1 Mamwene 1 - Emakhuwa Bible

Owana mwaha wa namarandela taani

¹ Davide uuluvanleene, yaamukhuneela manta, mene owo khoona oviha.

² Vano arumeiyaawe yaamweerela: “Munihiye niwaasereni mwaamwali oowiikosoopa weera oorumeelekeni ookosoopakani. Owo akoneke ottuliwanyu weera oovaheeni, nttukuttha.”

³ Vano yaamwaasaasa mulaponi moothemwene mwa oYixrayeli mwaamwali ooreeraxa, enamphwanya Abixagi, muXunami, enamuroihela mwene.

⁴ Mwaamwali owo aari ooreeraxa, anamurumeela mwene amukosoopaka, mene mwene khaamukonanne.

⁵ Vano mwaana mulopwana a Davide, Adoniya, mwa yoowo amayawe yiitthaniwa Hagiti, aasareya wiixoona eeraka: “Miyo kinookhala mwene.” Aareherera ikaaro ni anamweettiha ikaaro sa ikavalu* nitho asilopwana miloko mithanu weera etthimakele ohoolowawe.

⁶ Atithawe khaanamvirikanyihele naari khaanamukohe: “Ompakelani hiiha?” Adoniya aaritho ooreeraxa ni aayariwe vahoolo wa Abesalomi.

⁷ Adoniya aamwiiranana Yowabe, mwaana mulopwana a Zeruha ni Abiyatari, musaserdoti*, ni awosa yaamutthara enamukhavihera.

⁸ Wa soothesene, Zadoki, musaserdoti*, Benaiya, mwaana mulopwana a Yehoyada, Natani, mprofeeti, Ximei ni Reyi vamoha ni anamalipelelaawe Davide khayaamutthunne Adoniya okhala mwene.

⁹ Vano Adoniya aaveleela ikhondoolo, imombe, iputtiputthi sooneneva vaNlukuni na oZoheleti vakhiviru wEni-Rogeli. Aahaalattula axunneiye ootheene – anamwane a mwene – ni asilopwana ootheene a oYuda yaari arumeiyi a mwene.

¹⁰ Vaheera khaamulattunle Natani, mprofeeti, naari Benaiya, hata anamalipelela a mwene hoye hoye munneiye Salomoni.

¹¹ Vanonto Natani aamukoha Batixeba, amayawe Salomoni: “Mohiiwa weera Adoniya, mwaana mulopwana a Hagiti, oohiivara omwene, apwiyaahu Davide ehisuwelaka?

¹² Mukihiye koovaheeni, miruku weera moopole okumaanyu ni wa mwaninyu Salomoni.

¹³ Murowe mwamukohe mwene Davide: ‘Pwiiya, mwaakilipelela miyo, murumeiyaanyu: “Vekhaikhai, Salomoni, mwaninyu, onookhala namarandelaaka ni onookilaathi vahiceniwaka.” Vano, okhalenleni Adoniya mwene?’

¹⁴ Vano nyuwo muulumaka nlelo ni mwene, miyo kinoophiya kaakhulelaka maswaanyu.”

¹⁵ Batixeba aarowa omukumanano mwene uuluvalanxe, Abixagi, muXunami aamukosoopaawewo.

¹⁶ Batixeba aamukokhorela mwene, uuramihelaka ekhovaawe vathi. Ohoolo wa mwene. Davide aamukoha: “Muntthunani?”

¹⁷ Owo aamwaakhula: “Pwiiyaaka, nyuwo muneenaanyu mwaakilipelela miyo, murumeiyaanyu, mwa Nsina na Yave Mulukwaanyu: ‘Salomoni, mwaninyu, onookhala namarandelaaka ni onookilaathi vahiceniwaka.’

¹⁸ Wa soothesene, Adoniya ohiivara omwene, pwiiyaaka mwene muhisuwelaka.

