1 Mamwene 14 - Emakhuwa Bible

Othorihiwa wa ekhapira ya Yerobowami

¹ Ehuhuweene yeele Abiya, mwaana mulopwana a Yerobowami aavoreiwa,

² ni Yerobowami aamweerela mwaarawe: “Mwiitikinsihe weera muhisuweliwe weera nyuwo mwaara a Yerobowami ni murowe oXilo. Vano ookhalawo mprofeeti Ahiya, mwa yoowo aakeerenle weera kaarwa okhala mwene a muloko.

³ Munkuxere ipaawu muloko, iboolu sikina ni oravo. Owo onimooleelani yeeyo eniyeereiye ni mmiravo.”

⁴ Vano mwaarawe Yerobowami aapaka yeeyo aamulamulenlaawe, anarowa vaate wa Ahiya oXilo. Vanonto Ahiya khaawera woona – aari oohoona niwoko na wuuluvalaxa.

⁵ Wa soothesene, Yave aamweerela Ahiya: “Mwaarawe Yerobowami onimoowa wookohererani mwaha wa mwanawe mulopwana, niwoko na ovoreiwa. Ontthuneya weera nyuwo mmwaakhule moota kineeraaka kooleeleni. Owo aaphiyaka, onimwiitikinsiha.”

⁶ Tivawo, Ahiya iiwalaawe mikhitto vamulako, aamweerela: “Mvoloweke, mwaara a Yerobowami. Heeni muniitikinsihaanyu? Koovahiwa mutthenga woonanara wa nyuwo.

⁷ Murowe, mwamuleele Yerobowami weera Yave, Muluku a oYixrayeli, oneera ha: ‘Kohoothanlani variyari wa mulokwaanyu kinookhalihani muhooleli a mulokwaaka aYixrayeli.

⁸ Kohaakha omwene wa ekhapira ya Davide ni kohoovahani omwene ola. Wa soothesene, nyuwo khamukhanle ntoko murumeiyaaka Davide, mwa yoowo iiwelenle malamulowaaka ni aakitthanre ni murimaawe wootheene apakaka paahi yeeyo eri yooreera vamaithoniwaka.

⁹ Moopaka soonanara waapwaha ootheene yaale yaapaka khalayi nyuwo muhinaaye. Mohiipakela miluku sikina siri sa eyuuma; mootannyera isarasaka mukireraka ettuli.

¹⁰ Niwoko na yeeyo kinooruuhela erisa ekhapira ya Yerobowami. Kinoowiiva asilopwana ootheene a ekhapiraawe oYixrayeli – akhalaka neethi hoye hoye epottha. Kinoohisa ekhapira ya Yerobowami mpaka ommaleloni ntoko singhisiwaaya ikokhola.

¹¹ Yaawo ari a Yerobowami anookhuuriwa ni alapwa eniikhwele musidade, ni ipalame sa wiirimu sinimwaaca eniikhwele mutuphini. Uulumale ti Yave!’

¹² Mwaha wa nyuwo, muhokoleele owaani. Mwaavolowakaru musidadenimwanyu, mmiravo onimookhwa.

¹³ aYixrayeli ootheene anoomwiinlela ni anoomvitha. Ti yoowo paahi a ekhapira ya Yerobowami anaavithiwe, niwoko Yave Muluku a aYixrayeli omphwannye yoowo paahi ni etthu yooreera mukhapirani ya Yerobowami.

¹⁴ Yave onimwiithanlela mwene a oYixrayeli ni owo onoophwata ekhapira ya Yerobowami. Enimweereya ehuhuweene yeela – mpaka vaanaanovaava!

¹⁵ Vano Yave onimwaattaruxa aYixrayeli moota wooweera onuukhale ntoko ettheere yookuxiwa ni maahi. Owo onoowaakha aYixrayeli mweelaponi yooreera ela aavanghaawe makholowaaya, aamwaraxelaka okhopela mooloko Efratesi niwoko yaatannyera isara sa Yave epakaka nyiri soothipeleliwa Axera.

¹⁶ Yave onimwaahiya aYixrayeli niwoko na soottheka Yerobowami aapankaawe, aatthekihaka aYixrayeli.”

¹⁷ Vano mwaarawe Yerobowami aavenya, anahokoleela oTireza. Avolowakaru mpaanimwawe, mmiravo ole aahookhwa.

¹⁸ Awo yaamvitha ni aYixrayeli ootheene yaamwiinlela, ntoko Yave eenraawe mwa murumeiyaawe, mprofeeti Ahiya.

Okhwa wa Yerobowami

¹⁹ Sookhumelela sikina sa olamula wa Yerobowami – ikhottosawe ni moota aalamunlaawe – sootheene seiye silempwale mulivuruni ya nyaha sa mamwene a oYixrayeli.

²⁰ Aalamula wa iyaakha miloko miili ni piili anavithiwa ni makholowaawe. Mwanawe mulopwana, Nadabi ti aamurandenle.

Rehobowami onlamula oYuda

²¹ Rehobowami, mwaana mulopwana a Salomoni aari mwene a oYuda. Aapacenre olamula aareeneno iyaakha miloko mixexe ni eyaakha emoha sa oyariwawawe, analamula oYerusaleemu iyaakha muloko niithannamosa, esidade Yave aathanlalaawe variyari wa ipuumba sootheene sa aYixrayeli weera Nsinanawe nikhalewo. Nsina na amayawe naari Nahama – ngwAmoni.

²² Atthu a oYuda yaapaka soonanara vamaithoni wa Yave. Yaatannya isarasawe sa ehace opwaha yaapankaaya makholowaaya.

²³ Yaahiipakelatho mapuro ootteela a miluku sikina mmattumuxani; maluku ootteeliheriwa ni nyiri soothipeleliwa Axera, mmapuroni moothemwene a nyiri soopombaxa.

²⁴ Yaakhala mpaka mapuuta asilopwana mpaani mwa milukusaya. Yaapaka itthu soonanara sa mwiikho sa miloko sikina, mwa seiye Yave oomonlaawe ohoolo wa aYixrayeli.

²⁵ Vayaakhani yanaathanu ya olamula wa Rehobowami, Xixaki, mwene a wExipitu, aawanano oYerusaleemu.

²⁶ Aakuxa mihakhu sootheene sa Empa ya Yave ni sa empa ya emwene. Aakuxa sootheene – mpakatho ixikudu* sa eyuuma yoorikaxa Salomoni aapankaawe.

²⁷ Tivawo mwene Rehobowami aalamulenlaawe opakiwa ixikudu* sa ebronze* vanipuroniwaya, anaavaha asitokweene a anamalipelela vamulako wa empa ya emwene.

²⁸ Imaara sootheene mwene aarowaawe Mpaani mwa Yave, anamalipelela yannakuxa ixikudu* iye, ni vahoolowaya yaahokoloxera mpaani saathokororiwa ikapwitthi.

²⁹ Mwaha wa sookhumelela sikina sa olamula wa Rehobowami – sootheene aapankaawe – silempwale mulivuruni ya nyaha sa mamwene a oYuda.

³⁰ Waakhala owanawana variyari wa Rehobowami ni Yerobowami.

³¹ Rehobowami aahookhwa anavithiwa ni makholowaawe musidadeni ya Davide. Nsina na amayawe naari Nahama – ngwAmoni. Vano Abiya, mwanawe mulopwana ti aamurandenle.