1 Mamwene 12 - Emakhuwa Bible

Ipuumba sa mpatta wa ottuttuwani sinimvaanelela Rehobowami

¹ Rehobowami aarowa oXekhemi, niwoko aYixrayeli ootheene yaarowawo weera emvarewo mwene.

² Vano Yerobowami, mwaana mulopwana a Nebati, aari nlelo wExipitu, mwa weiwo aatthawenlaawewo niwoko na mwene Salomoni, ni, iiwakaru yeeyo, aahokolowawo.

³ Asitokweene a aYixrayeli yaamwiitthana ni owo vamoha ni muthukumano wootheene wa aYixrayeli yaarowa wa Rehobowami, enamweerela:

⁴ “Atithinyu aanilemeliheraxa woovara muteko woovihaxa. Vano mvukule miteko soovihaxa iya ni yoolemela ela. Hiiho nnimoorumeelani.”

⁵ Rehobowami aawaakhula: “Muhokoleele wa miyo eviralene mahuku mararu.” Vanonto atthu yaapwaha.

⁶ Mwene aahuuluma ni asitokweene yaarumeela atithawe Salomoni mookuminimwaya wootheene. Owo aahaakoha: “Miruku heeni muneeraanyu mukivahe yoowaakhula muloko ola?”

⁷ Awosa yaamwaakhula: “Nyuwo olelo mwakhala murumeiyi a muloko ola, murumeelaka ni mwaakhula nnene, owo onookhala arumeiyaanyu wa mahuku ootheene.”

⁸ Wa soothesene, Rehobowami aakhootta miruku sa asitokweene a aYixrayeli ni aahuuluma ni amiravo unnuwannaawe ni yaamurumeela.

⁹ Owo aahaakoha: “Miruku heeni muneeraanyu mukivahe? Naakhule hai muloko ola onkeerela: ‘Mvukule yoolemela atithinyu anilemelihenraaya.’”

¹⁰ Amiravo unnuwannaawe yaamwaakhula: “Muleele muloko owo oweerenleni: ‘Atithinyu aanilemeliheraxa, vano mvukule.’ Vano muleele: ‘Yooleemela ya atithaka yaavihaxa – yootepaxa yawaka!

¹¹ Atithaka yaahoolemeliherani, miyo kimmoolemeliheraxani. Atithaka yoottaruxelani ni ekwamba, miyo kinimoottaruxani ni awalisi!’”

¹² Eviraleene mahuku mararu Yerobowami ni atthu ootheene yaahokoleela wa Rehobowami, ntoko mwene aalamulenlaawe: “Muhokoleele wa miyo eviraleene mahuku mararu.”

¹³ Mwene aawaakhula atthu mooxililini akhoottaka miruku sa asitokweene a aYixrayeli,

¹⁴ attharaka miruku sa amiravo. Owo aaweerela: “Atithaka yaahoolemeliherani; miyo kinimwaandyeerera yoolemela ele. Atithaka yoottaruxani ni ekwamba; miyo kinimoottaruxani ni awalisi!”

¹⁵ Hiiho mwene khaakhulenle muloko niwoko oceendyeya iwe wa sookhumelela waarweela mpatta wa Yave. Hiiho yaakwanihereya masu Yave aamuleenlaawe Yerobowami, mwaana mulopwana a Nebati, mwa mprofeeti Ahiya.

¹⁶ aYixrayeli ootheene yoonakaru weera mwene khaatthuna owiiwa, yaamwaakhula: “Kheewo enaattamme ni Davide, mwaana mulopwana a Yixai! Muroweke oheemaniwanyu aYixrayeli! Mwiipasoope vaatewanyu, ekhapira ya Davide!” Vano aYixrayeli yaarowa mmawannyaya.

¹⁷ Vaheera mwaha wa aYixrayeli yaamanke mmittettheni sa oYuda, Rehobowami aapwaherera okhala mwenaaya.

