1 Mamwene 20 - Emakhuwa Bible

Ikhoto sa Ahabi ni awArami

¹ Vano Beni-Hadadi, mwene a awArami aahaathukumanyiha anakhottwaawe ootheene. Akhaviheriwaka ni mamwene miloko miraru ni mamwene meeli vamoha ni ikavalusaya* ni ikaarosaya sa ikavalu* sa ekhotto owo aarowa, anarica oSamariya, anawanano.

² Aamurumihela anamitthenga Ahabi, mwene a oYixrayeli musidadeni, amweerelaka: “Beni-Hadadi oneera ha:

³ ‘Eparathaanyu* ni eyuumaanyu yoorikaxa ti yawaka – hiihotho axaarinyu ni anamwaniinyu ooreerela.’”

⁴ Mwene a oYixrayeli aamwaakhula: “Kohaakhulela, pwiiyaaka ni mwenaaka – miyo ni sootheene kirinaaka ti sawinyu.”

⁵ Anamitthenga yaahokoleelatho wa Ahabi enamweerela: “Beni-Hadadi oneera ha: ‘Ntoko kooleenlaakani – kintthuna eparathaanyu*, eyuumaanyu yoorikaxa, axaarinyu ni anamwaniinyu.

⁶ Ewooreene yeela omaalo, kinimwaarumiha arumeiyaaka weera ekungure empaanyu ya emwene ni impa sa asitokweenaanyu. Eniikuxe sootheene munoonelaanyu okhala etthu, ekiruuhelaka.’ ”

⁷ Mwene aahaathukumanyiha asitokweene ootheene a elapo, anaweerela: “Moone moota mulopwana owo ontannyeraawe milattu! Alamulelaka okuxiwa axaaraka, anamwanaaka, eparathaaka* ni eyuumaaka yoorikaxa, miyo nkaamukhoottihale.”

⁸ Asitokweene ni atthu ootheene yaamwaakhula: “Muhimwiiwelele hata muhaakhulele soonyesererihasawe.”

⁹ Vano owo aawaakhula anamitthenga a Beni-Hadadi: “Mwamuleele mwene pwiiyaaka: ‘Murumeiyaanyu onoopaka sootheene mumvekenlaanyu emaara yoopacera, mene khangwera waakhulela yoonyesereriha yanaaveeli ela.’” Awosa yaattimula, enamuthalihera Beni-Hadadi yoowaakhula ya Ahabi.

¹⁰ Vano Beni-Hadadi aamurumihela mutthenga mukinatho Ahabi: “Miluku sikittaruxaxe miyo kaahiphwataxa oSamariya. Kheehalaru etthu hata yoonarara.”

¹¹ Ahabi aamwaakhula: “Mwamuleele: ‘Muhiipe icipo sa owina ehinaaye omala ekhotto.’”

¹² Beni-Hadadi iiwa mutthenga ole owo awuraka ni mamwene makina muheemanimwaya anaalamulela anakhottwaawe: “Mwiirehererele owana!” Vano yaareherera owanano esidade.

Owiniwa wa Beni-Hadadi

¹³ Eyo eri hiiho, mprofeeti mmoha aarowa wa Ahabi, mwene a oYixrayeli, anahima: “Yave oneera ha: ‘Moowoona anakhotto ala ancipalexa? Kinoowinnyerera mmatatanimwanyu olelo ni vano munoosuwela weera Miyo ti Yave.’”

¹⁴ Ahabi aamukoha: “Taani anaapake yeeyo?” Mprofeeti aamwaakhula: “Yave oneera ha: ‘Anakhotto amiravo a asitokweene a ilapo eniipake yeeyo.’ ” Ahabi aamukohatho: “Taani anaapacere owana?” Mprofeeti aamwaakhula: “Ti nyuwo.”

¹⁵ Vano Ahabi aahaathukumanyiha anakhotto amiravo a asitokweene a ilapo – ookwanaka asilopwana macira meeli ni miloko miraru neeli. Vahoolowaya aahaathukumanyiha anakhotto ootheene akina – asilopwana macira miloko mithannamiili.

¹⁶ Yaavenya othana, Beni-Hadadi ni mamwene miloko miraru ni mamwene meeli iiraanannaawe ehapaliwaka muheemanimwaya.

¹⁷ Anakhotto amiravo a asitokweene a ilapo yaapacera ovenya. Vano Beni-Hadadi aahaarumiha anamahottela, mwa yaawo yaamuthalihenre: “Aakhala asilopwana akina akhumme oSamariya.”

¹⁸ Owo aawaakhula: “Awosa hata erweelaka opaka murettele naari owana, mwaavare ni matata.”

¹⁹ Anakhotto amiravo a asitokweene a ilapo yaavenya musidade, anakhotto akina yaattharaka ottuliwaya,

²⁰ ni khula nakhotto aamwiiva mwiittanaawe. Hiiho awArami yaatthawasa ni aYixrayeli yaahaattharelela. Wa soothesene, Beni-Hadadi mwene a awArami aatthawa ni ekavalu* vamoha ni anamweettiha a ikavalu* akina.

²¹ Mwene a oYixrayeli aavenya, anaphwanya ikavalu* ni ikaaro sa ikavalu*, ni awArami yaahononeleya.

²² Vahoolowaya mprofeeti aarowa wa mwene a oYixrayeli, anamweerela: “Mwaasaase moota woowiilipihera, niwoko mwaahiyu mwene a awArami onimoorwa woowanananitho.”