¹⁹ Ooveleela imombe, ikhondoolo ni iputtiputthi sincipale anaalattula anamwane ootheene a mwene, musaserdoti* Abiyatari ni Yowabe, mutokweene a anakhotto. Vaheera khaamulattunle Salomoni, murumeiyaanyu.

²⁰ Pwiiyaaka mwene, aYixrayeli ootheene anoowehani nyuwo weera esuwele taani anoorandeleni omwene pwiiyaaka vahiceniwanyu.

²¹ Mwaahimuthoonya namarandela, miyo ni mwanaka Salomoni nnooniweke ntoko anamavariha, pwiiyaka mwene mvithiweene ni makholowaanyu.”

²² Owo nlelo uulumaka hiihaale ni mwene, Natani, mprofeeti, aaphiyawo.

²³ Arumeiyi a mwene yaamweerela: “Mprofeeti, Natani, ohoowa.” Natani aavolowa wa Davide, anuuramihela ekhovaawe vathi ohoolo wa mwene.

²⁴ Natani aamukoha: “Pwiiyaaka mwene, weeraka mwaaheera weera Adoniya onookhala namarandelaanyu ni weera onookilaathi vahiceniwanyu?

²⁵ Olelo owo aarowa oveleela imombe, iputtiputthi ni ikhondoolo sincipale. Ohaalattula anamwanaawe mwene ootheene, mutokweene a anakhotto ni Abiyatari, musaserdoti*. Vaanaanova awosa anca, ewuraka ni yoowo, yeeraka: ‘Woye mwene Adoniya!’

²⁶ Wa soothesene, khaakilattunle miyo, murumeiyaanyu, naari Zadoki, musaserdoti*, hata Benaiya, mwaana mulopwana a Yehoyada, hoye hoye murumeiyaanyu Salomoni.

²⁷ Mpaka opaka etthu siiyeela pwiiyaaka mwene muhaasuwelihaka arumeiyaanyu yoowo aneera oorandeleni amwene pwiiyaaka vahiceni?”

Salomoni namarandela

²⁸ Vano mwene Davide aaheera: “Mmwiitthane Batixeba.” Vanonto owo aamwaattamela, aneemela ohoolowawe.

²⁹ Mwene aalipela: “Kinlipela mwa Nsina na Yave, mwa Yoowo okooponle mmahooxoni moothemwene,

³⁰ weera vekhaikhai olelo kinookwanihera yeeyo kaalipenlaaka mwa Nsina na Yave, Muluku a aYixrayeli: Salomoni, mwaninyu, onookhala namarandelaaka ni owo onookilaathi vahiceniwaka vanipuroniwaka.”

³¹ Vano Batixeba aahuuramihela ekhovaawe vathi, anamukokhorela mwene, eeraka: “Pwiiyaaka mwene, Davide, akhaleke ni okumi wa mahuku ootheene!”

³² Mwene Davide aalamulela: “Mmwiitthane Zadoki, musaserdoti*, Natani, mprofeeti ni Benaiya, mwaana mulopwana a Yehoyada.” Awosa ephiyakaru ohoolo wa mwene,

³³ Davide aaweerela: “Mwaaroweno arumeiyi a apwiyaanyu ni mungwelihe mwanaka Salomoni vabuuruniwaka ni munronghe oGihoni.

³⁴ Zadoki, musaserdoti*, ni Natani, mprofeeti, yamuttikitthelewo weera akhale mwene a aYixrayeli. Mwiipe nipalapatta ni mwakhuweleke: ‘Woye mwene Salomoni!’

³⁵ Vahoolowaya mwamuhoole, ni owo arweeke weera akilaathele ehicaaka alamulaka vanipuroniwaka. Koomuthanla weera alamule oYixrayeli ni oYuda.”

³⁶ Benaiya, mwaana mulopwana a Yehoyada, aamwaakhula mwene: “Onimweereya! Yave, Muluku a apwiyaaka mwene aakhulele!