¹⁸ Mwene aamurumihela Adonirami, mutokweene a miteko soovihaxa, mene aYixrayeli ootheene yaamvonya maluku mpaka okhwa. Wa soothesene, mwene Rehobowami aawera owela ekaarwaawe ya ikavalu*, anatthawela oYerusaleemu.

¹⁹ Hiiho aYixrayeli annavaanyera omwene wa Davide mpaka olelo.

Yerobowami onlamula oYixrayeli

²⁰ aYixrayeli ootheene yiiwakaru weera Yerobowami aahokolowa, yaamwiitthanela muthukumano, enamvara omwene wa aYixrayeli. Vaheera epuumba ya Yuda paahi ti yaapwaherenre oororomeleyeene wa omwene wa Davide.

²¹ Rehobowami aphiyakaru oYerusaleemu, aahaathukumanyiha anakhotto ootheene a epuumba ya Yuda ni ya Benyamini – asilopwana 180 000 – weera yaawanane aYixrayeli ni ekuxetho omwene wa Rehobowami, mwaana mulopwana a Salomoni.

²² Vanonto Yave aamweerela Xemaya, mulopwana a Muluku:

²³ “Mwamuleele Rehobowami, mwaana mulopwana a Salomoni, mwene a oYuda, ni mwaaleele atthu ootheene a epuumba ya Yuda ni ya Benyamini ni akinaawotho:

²⁴ ‘Yave oneera ha: ‘Muhirowe waawanano axunninyu, aYixrayeli. Ootheene nyuwo muhokoleele owaani, niwoko ti Miyo kipanke yeeyo. Vano yaahiiwelela masu a Yave, enahokoleelasa mmawannyaya, ntoko Yave aalamulenlaawe.

Aximombe a eyuuma yoorikaxa a Yerobowami

²⁵ Vano Yerobowami aalipiha oXekhemi, mmanyaakoni sa wEfrayimi, anamakawo. Aavenyawo, anateka oPeniyeli.

²⁶ Yerobowami aahuupuwela: “Enoowereya weera omwene ola onoohokoleela ekhapira ya Davide.

²⁷ Atthu ale yarowa oYerusaleemu weera yapake sooveleela Mpaani mwa Yave, anoomukhalelatho nthiti pwiiyaaya Rehobowami, mwene a oYuda. Mwaha wa yeeyo, anookiiva, ehokoleelaka wa mwene Rehobowami.”

²⁸ Iilankeene, mwene aahaapaka aximombe eeli a eyuuma yoorikaxa. Owo aaweerela atthu: “Nyuwosa khamureere weetta oYerusaleemu. Siri va milukusanyu, aYixrayeli, mwa seiye sookhumihaleni wExipitu.”

²⁹ Aamurumihela mwaamombe mmoha oBeteli ni mukina oDani.

³⁰ Etthu ele yaathatuwa yoottheka. Atthu yaarowa mpaka oDani weera yamulapewo mwaamombeene yoole.

³¹ Yerobowami aateka mapuro ootteela vanttumuxani anaakhaliha asaserdoti* variyari wa atthu oohiyanahiyana, yaaroohikhalaru aLeevi.

³² Aakhaliha efesta munihukuni na naamuloko ni mathanu na mweeri wanaathannaararu, ntoko efesta yaapakiwa oYuda, ni aapaka sooveleela valtaarini*. Aapaka yeeyo oBeteli, aapakelaka sooveleela aximombe eeli aapankaawe. Aahaakhalihatho asaserdoti* oBeteli, mmapuroni ootteela aatekenlaawe miluku sikina.

³³ Munihukuni na naamuloko ni mathanu na mweeri wanaathannaararu, nihuku aathanlalaawe muneenaawe, aapaka sooveleela valtaarini* aatenkaawe oBeteli. Hiiho aahaakhalihera efesta aYixrayeli, anarowa valtaarini* weera ahisewo sooveleela.