²³ Eyo eri hiiho, anamalaka a mwene a awArami yaamweerela: “Milukusaya siri miluku sa mmwaako, tivawo aniwinnaaya. Vaheera hiyo naawanano munghaawalawani, vekhaikhai nnimwaawina.

²⁴ Mpake ha: Mwaakuruxeke mamwene mukhottoni mwaahelaka asitokweenaahu.

²⁵ Mwattiye toko nipuro na anakhotto mwaayeleenlaanyu; waatta wa ikavalu* okhaleke omoharu ni hiihotho ikaaro sa ekhotto, weera naawaneno aYixrayeli munghawalawani. Vano, vekhaikhai, weiwo nnimwaawina.” Owo aahaakhulela, anapaka yeeyo.

²⁶ Eyaakha yaattharelana, Beni-Hadai aahaathukumanyiha anakhotto variyari wa awArami, anarowa wAfeki weera aawaneno aYixrayeli.

²⁷ aYixrayeli yaathukumanyihiwatho ni, emwaakhenleene pooso, yaavenyasa weera yaawaneno awArami. aYixrayeli yaakonenle ohoolowaya, ntoko mikuttula miili sa ipuri, vaheera awArami yaasareya mutuphini moothemwene.

²⁸ Mulopwana a Muluku aarowa wa mwene a aYixrayeli, anamweerela: “Yave oneera ha: ‘Yeenre awArami yuupuwelaka weera Yave ti Muluku a mmwaako ahikhanle a munghawalawani, Miyo kinoowinnyerera mmatatanimwanyu anakhotto awo oowaattaxa ni nyuwo munoosuwela weera Miyo ti Yave.’”

²⁹ Yaakonela ewehanneene ni vanihukuni nanaathannameeli yaapacenraaya owana. aYixrayeli yaawiiva anakhotto awArami 100 000 nihuku nimoha paahi.

³⁰ Yaahanlaawo yaatthawela esidade ya wAfeki, mwa weiwo yaamorenlaayawo exiri atthu 27 000 a yaale. Vano Beni-Hadadi aatthawelatho osidade, aniipitha mpaani ekwartu ekwartu.

³¹ Asitokweenaawe yaamweerela: “Moone, nohiiwa weera mamwene a oYixrayeli ti a ikharari. Niroweke mpaka wa mwene a oYixrayeli niwanreene isaakho ni mikhoyi muxiko. Apaale anuurele okumaahu.”

³² Yaarowa wa mwene a oYixrayeli ewanreene isaakho yiivitikelenleene mikhoyi muxiko, enamweerela: “Murumeiyaanyu Beni-Hadadi oneera: ‘Dyoontte, muhikiive.’” Mwene a oYixrayeli aawaakhula: “Nlelo ori ni okumi? Ti munnaka.”

³³ Asilopwana ale yaahoona masu ale ntoko eneneero yooreera, ni woowaakuveya yaahaakhulela: “Aani, ti munninyu.” Mwene aaweerela: “Mukiruuhele va. Aphiyakaru Beni-Hadadi, Ahabi aangweliha mukaaronimwawe.”

³⁴ Beni-Hadadi aamweerela: “Kinimoohokoloxerani isidade atithaka yaakuxalaaya wa atithinyu. Mwatekihe emerekadwaanyu oDamasku, ntoko atithaka yaapankaaya oSamariya.” Ahabi aamwaakhula: “Paahi, nohiiwanana.” Vano yaahiiwanana ni Ahabi aamutthunihera orowa.

Mprofeeti onimuthoriha Ahabi

³⁵ Mmoha a maprofeeti, oolamuliwa ni Yave, aamweerela mukhwaawe: “Mukivulalihe!” Wa soothesene, mukhwaawe aakhootta.

³⁶ Tivawo mprofeeti aamweerenlaawe: “Mweenre muhimwiiwelela Yave, mwaavenyakaru, onimoovulalihani mwatto.” Avenyakaru mulopwana ole, mwatto aamukarawela, anamvulaliha.

³⁷ Mprofeeti aamphwanya mulopwana mukina, anamweerela: “Dyoontte, mukivulalihe!” Vano mulopwana aammana, anamvulaliha.

³⁸ Vanonto mprofeeti aarowa, aneemela mukhwipi wa musewe, angwehereraka mwene. Aahiitikinsiha, akuttelenleene owiitho.

³⁹ Mwene aaviraawe, mprofeeti aamweerela: “Murumeiyaanyu aari mukhottoni woovihaxa ni mukina aakiruuhela mwiittana aamvanraawe, anakeerela: Munkosoope mulopwana ola. Owo atthawa, munooliva ni okumaanyu, hoye hoye munooliva etalentu* ya eparatha*.”

⁴⁰ Vano murumeiyaanyu apakaka itthu soohiyanahiyana sikina, namavariwa ole aatthawa.” Mwene a oYixrayeli aamwaakhula: “Nthorihelonanyu nikhaleke ntoko muhimalaanyu.”

⁴¹ Vano mprofeeti aakhunula ekhovaawe woowaakuveya ni mwene a oYixrayeli aamusuwela weera aari mmoha a maprofeeti.

⁴² Aamweerela mwene: “Yave oneera ha: ‘Moomutapuxa mulopwana kaamulakenlaaka weera iiviwe. Tivawo oneeraaya waakakhanyiheye okumaanyu mwa okumaawe; mulokwaanyu mwa mulokwaawe.’”

⁴³ Mwene aarowa empaawe ya emwene oSamariya oonyoonyiweene ni ooriipiweene murima.