³⁷ Mooteene yoowo Yave aaraawe ni pwiiyaaka mwene, hiihotho akhaleke ni Salomoni weera omwenaawe okhale woovuwaxa opwaha wa pwiiyaaka mwene Davide!”

³⁸ Vano Zadoki, musaserdoti*, Natani, mprofeeti, Benaiya, mwaana mulopwana a Yehoyada, aKereti ni aPeleti yaarowa, enangweliha Salomoni vabuuruni a mwene Davide, enamuhoola mpaka oGihoni.

³⁹ Zadoki, musaserdoti*, aakuxa nnyaka noosareya makhura muheemani yootteela, anamuttikitthela Salomoni. Vanonto yaahiipa nipalapatta ni atthu ootheene yaakhuwela: “Mwene Salomoni woye!”

⁴⁰ Atthu ootheene yaamutthara ewiipaka ampetta ni ohakalalaxa moota wooweera etthaya yaatetereya mwaha wa onyakula.

⁴¹ Adoniya ni oolattuliwa ootheene yaari ni yoowo yiiwa onyakula iwe emalihaka efestaaya. Iiwakaru oruma wa nipalapatta, Yowabe aakoha: “Onyakula ni okhuweliwa iwo musidade ontaphulelani?”

⁴² Owo uulumaka hiihaale, Yonatani, mwaana mulopwana a Abiyatari, musaserdoti*, aaphiyaawe. Adoniya aamweerela: “Mvoloweke. Mutthu oottittimiheyaxa ntoko nyuwo wookhala wooruuhaka mutthenga wooreera.”

⁴³ Yonatani aamwaakhula: “Hata vakhaani! Pwiiyaaka mwene Davide oomuthanla Salomoni okhala mwene.

⁴⁴ Mwene aamurumiha owo ni Zadoki, musaserdoti*, Natani, mprofeeti, Benaiya, mwaana mulopwana a Yehoyada, aKereti ni aPeleti. Awosa aangwelihasa vabuuruni a mwene,

⁴⁵ ni Zadoki, musaserdoti*, Natani, mprofeeti oomuttikitthela okhala mwene a oGihoni. Okhuma weiwo yaarowa ehakalalaka ni esidade enyakuleleyaka. Onyakulawene ti weiwo muniiwaanyu.

⁴⁶ Ohiya toko yeeyo, Salomoni ookilaathela vahiceni ya emwene.

⁴⁷ Mpaka arumeiyi a mwene yaarowa omuulumiha Davide, mwene pwiiyaahu emweerelaka: ‘Mulukwaanyu atatuxe epili ya Salomoni opwaha epilaanyu ni omwenaawe woovuwaxa opwaha omwenaanyu!’ Vano mwene aahuurama vakaamaniwawe,

⁴⁸ aneera: ‘Yave, Muluku a oYixrayeli atthapeliwe niwoko ookitthunihera omoona namarandela vahiceniwaka olelo!’”

⁴⁹ Yiiwaka yeeyo, oolattuliwa ootheene a Adoniya yaarukureereya nyuru, enalakaseya ootheene.

⁵⁰ Wa soothesene, Adoniya, amoovaka Salomoni, aarowa, anavarela manyaka a mmaloothoni a altaari*.

⁵¹ Vano Salomoni aaleeliwa: “Adoniya ommoova mwene Salomoni ni ovanre manyaka a mmaloothoni a altaari*. Owo oneera: ‘Mwene Salomoni akilipelele olelo weera kharwa amwiiva murumeiyaawe ni ekatana.’”

⁵² Salomoni aahaakhula: “Owo iixoonihera oororomeleyeene, kheemukhumelela etthu. Vaheera namphwanyano yakhalaru yoonarara, onimookhwa.”

⁵³ Vano mwene Salomoni aahaarumiha asilopwana ni awosa yaamukuruxa valtaarini*. Adoniya aahoorwa anamukokhorela munttittimihoni mwene Salomoni ni Salomoni aamweerela: “Muroweke owaani.”