1 Mamwene 17 - Emakhuwa Bible

Eliya onlaleiya mwaha wa ehuhu ya ohirupa epula

¹ Vano Eliya, muTixebi arowaka oTixebi, elapo ya oGiliyadi, aamweerela Ahabi: “Kinlipela mwa Nsina na Yave, Muluku a aYixrayeli mwa Yoowo kinimurumeelaaka weera khaniimaru nikame hata kheeruparu epula iyaakha sinrwa mpaka ehuhu kineeraaka kihime.”

² Yave aamweerela Eliya:

³ “Mvenye va, murowe mpatta ninkhuma nsuwa, mwiipithewo munxaapwani na oKeriti, mpatta ninkhuma nsuwa wa oYordanu.

⁴ Mwawureke maahi a munxaapwani ni kohaalamulela anakhuku weera yoocihekeniwo.”

⁵ Vano aapaka yeeyo Yave aamulamulenlaawe. Aarowa munxaapwani na oKeriti, mpatta ninkhuma nsuwa wa Yordanu, anakhalawo.

⁶ Anakhuku yannamuruuhela sooca ni enama oxeexelo ni oxekuwa ni aawura maahi a munxaapwani.

Naamukhweli a oXarefati

⁷ Eviraleene ehuhu ekina, nxaapwa naawelela niwoko na ohirupa epula.

⁸ Vano Yave aamweerela:

⁹ “Murowe woowaakuveya oZarefati, mweelaponi ya oSidoni, ni mwakhalewo. Koomulamulela naamukhweli a weiwo weera oovaheeni, yooca.”

¹⁰ Hiiho aarowa oZarefati. Aphiyakaru vamulako wa esidade, aamphwanya naamukhweli aasaka ikhuuni. Aamwiitthana, amvekelaka: “Dyoontte, mukiruuhele maahi mukahini weera kiwure.”

¹¹ Owo arowaka orika maahi, Eliya aamvekelatho: “Dyoontte mukiruuheletho yooca.”

¹² Naamukhweli aamwaakhula: “Kinlipela mwa Nsina na Yave Mulukwaanyu – nkinonoru yooca. Kirino ephepa vakhaani mmwaapuni ni makhura vakhaani munipoottoroni. Kinaasa ikhuuni weera kikuxe owaani kiitterekheleke miyo ni mwanaka mulopwana weera nace ni vahoolowaya nikhweeke etala.”

¹³ Eliya aamweerela: “Muhoove. Murowe owaani ni mwapake yeeyo muhimmaanyu. Mukipakele toko eboolu ekhaanene sa seiyo murinaanyu ni mukiruuheleke. Vahoolowaya mpakeke yoocaanyu ni mwaninyu.

¹⁴ Vano Yave Muluku a aYixrayeli oneera ha: ‘Ephepa eri mmwaapuni kheerwa emala hata makhura munipoottoroni mpaka nihuku Yave aneeraawe arupihe epula mweelaponi.’”

¹⁵ Naamukhweli aarowa, anapaka yeeyo Eliya aamulamulenlaawe. Vanonto yaakhala yooca ya nihuku ti nihuku wa Eliya, naamukhweli ni emusaawe.

¹⁶ Ephepa mmwaapuni hata makhura munipoottoroni khayaamanle, ntoko Yave aahimalaawe mwa Eliya.

¹⁷ Eviraleene ehuhu ekina, mwaana mulopwana a naamukhweli ole aavoreiwa. Annatepaxa ni ommaleloni aahookhwa.

¹⁸ Vano naamukhweli ole aamukoha Eliya: “Kootthekenleni mulopwana a Muluku? Murweenle va okuupuxera sootthekasaka ni omwiiva mwanaka?”

¹⁹ Eliya aamwaakhula: “Mukivahe mwaninyu.” Aamukuxa, anamuroiha mukwartuni ya osulu mwa weiwo aaphiyenraawewo, anamwaatalela vakaamani.

²⁰ Vano aamukhuwelela Yave: “Ii! Yave Mulukwaaka, munruuhelenle heenitho erisa naamukhweli ola kimphiyerenlaaka mmwiivaka mwanawe?”

²¹ Owo aamphiteera mmiravo vararu amukhuwelelaka Yave: “Ii! Yave Mulukwaaka, munghokoloxere mmiravo okumi!”

²² Yave aahiiwa okhuwela wa Eliya ni mmiravo aavenyerera, anakhala ni okumi.

²³ Eliya aamukuruxela mmiravo vathi, anawinnyerera amayawe aweerelaka: “Mmoone, mwaninyu ori ni okumi!”

²⁴ Vanonto muthiyana aamweerela Eliya: “Vano koosuwela weera muri mulopwana a Muluku ni masu a Yave munuulumanyu ti a ekhaikhai.”