1 Mamwene 10 - Emakhuwa Bible

Oxekura wa pwiyamwene a oXeba

¹ Pwiyamwene a oXeba iiwakaru sa epili ya Salomoni aaphwannyaawe ni ekhavihero ya Yave, aarowa oYerusaleemu weera amoote murima ni sookoha soorika.

² Aaphiya oYerusaleemu ahooliweene ni mukuttula mutokotoko wa ikamelu* sikuxaleene itthu sooreerela, eyuuma yoorikaxa ni maluku oowaaraxa. Aarowa wa Salomoni, anamukoha mwaha wa sootheene saari mmurimanimwawe.

³ Salomoni aamwaakhula sookoha sootheene. Khayaariwo yookoha yaamurika waakhula.

⁴ Pwiyamwene a oXeba oonakaru miruku sa Salomoni ni empa ya emwene aatenkaawe,

⁵ sooca vameesawawe, ihice sa asitokweenaawe, arumeiyaawe erumeelaka ewanreene moota mmoha, anamakuxaawe ikoomixi ni sooveleela soohisa aapankaawe Mpaani mwa Yave, aatikhiniheyaxa.

⁶ Owo aamweerela mwene: “Yeeyo kiiwalaaka mweelaponimwaka mwaha wa mitekosanyu ni mirukusanyu ettiitthu.”

⁷ Wa soothesene, nkaakhulela yeeyo kiiwaaka mpaka koonnaaka. Vekhaikhai – khayaakiphiiherenle ekhaikhai; mirukusanyu ni mihakhusanyu soopwahaxa yeeyo kileeliwaaka.

⁸ Moota anghakalalaaya yaawo ampwaherera okhala ohoolowanyu yiiwaka mahuku ootheene mirukusanyu!

⁹ Yave Mulukwaanyu atthapeliwe, mwa Yoowo osiveliwe ni nyuwo ookhalihakani vahiceni ya emwene wa oYixrayeli. Owo ohookhalihani ntoko mwene weera mukwanihere ekhaikhai ni olamula nnene niwoko na osivelawawe woohimala muloko wa aYixrayeli.”

¹⁰ Owo aamvaha mwene ikiilu* macira miloko mixexe sa eyuuma yoorikaxa, itthu sooreerela sincipale ni maluku oowaaraxa. Khasinaruuhiwetho itthu sooreerela sincipale ntoko seiye pwiyamwene a oXeba aamvanghaawe mwene Salomoni.

¹¹ Makula matokotoko a Hirami yaaruuhatho eyuuma yoorikaxa wOfiri, nyiri soorikaxa, ni maluku oowaaraxa.

¹² Mwene aavarela muteko nyiri soorikaxa opaka ivarelelo wa Empa ya Yave ni wa empa ya emwene nitho weera epakiweno amakita ni atthakare a anacipo. Mpaka olelo khasinattuutteliwe itthaabwa soorikaxa oYixrayeli ntoko iye.

¹³ Mwene Salomoni aamvaha pwiyamwene a oXeba sootheene aatthunaawe ni aavekenlaawe ohiya seiye aalakenlaawe omvaha. Vahoolowaya aattimula, anahokoleela elapwaawe vamoha ni arumeiyaawe.

Mihakhu sitokotoko sa Salomoni

¹⁴ Iyaakha sootheene Salomoni annaakhela eyuuma yoorikaxa wookwanaka ikiilu* 23 000,

¹⁵ ohiya misoko aakhelaawe wa ananakoso oohiyanahiyana sa mamwene a wArabiya ni maguvernadori a elapwaawe.

¹⁶ Mwene Salomoni aapaka ixikudu* sitokotoko macira meeli sa eyuuma yoorikaxa yoohaniwa, khula exikudu* ehuruweliweeneno ikiilu* ithanamosa ni wookwanaka ikiilu* ithanapiili sa eyuuma yoorikaxa.

¹⁷ Aapakatho ixikudu* sikhaani macira mararu sa eyuuma yoorikaxa yoohaniwa, khula exikudu* ehuruweliweeneno ikiilu* piili. Mwene aahiikaathi mpaani mwa emwene ya Othako wa oLibanu.

¹⁸ Vahoolowaya mwene aalamulela opakiwa ehice ya emwene etokotoko ecaambuliweene maino a itthepo ni ehuruweliweeneno eyuuma yoorikaxa.

¹⁹ Ehice ele yaakhalano ixikada ithannamosa ni yoophiteeraaya osuluwaya waari woorukureera. Mipatta soomiili sa ehice saakhala woophiteerihelamo nyoono ni ecaambulo ya mwatto mmoha wa khula mpatta.

²⁰ Ixikada ithannamosa iye saakhalamo icaambulo sa amwatto muloko ni piili mmoha wa khula mpatta wa khula exikada.

²¹ Ikoomixi sootheene sa mwene Salomoni saari sa eyuuma yoorikaxa ni ikaruma sootheene sa empa ya emwene ya Othako wa oLibanu saaritho sa eyuuma yoorikaxa. Khayaariworu ya eparatha*, niwoko mmahukuni a Salomoni eparatha* khayaattittimihereleya.

²² Mwene aakhalano makula matokotoko a nakoso vamoha ni makula matokotoko a Hirami. Khula iyaakha tthaaru yannahokolowa ekuxaleene eyuuma yoorikaxa, eparatha*, maino a itthepo, atthupili ni akhole.

²³ Mwene Salomoni aakhalano mihakhu ni miruku waapwaha mamwene ootheene akina a elapo ya vathi.

²⁴ Atthu a ilapo sootheene yaatthuna wuuluma ni Salomoni weera yiiwe miruku Muluku aamvanghaawe.

²⁵ Eyaakha ti eyaakha khula mutthu aarwa omuxekura annamuruuhela soovaha– itthu sa eparatha*, eyuuma yoorikaxa, mikaandyo, ikapwitthi, itthu sooreerela, ikavalu* ni abuuru.

²⁶ Salomoni aathukumanyiha ikaaro ni ikavalu*; aakhalano ikaaro 1 400 ni ikavalu* 12 000, mwa seiye aathokororaawe mmasidadeni sa ikaaro ni oYerusaleemu mwa weiwo aaraawewo.

²⁷ Mwene aahaattiha eparatha* moota wooweera yaasarasara oYerusaleemu ntoko maluku, ni nyiri sa esedari* saahaattaxa ntoko nyiri sa efiigu* sa ntuphini vathi vathi vamwaako wa oYerusaleemu.

²⁸ Ikavalu* sa Salomoni saarweela wExipitu ni oKuwe, mwa weiwo ananakoso a mwene yaathumaayawo.

²⁹ Yaathuma ikaaro sa ikavalu* wExipitu khula ekaaro mutteengwaaya waari ixekeli* macira mathannamosa sa eparatha* ni khula ekavalu* ixekeli* ncira ni miloko mithanu. Yaahaathumiheratho iye mamwene ootheene a aHiti ni a awArami.