mwaha wa miyo, mene paahi itthu soonanara.”

¹⁹ Mikaya aapwaherera: “Mwiiwe masu a Yave: Koomoona Yave akilaantheene vahiceniwawe arukureeriweene ni anakhotto ootheene a wiirimu moonowaawe mulopwana ni muthiyana.

²⁰ Yave aaheera: ‘Taani anaamulokotthe Ahabi weera awaneno oRamoti-Giliyadi ni akhwelewo?’ Akina yaahima ekina ni akina yaahima ekina.

²¹ Ommaleloni munepa mmoha waaheemela ohoolo wa Yave onamweerela: ‘Miyo kinoomulokottha.’

²² Yave aakoha: ‘Moota heeni?’ Munepa waamwaakhula: ‘Kinookhuma weera kakhale munepa woowootha vayanoni sa maprofeetaawe ootheene.’ Yave aaheerela: ‘Onoowera omulokottha. Orowe wapake yeeyo.’

²³ Vano Yave ohiikaathi munepa woowootha vayanoni wa maprofeetaanyu ootheene ala. Yave oohima erisaanyu.”

²⁴ Zedekiya, mwaana mulopwana a Kenahana, aamwaattamela Mikaya, anammana owiitho, anamukoha: “Okikhumme moota heeni Munepa wa Yave weera wuulume ni nyuwo?”

²⁵ Mikaya aamwaakhula: “Munoosuwela nihuku nenenenno muneeraanyu mwiivithavitheke ekwartu ekwartu.”

²⁶ Mwene aahaalamulela arumeiyaawe: “Munghokoloxere Mikaya wa Amoni, mutokweene a esidade ni wa Yowaxi, mwaana mulopwana a mwene

²⁷ ni mwaamuleele: ‘Mwene oneera ha: Mungwalele mulopwana ola mukaliposo mumvahaka yooca vakhaani paahi ni maahi mpaka kineeraaka kihokolowe oolipeene.’”

²⁸ Mikaya aamwaakhula: “Nyuwo mwahokolowa oolipeene, Yave khuulumme mwa miyo.” Aapwaherera weera: “Mwiiwe nnenesene, atthu ootheene nyuwo yeeyo kinghimaaka!”

Okhwa wa Ahabi

²⁹ Vanonto mwene a oYixrayeli ni Yehoxafati, mwene a oYuda, yaarowa owanano oRamoti-Giliyadi.

³⁰ Mwene a oYixrayeli aamweerela Yehoxafati: “Kinrowa owana kihiwarenle sa emwene, mene nyuwo ngwareke sa emwenaanyu.” Vano mwene a oYixrayeli aahiirula, ni ooweeli yaarowa woowanani.

³¹ Vanonto mwene a awArami aahaalamulela asitokweenaawe miloko miraru neeli a ikaaro sa ikavalu* sa ekhotto: “Muhingwanenoru mukina ahikhanle mwene a oYixrayeli.”

³² Asitokweenaawe a ikaaro sa ikavalu* ale emoonakaru Yehoxafati, yaahuupuwela: “Vekhaikhai – ola ti mwene a oYixrayeli.” Tivawo yaamurincaaya weera engwaneno. Wa soothesene, Yehoxafati akhuwelaka,

³³ asitokweenaawe miloko miraru neeli a ikaaro sa ikavalu* yaasuwela weera khaahiyono mwene a oYixrayeli enamuhiya omuttharerela.

³⁴ Vaheera nakhotto mmoha aari mwaasa olatha muupaawe, anamulatha mwene a oYixrayeli amuhomaka mukhatoni mwa yoowiixaakiheraawe. Mwene aamulamulela namweettiha a ekaaro ya ekavalu* ya emwene: “Okikhumiheke mukhottoni, niwoko koovulalihiwa.”

³⁵ Ekhotto yannapwaherera nihuku nenenno ni mwene a oYixrayeli eemexingweene mukaaroni ewananiwaka awArami. Ephome ya nikhwattanawe yaavuuvela vathi wa ekaaro ni wiilaka, aahookhwa.

³⁶ Naaneelaaya nsuwa waahiiwanyeya okhuweliwa wa anakhotto: “Khula mutthu aroweke esidadaawe ni elapwaawe!”

³⁷ Hiiho mwene aahookhwa, anaroihiwa oSamariya enamvithelawo.

³⁸ Yaarapiha ekaarowaawe vanrattani na oSamariya, mwa weiwo yaarapaayawo mapuuta, ni alapwa yaalata ephomaawe, ntoko Yave aahimmaawe.

³⁹ Vano, mwaha wa sookhumelela sikina sa olamula wa Ahabi – sootheene aapankaawe, empa ya emwene aatenkaawe yaarino maino a etthepo ni isidade aalipinghaawe – silempwale mulivuruni ya nyaha sa mamwene a oYixrayeli.

⁴⁰ Ahabi aahookhwa anavithiwa ni makholowaawe ni mwanawe mulopwana Ahaziya ti aamurandenle.

Yehoxafati onlamula oYuda

⁴¹ Vayaakhani yanaaxexe moolamulani mwa Ahabi, Yehoxafati, mwaana mulopwana a Asa, aathatuwa mwene a oYuda.

⁴² Yehoxafati apaceraka olamula aarino iyaakha miloko miraru niitthanu sa oyariwawawe, analamula oYerusaleemu iyaakha miloko miili niithanu. Amayawe yaari Azuba, mwaana muthiyana a Zilei.

⁴³ Aatthara ephiro ya atithawe Asa mwa soothesene, ahihapuwaka. Aapaka yeeyo eri yooreera vamaithoni wa Yave. Wa soothesene, khaamalinghe mapuro ootteela a miluku sikina, mwa seiye muloko waapwahereraaya oveleelela ni ohiserawo erubani*.

⁴⁴ Yehoxafati aakhalano murettele ni mwene a oYixrayeli.

⁴⁵ Vano, mwaha wa sookhumelela sikina sa olamula wa Yehoxafati – sootheene aapankaawe ni ikhottosawe – silempwale mulivuruni ya nyaha sa mamwene a oYuda.

⁴⁶ Aawoomola mweelaponi mapuuta asilopwana a impa sa miluku sikina yaahalahanlewo vahoolo wa olamula wa atithawe Asa.

⁴⁷ Ehuhuweene yeele khaariwo mwene wEdomi – ti pwattapwattha aalamula.

⁴⁸ Vano Yehoxafati aateka makula matokotoko a nakoso weera erowe wa wOferi ni yaruuhewo eyuuma yoorikaxa. Wa soothesene, khayaaphiyalewo niwoko yaattatta wEziyoni-Geberi.

⁴⁹ Ehuhuweene yeele Ahaziya, mwaana mulopwana a Ahabi, aamweerela Yehoxafati: “Anamweettihaaka a makula matokotoko yeetteke ni awinyu,” mene Yehoxafati aakhootta.

⁵⁰ Vanonto Yehoxafati aahookhwa, anavithiwa ni makholowaawe musidadeni mwa Davide, nikholonawe. Mwanawe mulopwana Yehorami ti aamurandenle.

Ahaziya onlamula oYixrayeli

⁵¹ Vayaakhani muloko niithannapiili moolamulani mwa Yehoxafati, mwene a oYuda, Ahaziya, mwaana mulopwana a Ahabi, aathatuwa mwene a oYixrayeli oSamariya. Aalamula oYixrayeli iyaakha piili.

⁵² Aapaka soonanara vamaithoni wa Yave attharaka iphiro sa atithawe ni amayawe ni iphiro sa Yerobowami, mwaana mulopwana a Nebati, mwa yoowo aatthekinghe aYixrayeli.

⁵³ Aamurumeela ni aamulapa Bahali* atannyaka isara sa Yave, Muluku a aYixrayeli, ntoko yaapankaaya atithawe.